އެމެރިކާއާއި އިޒްރޭލުން އީރާނަށް ވަރުގަދަ ހަމަލާތަކެއް ދީ ހަނގުރާމަ ފެށިތާ ހަތް ދުވަސް ވެފައިވާ އިރު، އީރާނާ އެކު އެއްވެސް އެއްބަސްވުމެއް ހެދޭނީ "ޝަރުތެއް ނެތި އަމާން ދިނުމުން" ކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެ އެވެ.

ސީއެންއެންއަށް ދެއްވި އިންޓަވިއުއެއްގައި ޓްރަމްޕް ވިދާޅުވީ އީރާނުގެ ލީޑާޝިޕް އެއްކޮށް ދުއްވާލެވިފައިވާ ކަމަށާއި، އެމެރިކާ އާއި އިޒްރޭލާއި މެދު ރަނގަޅަށް ކަންކުރާނެ އާ ލީޑާޝިޕެއް ހޯދަން ބޭނުންވާ ކަމަށެވެ. އީރާނު ޑިމޮކްރެޓިކް ދައުލަތަކަށް ވުމާ މެދު ކަންބޮޑުނުވާ ކަމަށް ވެސް އޭނާ ވިދާޅުވި އެވެ.

އިޒްރޭލުގެ ސިފައިން ހޮނިހިރު ދުވަހުގެ ފަތިހު ތެހެރާނަށް ވަރުގަދަ ހަމަލާތަކެއް ދީފައިވާ ކަމަށް އެ ގައުމުގެ އަސްކަރިއްޔާއިން ވަނީ ބުނެފަ އެވެ. ތެހެރާނުގެ މެހެރާބާދު އެއާޕޯޓުގައި ރޯވެ އަނދަމުންދާ މަންޒަރު ފެންނަ ވީޑިއޯ ސޯޝަލް މީޑިއާގައި ދައުރުވެފައިވާ އިރު، އޭގެ ފަހުން އީރާނުން ވެސް ވަނީ އިޒްރޭލަށް ރައްދު ހަމަލާތަކެއް ފޮނުވާލައިފަ އެވެ.

ހަނގުރާމަ ފެށުނީއްސުރެ އެމެރިކާގެ ސެންޓްރަލް ކޮމާންޑުން "އެޕިކް ފިއުރީ" އޮޕަރޭޝަނުގެ ދަށުން އީރާނުގެ 3،000 އަށް ވުރެ ގިނަ ޓާގެޓަށް ހަމަލާ ދީފައިވާ ކަމަށާއި، ބެލިސްޓިކް މިސައިލް ސައިޓްތަކާއި ރިވޮލިއުޝަނަރީ ގާޑް ކޮމާންޑް ސެންޓަރުތައް ހިމެނޭ ގޮތުން 43 އީރާނު ނައު ހަލާކުކޮށް ނުވަތަ ގެއްލުން ދީފައިވާ ކަމަށް ސެންޓްރަލް ކޮމާންޑުން ބުންޏެވެ.

ގަލްފު ޤައުމުތަކަށް ވެސް ވަނީ އީރާނުގެ ރައްދު ހަމަލާތައް އަމާޒުވެފަ އެވެ. ސައޫދީ އަރަބިއާ އިން ޝައިބާ ތެޔޮ މަރުކަޒަށް ދިޔަ 16 ޑްރޯނެއް ވައްޓައިލި އިރު، ޔޫއޭއީ އިން ހުކުރު ދުވަހު ނުވަ ބެލިސްޓިކް މިސައިލާއި 109 ޑްރޯން އިންޓަސެޕްޓް ކުރި އެވެ. ބަހުރައިނުން ހަނގުރާމަ ފެށީއްސުރެ 84 މިސައިލާއި 147 ޑްރޯން އިންޓަސެޕްޓް ކޮށްފައިވާ ކަމަށް ބުންޏެވެ. ކުވައިތުގެ ސިފައިން ހުކުރު ދުވަހު 12 ޑްރޯނާއި 14 މިސައިލް ވައްޓައިލި އެވެ.