ދުނިޔޭގެ އެންމެ ބޮޑު ކޮންޓެއިނަރު ޝިޕިންގ ގްރޫޕްތަކުގެ ތެރޭގައި ހިމެނޭ މާސްކުން، މެދުއިރުމައްޗާއި އޭޝިއާ އަދި ޔޫރަޕާ ގުޅުވައިދޭ ދެ ހިދުމަތެއް މެދުކަނޑާލައިފި ކަމަށް ހުކުރު ދުވަހު އިއުލާނުކޮށްފި އެވެ. މި ނިންމުން ނިންމާފައިވަނީ އީރާނުގެ ހަމަނުޖެހުންތަކާ ގުޅިގެން ދުނިޔޭގެ ސަޕްލައި ޗެއިންއަށް ބުރޫއަރަމުންދާ ދަނޑިވަޅެއްގަ އެވެ.

މާސްކުން ކަސްޓަމަރުންނަށް ފޮނުވި އެޑްވައިޒަރީއެއްގައި ބުނެފައިވަނީ، މި ފިޔަވަޅަކީ ރައްކާތެރިކަމުގެ ގޮތުން އެޅި ފިޔަވަޅެއް ކަމަށެވެ.

"މި ނިންމުމަކީ އަޅުގަނޑުމެންގެ މުވައްޒަފުންނާއި އުޅަނދުފަހަރުގެ ސަލާމަތާއި ރައްކާތެރިކަން ކަށަވަރުކުރުމަށާއި، އަޅުގަނޑުމެންގެ ވިއުގައިގެ މަސައްކަތްތަކަށް ކުރިމަތިވާ ބުރޫތައް ކުޑަކުރުމަށްޓަކައި ރައްކާތެރިކަމުގެ ފިޔަވަޅެއްގެ ގޮތުން ނިންމި ނިންމުމެއް،" މާސްކުން ބުނެފައިވެ އެވެ.

ފްރައިޓް އެނަލިޓިކްސް ފާމެއް ކަމަށްވާ ޒެނެޓާއިން ހާމަކޮށްފައިވާ ގޮތުގައި، މި ހަމަނުޖެހުންތަކުގެ ސަބަބުން 147 ކޮންޓެއިނަރު އުޅަނދެއް މިހާރު އޮތީ ގަލްފް ސަރަހައްދުގައި މަޑުކޮށްގެންނެވެ. މީގެ ސަބަބުން ބަނދަރުތައް ތޮއްޖެހި، މުދާ އުފުލުމުގެ އަގުތައް ވަނީ އުފުލެން ފަށާފަ އެވެ.

މި ބަދަލުތަކުގެ އަސަރު އޭޝިއާއިން ފެށިގެން ޔޫރަޕާ ހަމައަށް މުޅި ދުނިޔޭގެ ސަޕްލައި ޗެއިންއަށް ކުރަމުންދާ ކަމަށް މާހިރުން ފާހަގަކުރެ އެވެ. މާސްކުން އިތުރަށް ބުނެފައިވަނީ ހާލަތު މޮނިޓަރ ކުރަމުންދާ ކަމަށާއި، އޮޕަރޭޝަންތަކަށް ގެންނަ ބަދަލުތައް ކަސްޓަމަރުންނަށް އަންގަމުންދާނެ ކަމަށެވެ.