ބޮލީވުޑްގެ މަޝްހޫރު ތަރި ވަރުން ދަވަން އިންޑިއާގެ މެޓްރޯ ރޭލެއްގެ ތެރޭގައި ޕުލްއަޕް ކަސްރަތުތަކެއް ހެދުމުން ކަމާބެހޭ އިދާރާއިން އޭނާއަށް އިންޒާރު ދީފި އެވެ.

މިފަހުން ސޯޝަލް މީޑިއާގައި ދައުރުވި ވީޑިއޯއެއްގައި ފެންނަނީ ރޭލުގައި ކޮޅަށް ހުންނައިރު ހިފަހައްޓަން އެލުވާފައި ހުރި އަތްގަނޑެއްގެ އެހީގައި ޕުލްއަޕް ހަދާ މަންޒަރެވެ.

ވަރުންގެ ފަހަތުން ރޭލުގައި ހުރި އެހެން މީހަކު ވެސް ޕުލްއަޕް ހަދަން ފަށާއިރު އިތުރު މީހުންތަކެއް އެ މަންޒަރު ބަލަން ވަށައިގެން ތިބޭ މަންޒަރު ވެސް ވީޑިއޯއިން ފެނެ އެވެ.

މި ވީޑިއޯ ވައިރަލް ވުމާއެކު މުމްބާއީގެ މެޓްރޯ ބަލަހައްޓާ އިދާރާއިން ވަރުންއަށް ދިން އިންޒާރުގައި ބުނެފައިވަނީ ރޭލުގައި ދަތުރުކުރާ އެހެން ފަސިންޖަރުންނަށް ގެއްލުން ލިބޭ ފަދަ އަމަލެއް ހިންގުމަކީ ޖޫރިމަނާ ނުވަތަ ޖަލު ހުކުމެއް ވެސް އަތުވެދާނެ ކަމެއް ކަމަށެވެ.

އެހެން ނަމަވެސް ވަރުންއަށް ދީފައިވަނީ އިންޒާރެއް ކަމަށާއި އޭނާއަށް އެއްވެސް ފިޔަވަޅެއް އަޅާފައިނުވާ ކަމަށް އެ އިދާރާއިން ބުނެފައިވެ އެވެ.

މިއާއެކު ގިނަ ބަޔަކު އަންނަނީ ވަރުންގެ އެ އަމަލަށް ފާޑުކިޔައި ބޮލީވުޑްގެ ތަރިއަކަށް ވީތީ ލުއި ނުދީ ގާނޫނާ އެއްގޮތްވާ ގޮތުގެ މަތިން ފިޔަވަޅު އެޅުމަށް އިދާރާތަކަށް ގޮވާލަމުންނެވެ.