މެދުއިރުމައްޗަށް ކުރާ ދަތުރުތައް މާސްކުން މެދު ކަނޑާލައިފި
ރޯދަ ވީއްލުމަށް ފަހު ވަރުބަލިވާ ސަބަބު މިއޮތީ؟
އޮމާންގައި ތެޔޮ ފީފާއެއްގެ އަގު 100 ޑޮލަރަށް ވުރެ މައްޗަށް
އުފެއްދުންތެރި ވިސްނުން ހުންނަ ނަމަ، އާކަމެއް ކޮށްލުމަށް ހިތް އެދެ އެވެ. އާ ޚިޔާލުތައް ސިކުޑީގައި ބުރުޖަހަ އެވެ. ހިތަށާއި ހަށިގަނޑަށް ހަމަޖެހުން ލިބިގެންދަނީ މި ޚިޔާލުތަކުގައި ހަގީގީ ކުލަ ޖެހުމުންނެވެ. މިއީ އާކަންކަން ވުޖޫދު ކުރުމަށް ޝައުގުވެރިވާ، ހުނަރުވެރިއެކެވެ. އޭނާ ވަނީ މިވަނީ ރޯދަ ސުފުރާމަތީ ހިމެނޭ އެންމެ މުހިންމު ކާނާ ކަމަށްވާ ކަދުރަށް އިތުރު މީރު ފޮނިކަމެއް ގެނެސްދީ، ގިނަ ބައެއްގެ ތަރުހީބު ލިބިގެންފަ އެވެ.
ފާތުމަތު ޝަފީގް (ފާތުން) އަބަދު ވެސް "ރިކްރިއޭޓް" (އެއްޗަކުން އާ އެއްޗެއް އުފެއްދުމަށް) ޝައުގުވެރިވެ އެވެ. އޭނާގެ އެ ވިސްނުން އިތުރަށް ތަރައްގީ ކުރެވުނީ މީގެ ތިން އަހަރު ކުރިން އާއިލީ ރޯދަ ވީއްލުމެއްގެ ތެރެއިން ކަދުރު ފެނިފަ އެވެ. އެ ދުވަހު އޭނާ ވިސްނަމުން ގެންދިޔައީ ކަދުރުގެ ބޭރުގައި ޗޮކްލެޓްގެ ފަށަލައެއް ލައިފި ނަމަ، ކަދުރުގެ ރަހަ ބަދަލުވެގެން ދާނެ ގޮތަކާ މެދު އެވެ.
އަޖުމަ ބަލާލުމުގެ ގޮތުން ކަދުރު ކޮޅެއް ގަނެ، އޭގެ އިންނަ އޮށުގެ ބަދަލުގައި "ރޯސްޓް" ކޮށްފައިވާ ކެޝޫނަޓެއްލި އެވެ. އަދި ކަދުރުތަކުގެ ބޭރުގައި ޗޮކުލެޓުގެ ފަޝަލައެއް ލި އެވެ. އެގޮތަށް ކަދުރު ބަދަލު ކޮށްލުމުން އޭގެ ރަހަ އިތުރަށް މީރުވިކަން އޭނާއަށް ފާހަގަވި އެވެ.
އޭނާގެ މަންމައަށާއި އާއިލާ ކުދިންނަށް އަލަށް ތައްޔާރުކުރި ކަދުރުގެ ރަހަ ދެއްކުމުން އެ މީހުންނަށް ވެސް އެ ވަރަށް ކަމުދިޔަ އެވެ. އެދަނޑިވަޅުގައި ފާތުން އެފަދަ މަސައްކަތަށް ހުންނަ ޝައުގުވެރިކަން ފެނި، އެކަން ކުރެވިދާނެ ކަމުގެ ފުރިހަމަ ޔަގީންކަން އޮތުމުން، އޭނާގެ މަންމަ ހިތްވަރުދިނީ ޗޮކުލެޓް ކަދުރުގެ ވިޔަފާރިއެއް ފެށުމަށެވެ.
"މި މަސައްކަތް ދަސްކުރީ އެއްވެސް ތަނަކުން ފެނިގެނެއް ނޫން. ހަމަ އަމިއްލަ ވިސްނުމަށް. އަޅުގަނޑު ޗޮކުލެޓް ލީ ކަދުރުތަކުގެ ރަހަ ބަލާފަ އެންމެން ވެސް ބުނި ވަރަށް މީރޭ. އެގޮތަށް ކަދުރު ހަދާފަ ވިއްކަންވީ ނޫންހޭ. އަޅުގަނޑުގެ ފެމެލީ އަބަދު ވެސް އަޅުގަނޑު ކުރާ ކަންތަކަށް ހިތްވަރު ދޭނެ،" ފާތުންގެ މަސައްކަތް ފެށުނު ގޮތް ކިޔައިދިނެވެ.
ދެން އޭނާ ތައްޔާރުކުރި ކަދުރުތަކުގެ ފޮޓޯ އިންސްޓަ ގްރާމް ޕޭޖް "ސްވީޓް ފުޑް ސްޓޯޑިއޯ"ގައި ހިއްސާ ކޮށްލުމުން ހީކުރި ވަރަށް ވުރެ ބޮޑު ތަރުހީބެއް އޭނާގެ ފޮލޯވާސްގެ ފަރާތުން ލިބުނުކަން ފާތުން އުފަލާ އެކު ފާހަގަ ކުރި އެވެ. ފޮލޯވާސްގެ ފަރާތުން މިއަދު ވެސް ލިބޭ ތަރުހީބަކީ އެ މަސައްކަތުގައި ދެމިހުރުމުގެ އަސްލެވެ.
ފާތުންގެ ޗޮކުލެޓް ކަދުރަކީ ހަމައެކަނި ރޯދަ މަހަށް ޚާއްސަކޮށް އޭނާ އުފައްދާ އެއްޗެކެވެ. ސުފުރާމަތި ފަޅުފިލުވުމުގެ އިތުރުން އެ ކަދުރުތަކަކީ، ރޯދަ އަދި އީދު ހަދިޔާއެއްގެ ގޮތުގައި ދިނުމަށް ވެސް ރަނގަޅު އެއްޗެކެވެ. އޭނާގެ ކަދުރުތައް ބަންދުކޮށްފައި ވަނީ ވަރަށް ހިތްގައިމުކޮށޭ ބުނުމީ ދޮގަކަށް ނުވާނެ އެވެ. އެހާ ވެސް އެފޮށިތައް ނަލަ އެވެ.
ކަދުރު އޮން ނަގައި ސާފު ކުރުމުން ފެށިގެން ޕެކޭޖް ކުރުމާ ހަމައަށް ވެސް، ހުރިހާ މަސައްކަތެއް ވެސް ކުރަނީ އޭނާގެ އަމިއްލަ ދެއަތުންނެވެ. ނަމަވެސް އޯޑަރުން ގިނަވެގެން ބުރަވާ ދުވަހެއްގައި އޭނާގެ އަންހެން ދަރިފުޅު އެހީތެރިވެދެ އެވެ. އަދި އެއްޗެހި ގަތުމާއި ޑެލިވާރީ ކުރުމުގައި އޭނާގެ ފިރިމީހާގެ އެހީތެރިކަން އަބަދު ވެސް ލިބެ އެވެ. ފާތުންގެ މަސައްކަތުގައި ގާތް މީހުން އަބަދުވެސް ދޭ އެހީތެރިކަމާއި އެއްބާރުލުން ފާހަގަކޮށް ހިތުގެ އެންމެ ފުންމިނުން އެ އެންމެނަށް އޭނާ ޝުކުރު އަދާކުރެ އެވެ.
ޗޮކުލެޓުގެ ގިނަ ރަހަތަކެއް ކަދުރުގައި
އާންމުކޮށް ކަދުރުގެ ބޭރުގައި ލާ ފަށަލަތަކަކީ ޕްލެއިން ޗޮކްލެޓާއި، ޑާކް ޗޮކްލެޓް ވިތް ނަޓްސް، ވައިޓް ޗޮކްލެޓް ވިތްނަޓްސް، ވައިޓް ޗޮކްލެޓް ޑްރިޒްލްޑް އަދި ޑާކް ޗޮކްލެޓް ޑްރިޒްލްޑް އެވެ. އާންމު ގޮތެއްގައި 5 ވައްތަރުގެ ޗޮކްލެޓް ކަދުރު ތައްޔާރު ކުރި ނަމަވެސް، ކަސްޓަމަރުން ބޭނުންވާ ގޮތަކަށް "ކަސްޓަމައިޒް" ކޮށް ވެސް ހަދައިދެ އެވެ.
"ވަކި ކުލައެއްގެ ކަދުރު ބޭނުންފުޅު ވާނަމަ އެގޮތަކަށް ހަދައިދެން. ނަޓްސްއަށް އެލާޖިކް ބޭފުޅުން ނަޓްސް ނުލާ ހަދައިދޭން އެދިއްޖެ ނަމަ އެގޮތަކަށް ހަދައިދެން. ހަމައެކަނި ވައިޓް ޗޮކްލެޓް ނުވަތަ ހަމައެކަނި ޑާކް ޗޮކްލެޓް ބޭނުންނަމަ އެގޮތަށް ހަދައިދެނީ. އަޅުގަނޑު އަބަދު ވެސް ބަލަނީ އެ ބޭފުޅެއްގެ ޕްރިފަރަންސަށް (އެދިލައްވާ ގޮތަކަށް) ބަލައިގެން ހަދައިދިނުމަށް،" ފާތުން ކިޔައިދިނެވެ.
ރޯދަމަހަށް ޚާއްސަ ކޮށްގެން ތަފާތު ނަންނަމުގައި ކާބޯތަކެތީގެ ގިނަ ބާވަތްތަކެއްގެ އެކި ޕޭޖުތަކުން އިސްތިހާރުކޮށް ވިއްކަން ޖެހި ނަމަވެސް ފާތުންގެ ކަދުރުތަކަށް އޮންނަ ތަރުހީބު ފުރަތަމަ ދުވަހެކޭ މިއަދެކޭ ވަކި ތަފާތެއް ނެތް ކަމަށް އޭނާ ބުންޏެވެ. އޭނާ މިހާރު ވިސްނަމުންދަނީ ކުރިއަށް އޮތްތަނުގައި ކަދުރުގެ އިތުރު ރަހަތައް ތައާރަފް ކުރުމަށެވެ.
"ރޯދަމަހަށް ތަހުނިޔާ ކިޔާފައި އެކަކު އަނެކަކަށް ފޮނުވާލަން ވެސް މި ކަދުރު ޕެކް ވަރަށް ކަމުދާނެ. ބައެއް މީހުން ގުޅާލާފަ އެބަ ބުނޭ ތިމަންނަ މިހިރީ ރަށުން ބޭރުގަ އޭ. އެވެނި މިވެނި ގެއަކަށް ރޯދަ ހަދިޔާއެއްގެ ގޮތުގައި ކަދުރު ޕެކެއް ޑެލިވާ ކޮށްދޭށޭ. އެހެންވެ އަޅުގަނޑު އިންނާނެ ރަމަޒާން މުބާރަކް ލިޔެފައި އިންނަ ރިބަން ޓައީއެއް ވެސް ކަދުރު ޕެކްގެ ކަނެއްގައި ހިއްޕާލާފައި. ހަމައެގޮތަށް އީދު މުބާރަކް ޖަހާލާފައި ވަކި އެޑްރެހަކަށް ޑެލިވާކުރަން ބުނީމަ އެގޮތަށް ވެސް ފޮނުވަދެން،" ފާތުން ބުންޏެވެ.
ޗޮކްލެޓް ކަދުރު ހެދުމުގެ އިތުރުން ފާތުންނަކީ މޮޅު އާޓިސްޓެކެވެ. ވަރަށް ކުޑައިރު ކުރެހުމަށް ޝައުގުވެރިވެ އެ ރޮނގުން ކުރިއަށް ދިޔަ އެވެ. މީހުންނަށް ޕެއިންޓިން ހަދައިދެ އެވެ. ވެޑިން ހެދުން، ދިގު ހެދުން، ޓައީ، ބޫޓްގައި ޕެއިންޓް ކުރުމަކީ އޭނާގެ އާންމުކޮށް ކުރާ މަސައްކަތެވެ.
އާޓިސްތެއްގެ އިތުރުން އަތްތެރި މަސައްކަތަށް ވެސް އޭނާ ވަރަށް ޝައުގުވެރިވެ އެވެ. ކުދި ބޮލި ބޭނުންކޮށްގެން ހިތްގައިމު ގޮތްގޮތަށް އޭނާ ހަދާ ގަހަނާއަށް ގިނަ ބައެއްގެ ސަމާލުކަން ލިބިފައިވެ އެވެ. އޭގެ އިތުރުން ރޯދަ ނޫން މަސްމަހު އޭނާ ހަދާ ބްރައުނީސްއަކީ ވެސް ގިނަބައެއްގެ ތަރުހީބު ލިބިފައިވާ އެއްޗެކެވެ.
ފާތުންގެ ހާއްސަ ބްރައުނީސް ހަދާފައި ހުންނަނީ ކޮންފެޓީ، ޗޮކްލެޓް ފަދަ ތަފާތު ޓޮޕިންސް ހިމަނައިގެންނެވެ. އީދު ފަދަ ޚާއްސަ ދުވަސް ދުވަހު ފާތުންގެ ބްރައުނީސްއަށް ވަރަށް ޑިމާންޑް އޮންނަ ކަމަށް އޭނާ ބުންޏެވެ.
އޭނާ ދެކޭ ގޮތުގައި އާމްދަނީއެއް ހޯދުމަށް އަމިއްލަ މަސައްކަތެއް ކުރުމަކީ މުހިންމު ކަމެކެވެ. ޚާއްސަކޮށް ކާއެއްޗެހި ތައްޔާރު ކުރުމުގައި މިއަދު ވަރަށް ވާދަވެރިކޮށް އެކި ޕްލެޓްފޯމްގައި މީހުން ވަރަށް ބުރަކޮށް މަސައްކަތް ކުރެ އެވެ. ވީމާ މި ދާއިރާއަށް ނުކުންނަށް ބޭނުންވާ ކުދިން މީހުންނަށް މީރު ކާއެއްޗެއް ވުޖޫދު ކުރުމަކީ ދާއިރާއިން ކުރިއަށް ދިއުމަށް މުހިންމު ކަމެއް ކަމަށް އޭނާ ދެކެ އެވެ.
