މި ސަރުކާރުގެ ގޯތި ގެދޮރު ޕްރޮގްރާމުގެ ދަށުންނާއި ބިންވެރިޔާ ހާއްސަ ސްކީމްގެ ދަށުން މާލޭގައި ދިރިއުޅޭ މީހުންނަށް ބިން ދޫކުރުމުގެ އުސޫލު ހައުސިން މިނިސްޓްރީން މިއަދު އާންމުކޮށްފި އެވެ.

މި އުސޫލަކީ 18 އަހަރުން މަތީގެ ދިވެހި ރައްޔިތުންގެ ތެރެއިން ޝަރުތު ހަމަވާ ފަރާތްތަކަށް މާލެ ސަރަހައްދުންނާއި ރަސްމާލެއިން ބަންޑާރަ ގޯތި ދޫކުރުމަށް އެކުލަވާލާފައިވާ އުސޫލެކެވެ.

ހައުސިން މިނިސްޓްރީން ހާމަކުރި ގޮތުގައި ގޯތި ގެދޮރު ޕްރޮގްރާމްގެ ދަށުން ދެ ކެޓަގަރީއަކުން ރަސްމާލެއިން ގޯތި ދޫކުރާނެއެވެ. މިގޮތުން ދޫކުރާ ކޮންމެ ގޯއްޗެއްގެ ބޮޑުމިނަކީ 1,250 އަކަފޫޓެވެ. ކެޓަގަރީ 1 ގައި ހިމެނެނީ މާލޭގެ ރަށްވެއްސަކަށް ވެފައިވާތާ މަދުވެގެން އެއް އަހަރުވެފައިވާ ފަރާތްތަކެވެ. މީގެ ތެރޭގައި އުފަންވީއްސުރެ މާލޭގެ ރަށްވެހިންގެ ގޮތުގައި ތިބި މީހުންނާއި، ދަފްތަރުގައި ރަޖިސްޓްރީވެފައިވާ ފަރާތްތައް ވެސް ހިމެނެ އެވެ.

ކެޓަގަރީ 2 ގެ ދަށުން ގޯތި ދޫކުރުމަށް ހަމަޖެހިފައިވަނީ މާލޭގައި ދިރިއުޅޭ އެހެން ރަށްރަށުގެ ރަށްވެހިންގެ ތެރެއިން، މެދުނުކެނޑި މާލޭގައި ދިރިއުޅޭތާ 15 އަހަރުވެފައިވާ ފަރާތްތަކަށެވެ. މި މުއްދަތު ގުނާނީ އުސޫލަށް އަމަލުކުރަން ފަށާ ދުވަހާ ހަމައަށް މެދުނުކެނޑި މާލޭގައި އުޅެފައިވާ މުއްދަތަށް ބަލައިގެންނެވެ.

މީގެ އިތުރުން، މިދިޔަ ސަރުކާރުގެ ބިންވެރިޔާ ސްކީމުން ޖޮއިންޓްކޮށް ގޯތި ލިބިފައިވާ ފަރާތްތަކުން އެ ގޯތި ދޫކޮށްލާނަމަ، ވަކިން ގޯތި ދިނުމުގެ ހާއްސަ އުސޫލެއް ވެސް ވަނީ އާންމުކޮށްފަ އެވެ.

މި އުސޫލުގެ ދަށުން ވެސް ގޯތި ދޫކުރާނީ ރަސްމާލެއިންނެވެ. މީގެ ތެރޭގައި ބިންވެރިޔާ ސްކީމުން ޖޮއިންޓްކޮށް ގޯތި ލިބުނު މީހުންގެ އިތުރުން، ކުރިން ފްލެޓެއް ލިބިފައި އޮތުމުގެ ސަބަބުން ބިންވެރިޔާ ސްކީމަށް ކުރިމަތިނުލެވުނު ފަރާތްތަކަށް ވެސް ފުރުސަތު ލިބޭނެ އެވެ.

ސަރުކާރުގެ އަމާޒަކީ ރަސްމާލެއިން ޖުމްލަ 15,000 ގޯތި ދޫކުރުމެވެ. މީގެ ތެރޭގައި މާލޭ ރަށްވެހިންނަށް 10,000 ގޯތި، މާލޭގައި ދިރިއުޅޭ އެހެން ރަށްރަށުގެ މީހުންނަށް 3,000 ގޯތި، އަދި ހާއްސަ އިސްކަންދޭ ކެޓަގަރީއަށް 2,000 ގޯތި ހިމެނެ އެވެ.

މި ޕްރޮގްރާމް ކުރިއަށް ގެންދާނީ އާއިލީ ބޯހިޔާވެހިކަމުގެ ކޮންސެޕްޓަށް އިސްކަންދީގެން، އެންމެ ބޭނުންޖެހިފައިވާ ފަރާތްތަކަށް ފުރަތަމަ ލިބޭނެ ނިޒާމެއްގެ ތެރެއިންނެވެ.