އިންސާނުން ދުނިޔެއަށް އުފަންވަނީ ވަކި ޖިންސަކަށް ނިސްބަތް ވެގެންނެވެ. ފިރިހެން ދަރިއެކެވެ. ނުވަތަ އަންހެން ދަރިއެކެވެ. އިންސާނުންނާ ޚިލާފަށް ބައެއް ޖަނަވާރުންނަށް ވަރަށް ހައިރާންކުރުވަނިވި ކުޅަދާނަކަމެއް ލިބިގެންވެ އެވެ. އެއީ ހަލާތާ ގުޅުވައި ޖިންސު ބަދަލުކޮށްލުމުގެ ކުޅަދާނަކަމެވެ.
ބައެއް ޖަނަވާރުން އުފަން ވަނީ ވަކި ޖިންސަކަށް ނިސްބަތް ނުވެ އެވެ. ވީމާ އެފަދަ ޖަނަވާރުން އެސޮރުމެންގެ އުމުރުން އެއްފަހަރު ޖިންސު ބަދަލުކޮށްލަ އެވެ. އަނެއްބައި ޖަނަވާރުން އެ ދިރިއުޅޭ މާހައުލުގެ ފިނިހޫނުމިނާއި، ބޭރު ތެރޭގައި ގެންގުޅެންޖެހޭ ހަރަކާތްތަކަށް ރިއާޔަތްކޮށް ވެސް ވަކި ޖިންސެއް ޚިޔާރުކުރެ އެވެ.
މިފަދަ ކަންކަމަކީ ޖަނަވާރުން ދިރާސާކުރައްވާ ބޭފުޅުން ވިދާޅުވާ ގޮތުގައި ގުދުރަތީ ގޮތުން އެސޮރުމެންގެ ނަސްލު ފަނާވުން ހުއްޓުމަށްޓައި އެސޮރުމެންގެ ކިބައިގައި ލައްވާފައިވާ ކަމެކެވެ. އެގޮތުން އެސޮރުމެންގެ އާބާދީ ވަކި މިންވަރެއްގައި ހިފެހެއްޓުމާއި، ތިމާވެށިން އަންނަ ނުރައްކާތަކުން ސަލާމަތްވެ ތިބުމަށާއި، އަދި ނަސްލު ގިނަވެ، އާލާވާ މިންވަރު ކުރިއަށް ގެންދިއުމަށެވެ.
މިބަދަލުގެ ހަގީގަތް ސައިންސް ވެރިންނަށް ސީދާ ދެނެގަނެވިފައެއް ނުވެ އެވެ. އެހެން ނަމަވެސް ސްޓްރެސްގެ ސަބަބުން ހޯމޯން ލެވެލްއަށް ބަދަލު އައުމަކީ އޭގެ ސަބަބަކަށް ވެދާނެ ކަމަށް އެ ފަރާތުން ލަފާކުރެ އެވެ. މިސާލަކަށް މާހައުލަށް ބަދަލެއް އަތުވެއްޖެކަން ދެނެގަނެވުމުން ސްޓްރެސް ލެވެލް މަތިވެ، ސްޓްރެސް ހޯމޯން "ކޯޓިސޯލް"، އެ ޖަނަވާރެއްގެ ޖިންސް ކަނޑައަޅާ ހޯމޯންގެ މިންވަރު މަތިކުރުމާއި ނުވަތަ ދަށްކޮށް އޭގެ މަސައްކަތަށް ބަދަލު ގެންނަނީ ކަމަށް އެފަރާތްތަކުން ލަފާކުރެ އެވެ.
އެގޮތުން ތިމާވެއްޓާ ރިއާޔަތްކޮށް އެ އެއްޗެއް ޚިޔާރުކުރާ ޖިންސު ކަނޑައަޅާ ބައެއް ޖަނަވާރުން ތެރޭގައި ހިމެނޭ ފުރަތަމަ ޖަނަވާރަކީ ކްލައުންފިޝްގެ ނަމުން ނަން ދެވިފައިވާ މަހެކެވެ. މަޝްހޫރު ނީމޯ ކާޓޫނުގައި އެ ދައްކައިދެނީ ކްލައުން ފިޝްއެކެވެ. ކްލައުން މަސް ދުނިޔެއަށް އުފަން ވަނީ ފިރިހެން ޖިންސުގަ އެވެ. ނަމަވެސް އުމުރުގެ ވަކި ހިސާބަކުން އަންހެން މަހަކަށް ބަދަލުވެ އެވެ. މި ބަދަލުވުމަށް ސައިންސްވެރިން ދީފައިވާ ނަމަކީ "ސިކުއެންޝަލް ހާމާފްރޮޓިޑިސްމް" އެވެ.
ކްލައުން މަސް އާންމުކޮށް ދިރިއުޅެނީ އަންހެން ކްލައުން މަހެއްގެ ބާރުގެ ދަށުގައިވާ ގްރޫޕްތަކުގަ އެވެ. ކޮންމެވެސް ގޮތަކުން އެ ގްރޫޕުގެ އަންހެން ލީޑަރު ގެއްލިއްޖެނަމަ އެ ގްރޫޕްގެ ތެރޭގައި ހިމެނޭ އެންމެ ބޮޑު ފިރިހެން މަސް އަންހެން މަހަކަށް ބަދަލުވެ، ގްރޫޕްގެ ކޮންޓްރޯލް ނަގަ އެވެ. ކްލައުން މަސްތަކުގެ ޖިންސު މިގޮތަށް ބަދަލުކޮށްލުމުގެ ފަސޭހަކަށް ލިބިފައިވުމުން އެސޮރުމެންގެ ދިރިއުޅުމަށް ހަމަޖެހުން ލިބިފައިވެ އެވެ. އަދި ނަސްލު ދެމެހެއްޓެ އެވެ.
ރެޕްޓައިލްގެ އާއިލާއަށް ނިސްބަތްވާ "ބިއަޑެޑް ޑްރޭގަން" އަކީވެސް ޖިންސު ބަދަލު ކުރުމުގެ ބާރު ގުދުރަތުން ދެއްވާފައިވާ ޖަނަވާރެކެވެ. އާންމުކޮށް ރެޕްޓައިލް އާއިލާއަކީ ބިސްއަޅައި، ބިސްފީކޮށްގެން އޭތީގެ ނަސްލު ދަމަހައްޓާ ޖަނަވާރެކެވެ. އެހެން ނަމަވެސް ބިއަޑެޑް ޑްރޭގަން ނަސްލު ދެމެހެއްޓުމަށްޓަކައި ޖެނެޓިކްސް އަދި ތިމާވެއްޓަށް އަންނަ ބަދަލުތަކަށް ރިއާޔަތް ކުރެ އެވެ. އޭތީގެ ޖިންސު ކަނޑައެޅިފައި ވަނީ ކްރޮމޮސޯމްސްއިން ނަމަވެސް ފިނިހޫނުމިން 32 ޑިގްރީއަށް ވުރެ މައްޗަށް ދާނަމަ، ފިރިހެން ޑްރޭގަން އަންހެން ޑްރޭގަންއަކަށް ބަދަލުވެ އެވެ.
ސައިންސުވެރިން ވިދާޅުވާގޮތުގައި ހޫނުމިން މައްޗަށް ދިއުމުން ފިރިހެން ޑްރޭގަންތައް އަންހެން ޑްރޭގަންތަކަށް ބަދަލުވެލަނީ ދަތި އުނދަގޫ ހާލަތް މެދުވެރިވުމުން ދިރިހުރުމަށް ބޭނުން ވާތީ އެވެ.
ޑިނގާގެ ބާވަތެއް ކަމުގައި "ހަމްޕީ ޝްރިމްޕް "އަކީ ވެސް ވަރަށް އާދަޔާޚިލާފު ދިރިއުޅުމެއް އުޅޭ ޖަނަވާރެކެވެ. މި ޑިނގާ އުފަން ވަނީ ފިރިހެން ޑިނގާއެއްގެ ގޮތުގަ އެވެ. ފިރިހެން ޑިނގާއެއްގެ ގޮތުގައި ހުރެ ކުދި ދަރިފަނި އުފައްދަ އެވެ. ބޮޑުވުމުން އަންހެން ޑިނގާއަކަށް ބަދަލުވެ އެވެ. އަދި 3،000 ބިސް އުފައްދަ އެވެ. އެއަށް ފަހު އަންހެން ޑިނގާ މަރުވެ އެވެ. ޖިންސަށް މިއަންނަ ބަދަލުގެ ސަބަބުން ޑިނގާގެ ދަރިފަސްކޮޅު ގިނަވުމަށް މަގުފަހިވެ އެވެ. މި ބަދަލު ޑިނގާއަށް އަންނަނީ އުފަންވާތާ ދެވަނަ އަހަރެވެ.
ފަރުގައި ދިރިއުޅޭ ފަރުމަހުގެ ބާވަތެއް ކަމަށްވާ "ބްލޫހެޑް ވްރާސީ" ޖިންސު ބަދަލުވެގެންދަނީ އެހެން ޖަނަވާރުންނާ މުޅިން ތަފާތު ގޮތަކަށެވެ. އެއީ ކޮންމެހެން ބޭނުންވެއްޖެ ހިނދެއްގައި އަންހެން މަހަކުން ފިރިހެން މަހަކަށް ބަދަލުވެގެންނެވެ. މި މަސްތައް ދިރިއުޅެނީ ގްރޫޕް ހަދައިގެން އަންހެން މަސްތަކެއްގެ ގުރޫފެއްގައި ފިރިހެން މަހެއް ލީޑް ނަގައިގެންނެވެ. ފިރިހެން ލީޑަރު މަރުވެއްޖެ ނަމަ، އެންމެ ބޮޑު އަންހެން މަސް 10 ވަރަކަށް ދުވަހުގެ ތެރޭގައި ފިރިހެން މަހަކަށް ބަދަލުވެ އެވެ.
މި ބަދަލު އައުމުގައި ޖިންސީ ގުނަވަން ވެސް ބަދަލުވެ އެވެ. މި އަވަސް ބަދަލުގެ ސަބަބުން ގްރޫޕްގައި ހަމަޖެހުން ދެމެހެއްޓެ އެވެ. އަދި ދަރިމައިވާ މިންވަރު ވަކި ކޮންޓްރޯލެއްގައި ހިފެހެއްޓެ އެވެ. ބޮކަކީ ވެސް ޖިންސު ބަދަލުވުން އޭގެ ތަބީއަތުގައި ލައްވާފައިވާ ޖަނަވާރެކެވެ.
ފުރިހަމަ ބޮކަކަށް މުޅިން ބަދަލު ނުވެ އޮންނަ ޓެޑްޕޯލް މަރުހަލާގައި ބޮކަށް ވެސް ޖިންސު ބަދަލުކުރެ އެވެ. މި ބަދަލު ގެންނަނީ ތިމާވެއްޓަށް އަންނަ ބަދަލުތަކާ ގުޅިގެން އޭތި ދިރިއުޅޭ މާހައުލަށް ހޭނެން ކަމުގައި ސައިންސުވެރިން ބުނެ އެވެ. މި ކުޅަދާނަކަމާ ހުރެ ބޮކުގެ އާބާދީ ވަކި ވަރެއްގައި ހިފެހެއްޓުމަށް އެހީ ވެދެ އެވެ.
ޖަނަވާރުންގެ ތެރޭގައި ޖިންސު ބަދަލުވެގެން ދަނީ އެކި ހާލަތް މެދުވެރިވެގެންނެވެ. އޭގެ ސަބަބުން އެ ޖަނަވާރެއްގެ ނަސްލު ހިފެހެއްޓުމަށް އެހީތެރިވެ އެވެ.