މަލަކާ ސިއްސައިގެން ދިޔައީ ފްލެޓުގެ ދޮރުގަ ވަރަށް ބާރަށް ޓަކި ޖެހުމުންނެވެ. އަވަސް އަވަހަށް ގޮސް ދޮރު ހުޅުވިއިރު ދޮރުމަތީގައި ތިބީ ފުލުހުންގެ ދެ އޮފިސަރުންނެވެ.

"ކިހިނެއްތޯވީ؟" ބިރުންހުރި ކަމުގައި ވިޔަސް ހާސްނުވާ ކަމަށް ހެދެމުން މަލަކާ ސުވާލުކުރި އެވެ. އެ ސުވާލަށް ޖަވާބު ދިނުމުގެ ބަދަލުގައި ފުލުސް އޮފިސަރު އެދުނީ މަލަކާގެ ފޯނު ހަވާލު ކުރުމަށެވެ. މަލަކާއަކަށް ދެވަނަ ގޮތެއް ނެތެވެ. އެސްފިޔަ ޖަހާލާހާ ހިނދުކޮޅެއްގެ ތެރޭގައި ފޯނު އޮތީ ފުލުސް އޮފިސަރުގެ އަތުގަ އެވެ. އެއާއެކު އެންގީ އެމީހުންނާއެކު ދިއުމަށެވެ.

މަލަކާ ގޮވައިގެން ދިޔައިރު އޭނާގެ ކޮއްކޮ، ބަސް ހުއްޓިފައި ބަލަހައްޓައިގެން ހުއްޓެވެ. މަގުމަތީގައި އޮތް ފުލުހުންގެ ވޭނަށް އަރައިގެން ދިޔައިރު މަލަކާއަށް ވަނީ ހަތަރު އުދަރެސް ފެނުޖެހިފަ އެވެ. ބެދެމުންދާ މަޅިއަކީ އޭނާއާ އެއްވެސް ގުޅުމެއް ނެތް މަޅިއެކެވެ. ޓޫރިޒަމް މިނިސްޓްރީގައި މަލަކާ އަދާކުރަމުން ގެންދިޔަ ވަޒީފާއާ ސިޔާސީކަމަކާ ގުޅުމެއް ނެތެވެ. ސިޔާސީ އެއްވެސް ހަރަކާތެއްގެ ތެރެއަށް މަލަކާ ނުވަދެ އެވެ. ފަޅުތަކާއި ފަރުތައް ކުއްޔަށް ދިނުމުގައި މަލަކާގެ ދައުރެއް ނެތެވެ. ފަހަކަށް އައިސް އެބާވަތުގެ ހަރަކާތްތައް އޮންނަނީ ވަރަށް ބޮޑަށް ސިއްރުކޮށެވެ. އެހެން ނަމަވެސް މިނިސްޓަރަށް އޮޅުމަކުން މަލަކާއަށް ފޮނުވުނު ޑޮކިއުމެންޓެއްގައި ހުރި ސިއްރު މައުލޫމާތު ލިބުމަކީ، މަލަކާ ކުރިކަމެއް، ކުށެއް ނޫނެވެ. އެ ވާހަކަ މަލަކާގެ ފަރާތުން ދެވަނަ މީހަކަށް އެނގިފައެއް ނޯންނާނެ އެވެ.

ފުލުސް ބަހުގައި ގެންގޮސް މަލަކާ ވެއްދީ ފުލުހުންގެ މައި އިދާރާއަށެވެ. އެތަނުގައި އެކަހެރިކޮށް ހުރި ކޮޓަރިއެއްގައި ބެހެއްޓުމަށް ފަހު އެއްވެސް މީހަކު އެތަނަކަށް ނުވަދެ އެވެ. އެގޮތަށް ގަޑިއެއްހާއިރު ދިޔަ އެވެ. އޭގެ ކޮންމެ މިނިޓެއް މަލަކާއަށް ހީވަނީ ގަރުނެއް ހެންނެވެ. މަލަކާ ސިއްސައިގެން ދިޔައީ ފުލުސް އޮފީހުގައި މަލަކާ ބަންދުކޮށްފައި އިން ކޮޓަރީގެ ދޮރުހުޅުވުމުންނެވެ. ފުލުސް އޮފިސަރާކާއެކު އެ ކޮޓަރިއަށް ވަނީ އުނިމާ ހަސީބާއި މަޖިލިސް މެންބަރު ހުސޭން ފަތުހީ އެވެ. އެއީ ލާމު އަތޮޅާއި ތިލަދުންމަތިން ފަޅުތަކާއި ރަށްތައް ހޯދުމުގެ ޑީލުގައި އުޅުނު ދެމީހުންނެވެ. މަލަކާއަށް އެނގިފައި އޮތްގޮތުން ނަމަ މިނިސްޓަރަށް ދިމާވި މައްސަލައަކީ އެމީހުންނާ އެކު ހެދި ޑީލުތަކެވެ. ހީވެފައި އޮތް ގޮތުން އެޑީލްތަކާއި ރައީސް އޮފީހުގެ ތެރެއިން ހިތްހަމަނުޖެހުންތަކެއް ހުރީ އެވެ. މިނިސްޓަރު ސަސްޕެންޑު ކުރައްވައި އެ މައްސަލަ ތަހުގީގު ކުރައްވަން ރައީސް ނިންމެވީ އުސޫލާ ޚިލާފަށް ކަންތައް ދާތީ އެވެ.

އުނިމާ ހަސީބާއި މެންބަރު ހުސޭން ފަތުހީ ކޮޓަރިއަށް ވެއްދުމަށް ފަހު ފުލުސް އޮފިސަރު އެނބުރި ހިނގައްޖެ އެވެ.

މަލަކާއަށް ނުވިސްނުނު ކަމަކީ ފުލުސް އޮފީހަށް ގެންގޮސް ބަންދުކޮށްފައި އިން މީހެއްގެ ގާތަށް އެ ދެމީހުން ވަންނަން ޖެހުނު ސަބަބެކެވެ. ފުލުހުންގެ އިދާރާގައި ތަހުގީގުކުރާ މައްސަލައެއްގައި ނަމަ ސުވާލު ކުރާނީ ފުލުހުންނެވެ.

ހަސީބާއި ފަތުހީ މަލާގެ ދާދި ގާތުގައި ހުރި ދެގޮނޑީގައި އިށީނެވެ.

"މަލަކާ ކިހިނެއް؟" ފުރަތަމަ ވާހަކަ ދެއްކީ ހަސީބެވެ. އެ ސުވާލަށް ދޭނެ ޖަވާބެއް މަލަކާއަކަށް ނޭނގެ އެވެ. ނުވަތަ ޖަވާބު ދޭން ބޭނުން ނުވީ އެވެ. މަލަކާ އިނީ އިސް ޖަހައިގެންނެވެ.

"އަހަރެމެންނަށް އެނގޭ މަލަކާގެ އެއްވެސް ކުށެއް ނެތްކަން" މިފަހަރު ވާހަކަ ދެއްކީ އަފީފެވެ. "އެހެންވީމާ މަލަކާ ތި ވެއްޓިފައި އިން އަނދަވަޅުން ސަލާމަތް ކޮށް ދިނުމަށް އަހަރެމެންނަށް ކުރެވުނު ކަމެއް ކޮށްދޭން ބޭނުން." އެ ހިސާބަށް ވާހަކަ ދައްކާފައި އަފީފް ހުއްޓާލި އެވެ. މަލަކާގެ ޖަވާބެއް ބޭނުން ވަނީކަން ނޭނގެ އެވެ.

އަފީފަކީ ލާމު އަތޮޅުގެ މެބްބަރެވެ. މަޖިލީހުގައި އެންމެ އަޑުގަދަ، އެންމެ ނުފޫޒު ގަދަ މެންބަރެވެ. ސަރުކާރުގެ ތެރޭގައި ނުފޫޒު ގަދަ މީހެކެވެ. ޓޫރިޒަމް މިނިސްޓަރުގެ ތިމާގެ މީހެކެވެ. ތަފާތު އެތައް ޑީލްތަކެއް މިނިސްޓްރީގެ ތެރެއިން ވަނީ އެގޮތަށް ނިމިފަ އެވެ. އެކަން އެންމެނަށް ވެސް އެނގެ އެވެ. އެންމެ ފަހުން މިނިސްޓަރު ސަސްޕެންޑް ވުމާއެކު ފަތުހީގެ ބާރު ކެނޑުނީ ކަމުގައި ބެލެވުނެވެ. އެހެންކަމުން ފުލުސް އޮފީހަށް ފަތުހީއަށް ވަދެ މަލަކާއާ ވާހަކަ ދައްކަން ފަތުހީއަށް ފުރުސަތު ލިބުނީ ކީއްވެގެންތޯ މަލަކާ ހިތާހިތާ ސުވާލު ކުރި އެވެ.

"މިކަމުގައި މަލަކާ އަހަރެމެންނަށް އެއްބާރުލުން ދޭނަންތަ؟" ހަސީބު ސުވާލުކުރި އެވެ. "މަލަކާ ސަލާމަތްކޮށް ދިނުމަށް މަސައްކަތް ކުރާއިރު މަލަކާގެ އެއްބާރުލުން ވެސް ބޭނުންވާނެ ދޯ،" ހަސީބުގެ ދޯ އަށް ދޭނެ ޖަވާބެއް މަލަކާއަކަށް ނޭނގެ އެވެ. އެންމެ ބޮޑު އޮޅުމަކީ މި ހިސާބަށް އެ ދެ މީހުންނަށް ވަދެވުނު ގޮތެކެވެ. އެފަދަ ބާރެއް އެމީހުނަށް ލިބުނު ގޮތެކެވެ.

މަލަކާ ގަސްދުކުރީ އެ މީހުންނާ ވާހަކަ ނުދައްކާށެވެ. އޭނާ ހުރީ ބަންދެއްގަ އެވެ. ފުލުހުންގެ ބަންދެއްގަ އެވެ. އެ ތާނގައި ދައްކާ ވާހަކައަކީ ކޯޓުގައި ބޭނުންކުރެވޭނެ ހެއްކެވެ. ޖެހިގެން އުޅެނީ ކޮން މައްސަލައެއްކަމާއި ބަންދުކުރީ ކޮން ކުށެއްގެ ތުހުމަތުގައި ކަން ވެސް މަލަކާއަކަށް ނާންގަ އެވެ. އެހެންކަމުން ވަކީލަކާ ނުލައި ތަހުގީގުގައި ވާހަކަ ދައްކަން ނުޖޭނެކަން މަލަކާއަށް އެނގެ އެވެ.

"މަލަކާއަކަށް ދެން އިތުރަކަށް މިރާއްޖޭގައި ވަޒީފާ އަދާކޮށްގެން އުޅެވޭނެ ހެނެއް ހިޔެއް ނުވޭ." ހަސީބު އެ ބުނި އެއްޗަކުން މަލަކާގެ މޭގަނޑު އައީ އަނގަޔަށެވެ. ކީއްވެގެންހޭ އަހާ ގޮތަށް މަލަކާ ބަލާލީ ހަސީބުގެ މޫނަށެވެ. "އަހަރެމެން މި ހުށަހަޅަނީ މަލަކާ ބޭރަށް ދާން. ރައީސް ވެސް އެގޮތަށް ލަފާއެރުވި. ބޭނުމިއްޔާ ތުރުކީއަށް ނޫނީ މެލޭޝިއާއަށް ދެވިދާނެ،" ހަސީބުގެ ވާހަކަ ނިންމާލީ ފަތުހީގެ މޫނަށް ބަލަމުންނެވެ. ފަތުހީ އެއްބަސްވުމުގެ ގޮތުން ބޯ ޖަހާލި އެވެ.

"ވާން ޖެހޭ ގޮތަކީ މަލާގެ އަތުގައި ހުރި ޑޮކިއުމަންޓްތައް ސޭވްކޮށްފައި ހުރި ކްލައުޑްގެ ޕާސްވޯޑް ދޭންވީ. އަހަރެމެން ހަމައެކަނި ކުރާނެ ކަމަކީ އެ ޑޮކިއުމެންޓްތައް ޑިލީޓު ކުރެވުނު ކަން ޔަގީންކުރުން. އެ ހިސާބުން މަލަކާއަކީ މިނިވަނެއް. ބޭނުން ވީމަ ބޭރުގެ އެމްބަސީއަކަށް ފޮނުވާ ދޭނަން."

މަލަކާގެ އަނގައަކުން ބަހެއް ނުނިކުތެވެ. އިސް ޖަހައިގެން ހުރީ އެވެ. ހަސީބާއި ފަތުހީ އެމީހުންގެ ހުށަހެޅުން ތަކުރާރު ކުރުމަށްފަހު ވެސް މަލާގެ ފުށުން ބަހެއް ނުލިބުމުން އިތުރަށް ވިސްނާލާން ފުރުސަތު ދެނީ ކަމަށް ބުނެފައި ނިކުމެގެން ހިނގައްޖެ އެވެ. (ނުނިމޭ)