ހިންދޫ ދީނުގެ ޖަޒްބާތުތަކަށް ބޭއިހުތިރާމްކުރި ކަމަށް ބުނެ ބޮލީވުޑްގެ މަޝްހޫރު އެކްޓަރު ރަންވީރު ސިންހްއާ ދެކޮޅަށް ފުލުހުންނަށް މައްސަލަ ހުށައަޅައިފި އެވެ..

އިންޑިއާގެ ހަބަރުތަކުން ބުނާ ގޮތުގައި މިފަހުން ރަންވީރު ދިޔަ އިވެންޓެއްގައި އޭނާ ވަނީ ހިންދޫ ދީނުގެ ބައެއް ކަންކަމަށް ފުރައްސާރަ އަމާޒުވާ ގޮތަށް އަމަލު ކޮށްފަ އެވެ.

މިހާރު ސޯޝަލް މީޑިއާގައި ދައުރުވަމުން އަންނަ އެ ވީޑިއޯގައި ފެންނަނީ އިންޑިއާގެ ފިލްމެއް ކަމަށްވާ ކަންޓަރާގެ މަންޒަރެއް ރަންވީރު ނަކަލުކުރާ މަންޒަރެވެ.

ބެންގަލޫރުގެ ޕޮލިސް ސްޓޭޝަނަށް ހުށައެޅި އެ މައްސަލަ ހުށައަޅާފައި ވަނީ ވެސް އެ ސިޓީގައި މަސައްކަތްކުރާ ވަކީލެއް ކަމަށް ރިޕޯޓުތައް ބުނެ އެވެ.

މިކަމާ ބެހޭގޮތުން އިންޑިއާގެ ފުލުހުންގެ އިދާރާގެ ބަހެއް ލިބިފައިނުވާއިރު މައްސަލަ ކޯޓަށް ހުށައަޅާނެ ކަމެއް ނުވަތަ ނޫން ކަމެއް ވެސް އަދި ނޭނގެ އެވެ.

ރަންވީރުގެ ފިލްމީ މަސައްކަތްތަކަށް ބަލާއިރު އޭނާ އެންމެ ފަހުން ފެނިގެންދިޔައީ މިފަހުން ރިލީޒްކުރި ފިލްމު "ދުރަންދަރް"އިންނެވެ. އެ ފިލްމަށް އާއްމުންގެ ބޮޑު ތަރުހީބެއް ލިބުނެވެ.