ބޭވަފާތެރިވުމަކީ ކޮށްފައިވާ އަހުދަކަށް ޚިޔާނާތްތެރިވުމެވެ. އެކަމަކީ ކައިވެނި ކުރާނެ ކަމަށް ބުނެ އެކަން ހުއްޓާލުން ކަމުގައި ވިއަސް، ނުވަތަ ކައިވެނި މަތީ ހުރެ އެހެން ގުޅުމެއް ފެށުން ވިއަސްމެ އެވެ. އެކަކު އަނެކަކަށް ބޭވަފާތެރިވުމަކީ މިއަދު އާންމު ކަމެކެވެ. އެއްވެސް ހާލަތެއްގައި ބައިވެރިޔާ ބޭވަފާތެރިވެއްޖެ ނަމަ ދެން އުފެދޭނެ ސުވާލަކީ އެ ގުޅުމުގައި މަޑުކުރަންވީތޯ ނުވަތަ ދެން ދުވަހަކު ވެސް ބައިވެރިޔާ އާ ދޭތެރޭ އިތުބާރު ކުރެވިދާނެތޯ ނުވަތަ މުޅިން ދުރަށް ދާންވީތޯ އެވެ.
ބައެއް މީހުންނަށް އެއީ މަޖާކަމެއް
ކައިވެނީގެ ބޭރުން ނަހަމަ ގުޅުން ބާއްވަން އާދަވެފައިވާ މީހާއަށް އޭނާގެ ބައިވެރިޔާއަށް ކެހި ދިނުމަކީ ލިބޭ ހިތަހަމަޖެހުމެވެ. އުފަލެކެވެ. މަޖާކަމެކެވެ. އުފާވެރި ދިރިއުޅުމެއް އުޅޭ ދެމަފިންގެ ދެމެދުގައި ވެސް ބޭވަތެރިވުމަކީ އާންމު ކަމަކަށް ވެއްޖެ އެވެ. ބޭވަފާތެރި ވެވުނު މީހާއަށް އޭގެ ސަބަބުން އެތައް ނޭދެވޭ އަސަރުތަކެއް ކުރެ އެވެ. އޭގެ ތެރޭގައި ރުޅިއައުން، ވާނުވާ ނޭނގުން އަދި ހިތްދަތިވުމާއި ނަފްސާނީ ގޮތުން ބަލިކަށިވުމެވެ.
ބައިވެރިޔާއަށް ބޭވަފާތެރި ވެވެނީ ކީއްވެ؟
ކައިވެންޏެއްގައި އެކަކު އަނެކަކަށް ބޭވަފާތެރި ވަނީ އެކަމުގެ އާޚިރު ނަތީޖާ ނޭނގި ހުރެ އެއް ނޫނެވެ. ދެމަފިރިންގެ ތެރެއިން އެކަކު ވެސް ނާޖާއިޒް ގުޅުމެއް ބާއްވާނަމަ، އޭގެ އާޚިރު ނަތީޖާއަށް ވާނީ ވަރިވުން، ނުވަތަ ކައިވެންޏަށް ލިބިފައިވާ ދަރިންނަށް ނިކަމެތިކަން ލިބުން އަދި ހާސްކަމާއި ހިތްހަމަނުޖެހުން އަދި ބައެއް ހާލަތުގައި ޖިސްމާނީ ގެއްލުންކަން އެ މީހުންނަށް އޮޅިފައެއް ނުވެ އެވެ. އެހެން ނަމަވެސް ހަމަމަގުން ކައްސާލައިގެން ދިއުމުގެ އަސްލަކީ ކޮބާ ބާވަ އެވެ؟
މީހުން ބޭވަފާތެރި ވަނީ ކީއްވެތޯ ބެލުމަށް ކުރެވުނު ސާވޭއަކުން ދައްކަގޮތުގައި އާންމުކޮށް މީހުން ބައިވެރިޔާއަށް ބޭވަފާތެރިވާ ސަބަބުތަކުގެ ތެރޭގައި ހިމެނެނީ ލޯބި ނުވުން، ތަފާތު މީހުން ދަސްކުރަން ބޭނުންވުން، ބައިވެރިޔާގެ ފަރާތުން އަޅާލުން ނުލިބުމެވެ. ހާލަތު ތަންދޭ ގޮތުން ވެސް އަދި ބައިވެރިޔާ ދެކެ ރުޅިއައުމުގެ ސަބަބުން ވެސް އެ މީހަކު އެހެން ގަލަކަށް ޖައްސަން މެދުވެރިވެ އެވެ.
ގިނައިން ބޭވަފާތެރިވަނީ ކާކު؟
އާންމުގޮތެއްގައި އަންހެނުންނަށް ވުރެ ފިރިހެނުން ބޭވަފާތެރި ވުމުގައި ކުރީގައި އުޅޭ ކަމަށް ބެލެވިފައިވެ އެވެ. އެއީ ރިޕޯޓް ކުރާ ތަފާސް ހިސާބަށް ބެލުމަށްފަހު އެވެ. ނަމަވެސް ފަހުގެ ދިރާސާތަކުން ބޭވަފާތެރިވުމާއި ނަހަމަގުޅުން ގެންގުޅުމުގައި ފިރިހެނުންނާ ދާދި އެއްވަރަކަށް އަންހެނުން ވެސް ޝާމިލްވާ ކަމަށް ދައްކަ އެވެ.
ބޭވަފާތެރިވެވުމަށް ފަހު އަލުން ބައިވެރިޔާއާ ގުޅުން ބަދަހި ކުރެވިދާނެތަ؟
ކައިވެނިން ބޭރު ގުޅުމެއް ބޭއްވުނު ނަމަ ކުރީގެ ގުޅުން އަނެއްކާ އިއާދަކުރުމަކީ ކުރެވިދާނެ ކަމެއް ކަމަށް ތަޖުރިބާކާރުން ބުނެ އެވެ. އެކަމަށްޓަކައި ކެތްތެރިކަމާއި ތެދުވެރިކަމުގެ އިތުރުން ހިތްވަރެއް ވެސް ބޭނުންވާނެ އެވެ. ފުރަތަމަ ކަމަކަށް ބޭވަފާތެރި ވެވުނު ސަބަބު ވަރަށް ތެދުވެރިކަމާއެކު ބައިވެރިޔާއަށް ބުނެ ދޭށެވެ.
"ޓެމްޕްޓޭޝަން" ތައް ނުވަތަ އެ މަގަށް ހިތްޖެހޭ ފަދަ ހުރިހާ ކަމަކުން ދުރުވެލާށެވެ. ކުރެވުނު ކަންތަކާ ދޭތެރޭ ހިތާމަކޮށް ބައިވެރިޔާއާއެކު ގުޅުން ރަނގަޅު ކުރަން މަސައްކަތް ކުރާށެވެ. އަލުން ގުޅުން ރަނގަޅުކުރަން ކުރާ މަސައްކަތުގައި އިތުބާރު ދެމެހެއްޓުމަށް މަސައްކަތް ކުރުން މުހިންމެވެ. އެ ކަމަށްޓަކައި ބައިވެރިޔާއަށް ހިތުގައި ހިނގާ އިހްސާސްތައް ކިޔައި ދިނުން ގިނަ ކުރާށެވެ. އަދި ވާހަކަ ދެއްކުން ގިނަ ކުރާށެވެ. ފަހު ކަމަކަށް ތެރަޕީއެއް ނެގުމަކީ ވެސް ކުރެވިދާނެ ކަމެކެވެ.
ބޭވަފާތެރި ވުމަކީ ޚިޔާނާތެކެވެ. ކުޑަ ހިނދުކޮޅެއްގެ ހިތްހަމަޖެހުމެކެވެ. ނަމަވެސް އަނބުރާ ބައިވެރިޔާއާ އެކު އޮތް ގުޅުން އިއާދަ ކުރުމަކީ ކުރެވިދާނެ ކަމެކެވެ.