އެމެރިކާ އާއި އިޒްރޭލުން އީރާނަށް ހަމަލާދޭން ފެށިތާ ހަދުވަސް ފަހުން، މުޅި ސަރަހައްދުގެ މަސްރަހު ނުތަނަވަސްވެ، ކުރިމަތިލުންތައް ދަނީ އިތުރަށް ވަރުގަދަވަމުންނެވެ. އެމެރިކާ، އިޒްރޭލު އަދި އީރާނާ ދެމެދު ކުރިއަށްދާ މި ހަނގުރާމަ ހަތްވަނަ ދުވަހަކަށް ފެށިފައިވާއިރު، އީރާނުގެ އެކި ސަރަހައްދުތަކަށާއި މެދުއިރުމަތީގެ އެހެން ގައުމުތަކަށް އަމާޒުކޮށްދޭ ހަމަލާތައް މެދުނުކެނޑި ދަނީ ކުރިއަށެވެ.

"އޮޕަރޭޝަން އެޕިކް ފިއުރީ" ގެ ނަމުގައި ހިންގާ މި އަސްކަރީ ކެމްޕޭނުގެ ސަބަބުން އީރާނުގެ އަސްކަރިއްޔާ ބަލިކަށިވަމުންދާ ކަމަށް ބުނަމުންދާއިރު، އީރާނުން ދަނީ ގަލްފް ސަރަހައްދު ތަކުގައި ހުރި އެމެރިކާގެ މަރުކަޒުތަކަށް އަމާޒުކޮށް މިސައިލާއި ޑްރޯން ހަމަލާތައް ދެމުންނެވެ. ސެންޓަރ ފޯރ ސްޓްރެޓީޖިކް އެންޑް އިންޓަރނޭޝަނަލް ސްޓަޑީޒް (ސީ.އެސް.އައި.އެސް) އިން އާންމުކުރި ތަފާސްހިސާބުތަކަށް ބަލާއިރު، މި އޮޕަރޭޝަންގެ ފުރަތަމަ 100 ގަޑިއިރުގެ ތެރޭގައި އެކަނިވެސް 3.7 ބިލިއަން ޑޮލަރު ހަރަދުވެފައި ވެއެވެ. މިއީ ދުވާލަކަށް ގާތްގަނޑަކަށް 891 މިލިއަން ޑޮލަރެވެ.

ވޭތުވެދިޔަ 24 ގަޑިއިރުގެ ތެރޭގައި ހިނގާފައިވާ މުހިންމު ކަންތައްތައް:

އީރާނުގެ މަސްރަހު:

އެމެރިކާ އާއި އިޒްރޭލުގެ އަސްކަރީ ހަމަލާތައް ހަތްވަނަ ދުވަހަކަށް ކުރިއަށްދާއިރު، ހޮނިހިރު ދުވަހުން ފެށިގެން މިހާތަނަށް އީރާނުން 1,230 އަށްވުރެ ގިނަ މީހުން ވަނީ މަރުވެފަ އެވެ. އިޒްރޭލުން ބުނާ ގޮތުގައި އެގައުމުން ވަނީ 2,500 އަށްވުރެ ގިނަ ހަމަލާދީ، އީރާނުގެ ވައިގެ ދިފާއީ ނިޒާމުގެ 80 އިންސައްތަ ނައްތާލައި، ވައިގެ ސަރަހައްދުގެ ފުރިހަމަ ކޮންޓްރޯލް ހޯދާފަ އެވެ.

ވެރިކަމުގެ ބާރުތައް: އީރާނުގެ ރޫހީ ލީޑަރު އާޔަތުﷲ އަލީ ޚާމަނާއީ އަވަހާރަކޮށްލުމާ ގުޅިގެން، އޭނާގެ ބަދަލުގައި ވެރިކަމަށް ވަޑައިގަންނަވާނެ ބޭފުޅަކާ މެދު ވަނީ ސުވާލު އުފެދިފަ އެވެ. ޚާމަނާއީގެ ދަރިކަލުން މުޖްތަބާ ޚާމަނާއީ ވެރިކަމަށް ވަޑައިގެންފާނެ ކަމުގެ އަޑުތައް ފެތުރިފައިވީ ނަމަވެސް، އެމެރިކާގެ ރައީސް ޑޮނަލްޑް ޓްރަމްޕް ވަނީ މުޖްތަބާ އަކީ ބަލައިގަނެވޭނެ ބޭފުޅެއް ނޫން ކަމަށް ވިދާޅުވެ، އީރާނުގެ ދެން އަންނަ ވެރިއަކު ކަނޑައެޅުމުގައި އެމެރިކާގެ ދައުރެއް އޮންނާނެ ކަމަށް އިޝާރާތް ކުރައްވާފަ އެވެ.

އިންޒާރުތަކާއި މަޝްވަރާ: އީރާނުގެ ސުޕްރީމް ނޭޝަނަލް ސެކިއުރިޓީ ކައުންސިލްގެ ސެކްރެޓަރީ އަލީ ލަރިޖާނީ ވަނީ އެމެރިކާގެ އެއްގަމު ސިފައިން އީރާނަށް އަރައިފިނަމަ ހާހުން ސިފައިން މަރާލައި ހައްޔަރުކުރާނެ ކަމުގެ އިންޒާރު ދެއްވާފަ އެވެ. ހަމައެއާއެކު، އީރާނުގެ ހާރިޖީ ވަޒީރު އައްބާސް އަރަގްޗީ ވަނީ އެމެރިކާއަކީ އިތުބާރު ކުރެވޭނެ ބައެއް ނޫން ކަމަށާއި، އެގައުމާއެކު އެއްވެސް މަޝްވަރާއެއް ކުރަންޖެހޭ ސަބަބެއް ނެތް ކަމަށް ވިދާޅުވެފަ އެވެ.

ގަލްފް ސަރަހައްދުގެ ގައުމުތައް

އީރާނުން ދިން ބަދަލުހިފުމުގެ ހަމަލާތަކާ ގުޅިގެން ކުވެއިތުގައި ހުންނަ އެމެރިކާގެ އެމްބަސީގެ މަސައްކަތްތައް ވަނީ މެދުކަނޑާލާފަ އެވެ. ބަހްރޭންގެ ތެޔޮ ސާފުކުރާ ކާރުޚާނާއަކަށް މިސައިލް ހަމަލާއެއް އަމާޒުވެފައިވާއިރު، ޔޫ.އޭ.އީ އާއި ގަތަރަށްވެސް އީރާނުގެ ގިނަ އަދަދެއްގެ ޑްރޯން އާއި މިސައިލް ހަމަލާތައް ވަނީ އަމާޒުވެފަ އެވެ. މީގެ އިތުރުން، މަސްރަހު ގޯސްވުމާ ގުޅިގެން މެދުއިރުމަތީގައި ތިބި 20,000 އެއްހާ އެމެރިކާ ރައްޔިތުން ވަނީ އެ ސަރަހައްދު ދޫކޮށް ގޮސްފަ އެވެ.

އިޒްރޭލަށް ގިނަ ހަމަލާތަކެއް

އީރާނުގެ ރިވޮލިއުޝަނަރީ ގާޑުން ވަނީ ތަލް އަވީއަށާއި އިޒްރޭލުގެ މެދުތެރޭ ސަރަހައްދުތަކަށް ވަރުގަދަ ޑްރޯން އަދި މިސައިލް ހަމަލާތަކެއް ދީފަ އެވެ. ސަލާމަތީ ސަބަބުތަކަށްޓަކައި ގުދުސްގެ ބައެއް މުގައްދަސް ބިނާތައް ބަންދުކޮށް، ހުކުރު ނަމާދު ކުރުންވެސް ވަނީ މެދުކަނޑާލާފަ އެވެ.

އެމެރިކާގެ ބަސް

އެމެރިކާގެ ސެންޓްރަލް ކޮމާންޑުން ބުނި ގޮތުގައި ވޭތުވެދިޔަ 72 ގަޑިއިރުގެ ތެރޭގައި އީރާނުގެ 200 އަށްވުރެ ގިނަ އަމާޒުތަކަށް ވަނީ ހަމަލާދީފަ އެވެ. ރައީސް ޓްރަމްޕް ވަނީ އީރާނުގެ އަސްކަރީ ބާރުތައް މުޅިން ނެތިކޮށްލެވިފައިވާ ކަމަށް ދައުވާ ކުރައްވާފަ އެވެ. މީގެ އިތުރުން، އެމެރިކާގެ މަޖިލީހުން ވަނީ ހަނގުރާމަ ހުއްޓާލުމަށް ހުށަހެޅި ހުށަހެޅުމަކާ ދެކޮޅަށް ވޯޓުދީފަ އެވެ. މި ހަނގުރާމައިގެ ސަބަބުން ދުނިޔޭގެ ބާޒާރުގައި ތެލުގެ އަގު އުފުލި، އެމެރިކާގެ މާލީ ބާޒާރަށް ވަނީ ބޮޑެތި ލޮޅުންތަކެއް އަރާފަ އެވެ.

އިތުރު ގައުމުތަކަށް ދަނީ ހަނގުރާމައިގެ އަސަރު ކުރަމުން

ޢިރާޤު، ލުބްނާން އަދި މިސްރުގައިވެސް މި ހަނގުރާމައިގެ އަސަރުތައް ދަނީ ފެންނަމުންނެވެ. އިޒްރޭލުން ލުބްނާނަށް ދޭ ހަމަލާތައް ވަރުގަދަކޮށްފައިވާއިރު، މިސްރުގެ ރައީސް ސީސީ ވަނީ ހަނގުރާމައިގެ ސަބަބުން އެގައުމުގެ އިގްތިސާދަށް ކުރިމަތިވެދާނެ ނުރައްކާތަކުގެ އިންޒާރު ދެއްވާފަ އެވެ. ޔޫރަޕްގެ ގައުމުތަކުގެ މެދުގައި މި ހަނގުރާމައާ މެދު ހިޔާލުތަފާތުވުންތައް އުފެދިފައިވާއިރު، އިނގިރޭސިވިލާތާއި ފަރަންސޭސިވިލާތުން ދަނީ އެ ސަރަހައްދުގައި އެމީހުންގެ އަސްކަރީ ބާރު ގަދަކުރަމުންނެވެ. އަޒަރުބައިޖާނުންވެސް ވަނީ އީރާނުން ދިން ޑްރޯން ހަމަލާއަކާ ގުޅިގެން ބަދަލުހިފާނެ ކަމުގެ އިންޒާރު ދީފަ އެވެ. ނަމަވެސް އީރާނުން ވަނީ އަޒަރުބައިޖާނަށް ހަމަލާ ނުދޭ ކަމަށް ބުނެފަ އެވެ.