'އަލް އަބްރާރު ޕްރައިވެޓް ލިމިޓެޑް' ގްރޫޕުން 110 މީހަކު އުމްރާއަށް ގެންދަން ފައިސާ ނަގާ ހުރިހާ އިންތިޒާމުތަކެއް ހަމަޖެއްސުމަށް ފަހު، ފަހު ވަގުތު ދަތުރު ކެންސަލްކުރި މައްސަލަ ފުލުހުން ބަލަންފަށައިފި އެވެ.

މި ދަތުރުގައި 110 މީހުން ފުރަން އޮތް އިރު، އޭގެން ކޮންމެ މީހަކު ވަނީ 45،000 ރުފިޔާ ދައްކާފަ އެވެ.

'އަލް އަބްރާރު ޕްރައިވެޓް ލިމިޓެޑް' ގްރޫޕާ އެކު 110 މީހުން އުމްރާއަށް ފުރަން ހަމަޖެހިފައި އޮތީ ރޭގައެވެ. ނަމަވެސް ފުރުން ކެންސަލްކުރީ އެންމެ ފަހުވަގުތު ގައި ކަމަށް އެ ދަތުރުގައި އުމްރާއަށް ދިއުމަށް ފައިސާ ދައްކާފައިވާ ފަރާތްތަކުން ބުނެ އެވެ.

މި މައްސަލަ މިހާރު އިސްލާމިކް މިނިސްރީގެ ސަމާލުކަމަށް އައިސްފައިވާއިރު، މިހާރުދަނީ އެކަން ހިނގި ގޮތް ބަލަމުން ކަމަށް އެ މިނިސްޓްރީން ބުނެ އެވެ.

ފުލުހުން ބުނީ، ރޯދަމަހު އުމްރާއަށް މީހުން ގެންދިޔުމަށްޓަކައި ގުރޫޕަކުން ފައިސާ ނެގުމަށް ފަހު ދަތުރު ކެންސަލްކޮށްފައިވާ ކަމުގެ ޝަކުވާ މިއަދު ފުލުހުންނަށް ހުށަހަޅައިފައިވާ ކަމަށެވެ. އެކަމާ ގުޅިގެން ބަލަން ޖެހޭ ކަންކަން ބަލަމުން އަންނަ ކަމަށް އެ މުއައްސަސާއިން ބުންޏެވެ.

އަލް އަބްރާރު ގްރޫޕުން ބުނެފައިވަނީ ދަތުރު ކެންސަލް ކުރަން ޖެހުނީ މިހާރު މެދުއިރުމަތީގައި ހިނގާ ހަނގުރާމައާ ހެދި ކަމަށެވެ.