އުމުރާއަށް ގެންދިއުމަށް 110 މީހަކު އަތުން ފައިސާ ނެގުމަށްފަހު، އެންމެ ފަހު ވަގުތު ދަތުރު ކެންސަލްކުރި އަލްއަބްރާރް ގްރޫޕް ސަސްޕެންޑް ކުރަން އިސްލާމިކް މިނިސްޓްރީން ނިންމައިފި އެވެ.

އެ މިނިސްޓްރީން ނެރުނު ނޫސްބަޔާނެއްގައި ބުނީ، އަބްރާރު ގްރޫޕްގެ ހަވާލުގައި އުމްރާ އަށް ފުރަން ހަމަޖެއްސި މީހުންގެ ދަތުރު އެންމެ ފަހު ވަގުތު ކެންސަލްކުރި މައްސަލާގައި ޝަކުވާ ލިބުމުން އެ މައްސަލަ ބަލަމުން އަންނަ ކަމަށެވެ.

މިހާތަނަށް ބެލި ބެލުމުން ދަތުރު ކެންސަލް ކޮށްފައި ވަނީ މަގުބޫލު އެއްވެސް ސަބަބެއް ނެތި، ރާއްޖެ އިން މީހުން އުމްރާ އަށް ގެންދިއުމުގެ އުސޫލާ ހިލާފަށް ކަމަށް އެނގިފައިވާ ކަމަށް އިސްލާމިކް މިނިސްޓްރީން ބުންޏެވެ.

އެ މިނިސްޓްރީން ބުނީ، އަބްރާރު ގްރޫޕުން އަމަލުކުރި ގޮތާ ގުޅޭ މައްސަލަ އިތުރަށް ބަލައި، އުސޫލުގެ ތެރެއިން އަޅަންޖެހޭ ފިޔަވަޅުތައް އެ ކުންފުންޏާ ދެކޮޅަށް އަޅާނެ ކަމަށެވެ.

އިސްލާމިކް މިނިސްޓްރީން މިހާރު އަންނަނީ އަބްރާރް ގްރޫޕްގެ ސަބަބުން އުމްރާ އަށް ނުފުރި ތިބި މީހުންނަށް އެހީތެރިކަން ފޯރުކޮށްދިނުމުގެ މަސައްކަތް ކުރަމުން ކަމަށް ވެސް ވަނީ ބުނެފަ އެވެ.

އޭގެ ތެރެއިން 28 މީހަކަށް ހައްޖު ކޯޕަރޭޝަނުން ޖާގަ ހަމަޖައްސައިދީފައިވާ ކަމަށް އެ ކޯޕަރޭޝަންގެ މެނޭޖިން ޑިރެކްޓަރު ހަމްދާން ޝަކީލް ވަނީ ވިދާޅުވެފަ އެވެ.

އަލް އަބްރާރު ގްރޫޕުން 110 މީހަކު އުމްރާއަށް ގެންދަން ފައިސާ ނަގާ ހުރިހާ އިންތިޒާމުތަކެއް ހަމަޖެއްސުމަށް ފަހު، ފަހު ވަގުތު ދަތުރު ކެންސަލްކުރި މައްސަލަ ފުލުހުން ދަނީ ބަލަމުންނެވެ. މި ދަތުރުގައި 110 މީހުން ފުރަން އޮތް އިރު، އޭގެން ކޮންމެ މީހަކު ވަނީ 45،000 ރުފިޔާ ދައްކާފަ އެވެ.