ސަރުކާރުގެ "އާއިލީ ބޯހިޔާވަހިކަން" ޕްރޮގްރާމުގެ ދަށުން ދޫކުރާ ފްލެޓުތަކުގެ ތެރެއިން ހާއްސަ ކެޓަގަރީތަކަށް ކުރިމަތިލުމުގެ ޝަރުތެއްގެ ގޮތުން، އެ އިދާރާއެއްގައި މަސައްކަތް ކުރިތާ އެއް އަހަރު ވާންޖެހޭނެ ކަމަށް ކުރިން ކަނޑައެޅި އުސޫލު ބަދަލުކޮށް، އެ މުއްދަތު އަނެއްކާވެސް ފަސް އަހަރަށް ބަދަލުކުރަން ހައުސިން މިނިސްޓްރީން ނިންމައިފި އެވެ.

ހައުސިން މިނިސްޓްރީން ބޭއްވި ނޫސްވެރިންގެ ބައްދަލުވުމުގައި މިނިސްޓަރު އަބްދުﷲ މުއްތަލިބު ވިދާޅުވީ، މި އުސޫލަށް ބަދަލު ގެނައީ އެއީ ސިޔާސީ މުވައްޒަފުންނަށް ފްލެޓު ދިނުމަށް ގެނައި ބަދަލެއް ކަމަށް ބުނެ އަޑުތައް ފެތުރެމުންދާތީ ކަމަށެވެ. ނަމަވެސް، މިނިސްޓަރު ވަނީ އެ އުސޫލު މިހާރު އޮތް ގޮތުންވެސް ސިޔާސީ މުވައްޒަފުންނަށް ފްލެޓަށް ކުރިމަތިނުލެވޭނެ ކަމުގެ ޔަގީންކަން ދެއްވާފަ އެވެ.

"ހަގީގަތުގައި އެ އުސޫލު މިހާރު އޮތްގޮތުން ވެސް ސިޔާސީ މުވައްޒަފުންނަށް ކުރިމަތިލެވޭ ގޮތަކަށް ނޫން އެ އޮތީ. ސަރުކާރުގެ އެއްވެސް ވިސްނުމެއް ނެތް ސިޔާސީ ގޮތުން ވަކި ބަޔަކަށް، އާންމުކޮށް އެ އޮންނަ ކެޓަގަރީގެ ބޭރުން ހާއްސަ ކެޓަގަރީއެއް ހަދައިގެން ކުރިމަތިލެވޭ ގޮތަށް ބޭއްވުމަކީ،" މިނިސްޓަރު ވިދާޅުވި އެވެ.

މިނިސްޓަރު ވިދާޅުވީ، އެ އިދާރާއެއްގައި އުޅޭ މުއްދަތު ފަސް އަހަރުން އެއް އަހަރަށް ކުރިން ބަދަލުކުރީ އިދާރާތަކުގައި ތިބި ގާބިލު އަދި ކިޔަވައިގެން ތިބި މުވައްޒަފުން އެ ތަންތަނުގައި ދިގު މުއްދަތަކަށް ބޭތިއްބުމުގެ މަގްސަދުގަ އެވެ. މިސާލެއްގެ ގޮތުން މިނިސްޓަރު ފާހަގަކުރެއްވީ، އެއް އިދާރާއެއްގައި ގިނަ ދުވަހު މަސައްކަތް ކުރުމަށްފަހު ދާދި ފަހުން އެހެން އިދާރާއަކަށް ބަދަލުވެފައިވާ ހުނަރުވެރި މުވައްޒަފުންނަށް މި ފުރުސަތު ގެއްލިގެންދާ ދިއުމެވެ.

މި މަހުގެ ދެވަނަ ދުވަހު ގެޒެޓުކުރި އިއުލާނުގައިވާ ގޮތުން، ޖުޑިޝަރީ، ފުލުހުން، އެމްއެންޑީއެފް، ސިވިލް ސާވިސް، ކަރެކްޝަންސް އަދި ރައީސް އޮފީސް ހިމެނޭ ގޮތަށް 23 އިދާރާއަކަށް 1,000 ފްލެޓު ވަނީ ހާއްސަކޮށްފަ އެވެ. މި ކެޓަގަރީން ފްލެޓަށް ޝަރުތު ހަމަވާ މީހުން، ބޯހިޔާވަހިކަން ހަވާލުކުރާ ތާރީހުން ފެށިގެން އެ އިދާރާއަކުން ކަނޑައަޅާ ގޮތެއްގެ މަތިން ވަޒީފާ އަދާކުރުމަށް އެއްބަސްވާން ޖެހެ އެވެ.

ޕްރޮގްރާމްގެ ދަށުން 7،900 ފްލެޓާއި 1،250 އަކަފޫޓުގެ ޖުމްލަ 15،000 ގޯތި ދޫކުރަން ހަމަޖެހިފައިވާއިރު، އެ ދެ ޕްރޮގްރާމަށް ވެސް ލެވެނީ މާލޭ މީހުންނާއި މާލޭގައި އުޅޭތާ 15 އަހަރުވެފައިވާ މީހުންނަށެވެ. ސަރުކާރުގެ އިދާރާތަކުގައި މަސައްކަތްކުރާ މުއްދަތާ ގުޅޭ ޝަރުތަކީ މާލޭގައި އުޅޭ މުއްދަތުގެ އިތުރުން އިންނަ ޝަރުތެކެވެ.