މިދިޔަ ބުދަ ދުވަހުގެ ރޜގެ ވަގުތެއްގައި އަލިފާން ރޯވި ހޮޅުދޫ ބޯޓުން ގެއްލުނު އަލީ މުޝްފިގު ޝަރީފް ހޯދުމަށް ޑްރޯން ބޭނުންކޮށްގެން 5000 ސްކެއާ ކިލޯމީޓަރުގެ ސަރަހައްދެއް ބަލައިފި އެވެ.

އެ ބޯޓުގައި ރޯވީ ތ. ހިރިލަންދުއިން ފުރައިގެން ދަތުރުކުރަމުން ދަނިކޮށް ބުދަ ދުވަހުގެ ރޭ 9:07ގަ އެވެ.

އެމްއެންޑީއެފް އިން ބުނީ ޑައިވް ކުރުމުގެ އިތުރުން ސާފޭސް ސާޗްގެ ގޮތުގައި ވެސް ފާއިތުވި 24 ގަޑިއިރު 133 ސްކުއެއާ ނޯޓިކަލް މޭލް ބަލާފައިވާ ކަމަށެވެ. އަދި އަދި ޑައިވްކޮށްގެން 143,880 އަކަމީޓަރު ބަލާފައިވެ އެވެ. ނަމަވެސް އަދިވެސް އޭނާ ނުފެނެ އެވެ.

އެ ބޯޓުން 11 ދިވެހީންނާއި ހަތް ބިދޭސީން ދަތުރުކުރި އެވެ. އޭގެ ތެރެއިން ގެއްލުނީ މުޝްފިގު އެކަންޏެވެ.

މުޝްފިގުގެ ކޮއްކޮ ވެސް އެ ބޯޓުން އޭނައާ އެކު ދަތުރުކުރި އެވެ. އޭނާ ބުނީ ބޯޓުގައި ރޯވުމުން ސަލާމަތްވާން ވެގެން ދެ މީހުންނަށް ދެ ލައިފްޖެކެޓް ހިފައިގެން އައީ ބޭބެ ކަމަށެވެ. އަދި މުޝްފިގު ލައިފްޖެކެޓް އަޅައިގެން ހުއްޓައި އެ ބޯޓްގައި މަސައްކަތްކުރާ ބިދޭސީއަކު އައިސް ލައިފްޖެކެޓް ޖަހައިގަނެގެން ދިޔައީ ކަމަށް އޭނާ ބުންޏެވެ.

އެ ބިދޭސީ މީހާ ލައިފްޖެކެޓް ޖަހައިގަތުމުން މުޝްފިގުގެ ގައިގައި ހިފައިގެން ދެބެއިން ކަނޑަށް ފުންމާލީއެވެ. އެއަށްފަހު އޭނަގެ ލައިފްޖެކެޓް ނަގައި ބޭބެގެ ގައިގައި އަޅުވަން އުޅެނިކޮށް މޫނަށް އަނދިރިވެ ފަހުން ބޭބެއަށް ވީގޮތެއް ނޭނގުނު ކަމަށް މުޝްފިގުގެ ކޮއްކޮ ބުންޏެވެ.