އީރާނާ ދެކޮޅަށް އެމެރިކާއިން ދޭ ބައެއް އަސްކަރީ ހަމަލާތަކުގައި އިނގިރޭސިވިލާތުގެ އަސްކަރީ މަރުކަޒުތައް ބޭނުންކުރުމުގެ ހުއްދަ، އެ ގައުމުގެ އާ ބޮޑުވަޒީރު އެންޑީ ބާންހަމް ދެއްވައިފި އެވެ. މިއީ ކުރީގެ ބޮޑުވަޒީރު ކިއާ ސްޓާމާ ގެންގުޅުއްވި ސިޔާސަތުތައް ދެމެހެއްޓުމުގެ ގޮތުން ނިންމެވި ނިންމުމެކެވެ. އެމެރިކާގެ ރައީސް ޑޮނަލްޑް ޓްރަމްޕް ހަނގުރާމައިގެ ހަރަކާތްތައް ވަރުގަދަކުރައްވަމުން ގެންދަވާ ދަނޑިވަޅެއްގައި، އިނގިރޭސިވިލާތުން މި ނިންމުން ނިންމާފައިވަނީ އެއީ އީރާނުގެ ފަރާތުން ކުރިމަތިވެދާނެ ހަމަލާތަކުން ދިފާއުވުމަށް ދޭ ދިފާއީ ހަމަލާތަކެއް ކަމަށް ބުނެއެވެ.

މި މައްސަލައާ ގުޅުންހުރި ފަރާތްތަކުން މައުލޫމާތު ދޭ ގޮތުގައި، އެމެރިކާއިން މި މަހު އަސްކަރީ އޮޕަރޭޝަންތައް އަލުން ފެށުމާ ގުޅިގެން، ސްޓާމާ ވަނީ މިދިޔަ ހުކުރު ދުވަހު އިސް ވަޒީރުންނާއި އޮފިޝަލުންނާ ބައްދަލުކުރައްވައި އިނގިރޭސިވިލާތުގެ ސިޔާސަތާ މެދު މަޝްވަރާ ކުރައްވާފަ އެވެ. އެ ބައްދަލުވުމުގައި ނިންމާފައިވަނީ އިންޑިއާ ކަނޑުގައި އޮންނަ ޑިއޭގޯ ގާސިއާ މަރުކަޒާއި، އިނގިރޭސިވިލާތުގެ ގްލޮސްޓާޝަޔަރުގައި ހުންނަ އާރްއޭއެފް ފެއާފޯޑް މަރުކަޒު އެމެރިކާގެ އަސްކަރީ މަތިންދާބޯޓުތަކަށް ބޭނުންކުރެވޭނެ ކަމަށެވެ. މިއީ އީރާނުގެ މިސައިލް ނުރައްކަލާ ދެކޮޅަށް މަސައްކަތް ކުރުމަށާއި ހޮރްމޫޒް ކަނޑުއޮޅިއަށް އަމާޒުކޮށް ދޭ ހަމަލާތައް ހުއްޓުވުމަށް ކުރާ މަސައްކަތްތަކަށެވެ.

މިދިޔަ ހޯމަ ދުވަހު ބޮޑުވަޒީރުކަމާ ހަވާލުވެވަޑައިގަތް ބާންހަމްއަށް މި މަޝްވަރާތަކުގެ މައުލޫމާތު އެރުވުމުން، އޭނާ ވަނީ އެ ނިންމުމަށް ތާއީދުކުރައްވާފަ އެވެ. އެހެންކަމުން، އެމެރިކާއިން މިހާރު ކުރިއަށްގެންދާ އަސްކަރީ އޮޕަރޭޝަންތަކުގައި އިނގިރޭސިވިލާތުގެ މި މަރުކަޒުތައް ބޭނުންކުރާނެ ކަމަށް ބެލެވެއެވެ.

އެމެރިކާގެ ސެންޓްރަލް ކޮމާންޑުން ހާމަކޮށްފައިވާ ގޮތުގައި، ރޭގަނޑުގެ ވަގުތެއްގައި އެމެރިކާއިން ވަނީ އީރާނުގެ އަސްކަރީ ކޮމާންޑް ސެންޓަރުތަކަށާއި، މިސައިލް ފޮނުވާ ތަންތަނުގެ އިތުރުން ވައިގެ ދިފާއީ ނިޒާމުތަކަށް އަމާޒުކޮށް ހަމަލާދީފަ އެވެ.

ނަމަވެސް، މި ނިންމުމުގެ ސަބަބުން ސިޔާސީ ގޮތުން ބޮޑެތި ގޮންޖެހުންތަކެއް ވަނީ ކުރިމަތިވެފަ އެވެ. އިނގިރޭސިވިލާތުގެ ވާތުފިޔައިގެ ސިޔާސީ ފަރާތްތަކުން ދަނީ އެ ގައުމުގެ މަރުކަޒުތައް ބޭނުންކުރުން ހުއްދަ ނުދިނުމަށް ގޮވާލަމުންނެވެ. އަނެއްކޮޅުން، ރައީސް ޓްރަމްޕް ދަނީ ހަނގުރާމައިގައި އިނގިރޭސިވިލާތުގެ ދައުރު ފުޅާކުރުމަށް ބާރުއަޅަމުންނެވެ. ވީޑިއޯ ކޯލެއް މެދުވެރިކޮށް ޓްރަމްޕް ދެއްވި ބައެއް އިންޒާރުތަކުގައި، އީރާނުގެ އާންމު އުމްރާނީ ވަސީލަތްތަކަށް (ފާލަންތަކާއި އިންޖީނުގެތަކަށް) ހަމަލާދޭނެ ކަމަށް ވިދާޅުވުމާ ގުޅިގެން އިނގިރޭސި އޮފިޝަލުން ވަނީ ކަންބޮޑުވުން ފާޅުކުރައްވާފަ އެވެ. އެއީ އެފަދަ ހަމަލާތަކުގެ ސަބަބުން ކުރިމަތިވެދާނެ ގާނޫނީ މައްސަލަތަކާ ހުރެއެވެ.

ގްރީން ޕާޓީ އާއި ލިބަރަލް ޑިމޮކްރެޓުން ބާންހަމްގެ މި ނިންމުމަށް ވަރަށް ބޮޑަށް ދަނީ ފާޑުކިޔަމުންނެވެ. އެ ޕާޓީތަކުން ދެކޭ ގޮތުގައި މިކަމުގެ ސަބަބުން ހަނގުރާމައިގެ ކުށްތަކުގައި އިނގިރޭސިވިލާތުގެ ބައިވެރިވުން އޮތްކަމަށް ބެލެވޭނެއެވެ.

އާ ބޮޑުވަޒީރުގެ މި ނިންމުމާ ގުޅިގެން ޓްރަމްޕް ވަނީ ބާންހަމްއާ މެދު ހިތްހަމަޖެހުން ފާޅުކުރައްވާފަ އެވެ. ދެ ބޭފުޅުން ފޯނުން ކުރެއްވި މަޝްވަރާތަކުގައި ހޮރްމޫޒް ކަނޑުއޮޅީގެ ސަލާމަތާއި ރައްކާތެރިކަން ކަށަވަރުކުރުމާ ބެހޭގޮތުން ވާހަކަދެއްކެވި އެވެ. ޓްރަމްޕްގެ ޓްރުތު ސޯޝަލް ގައި ލިޔުއްވާފައިވާ ގޮތުގައި، މި ފޯނު ކޯލަކީ ވަރަށް ކާމިޔާބު އަދި ޝައުގުވެރި މަޝްވަރާއެކެވެ. އޭގެ ތެރޭގައި ވިޔަފާރި އާއި، އަސްކަރީ އިއްތިހާދާއި، ކަނޑުއޮޅި ސާފުކުރުމުގެ މަސައްކަތްތަކާ ބެހޭގޮތުން ވާހަކަދެކެވުނު ކަމަށް އޭނާ ވިދާޅުވި އެވެ.