އިޒްރޭލާއި އެމެރިކާ އަދި އީރާނާ ދެމެދު ޖެހިޖެހިގެން އަށް ވަނަ ދުވަހު ހަމަލާ ބަދަލުކުރަމުންދާއިރު، ތެލުގެ އަގު ބޮޑުތަނުން އުފުލި، ފީފާއެއް 100 ޑޮލަރާ ގާތަށް ޖެހިލައިފި އެވެ.

ހަމަނުޖެހުން ފެށުމުގެ ކުރިން މިދިޔަ ހަފުތާގައި ސާފުނުކުރާ ތެލުގެ އަގު ހުރީ ފީފާއެއް ގާތްގަނޑަކަށް 62 ޑޮލަރުގަ އެވެ. ނަމަވެސް ހުކުރު ދުވަހު ބްރެންޓް ކްރޫޑް 8.52 ޕަސެންޓް އުފުލި ފީފާއެއް 92.69 ޑޮލަރަށް އެރިއިރު، ވެސްޓް ޓެކްސަސް އިންޓަމީޑިއޭޓް (ޑަބްލިއުޓީއައި) 12.21 ޕަސެންޓް އުފުލި ފީފާއެއް 90.90 ޑޮލަރަށް އެރި އެވެ.

މި ހަމަނުޖެހުމުގެ ސަބަބުން އީރާނާއި އޮމާނާ ދެމެދު އޮންނަ ހޮރްމޫޒް ކަނޑުއޮޅި މެދުވެރިކޮށް ކުރާ ޝިޕިންގާއި ހަކަތައިގެ އެކްސްޕޯޓް ވަނީ ހުއްޓިފަ އެވެ. ދުނިޔޭގެ ސާފުނުކުރާ ތެލާއި ލިކުއިފައިޑް ނެޗުރަލް ގޭހުގެ ގާތްގަނޑަކަށް ފަސް ބައިކުޅަ އެއް ބައި ދައުރުކުރާ މި ކަނޑުއޮޅި ހަތް ދުވަސް ވަންދެން ބަންދުވެފައި އޮތުމުން ގާތްގަނޑަކަށް 140 މިލިއަން ފީފާ ތެޔޮ ބައިނަލްއަޤުވާމީ ބާޒާރަށް ނުފޯރައި ވަނީ ހުއްޓިފަ އެވެ.

ގަތަރުގެ ހަކަތައާ ބެހޭ މިނިސްޓަރު ފައިނޭންޝަލް ޓައިމްސްއަށް ދެއްވި އިންޓަވިއުއެއްގައި ވިދާޅުވީ ގަލްފުގެ ހުރިހާ ހަކަތަ އުފައްދާ ޤައުމުތަކުން ހަފުތާތަކެއްގެ ތެރޭގައި އެކްސްޕޯޓް ހުއްޓާލާނެ ކަމަށް ބެލެވޭ ކަމަށާއި، އެކަމުގެ ސަބަބުން ތެލުގެ އަގު ފީފާއެއް 150 ޑޮލަރަށް އެރުން އެކަށީގެންވާ ކަމަށެވެ.

ހަތަރު ޓްރޭޑިން ކުންފުންޏެއްގެ އިސްވެރިންނާއި ހަވާލާދީ ބްލޫމްބާގުން ރިޕޯޓްކުރި ގޮތުގައި ހޮރްމޫޒް ކަނޑުއޮޅި ދިގު މުއްދަތަކަށް ބަންދުވެ، ހަނގުރާމަ ދިގުލައިގެން ދާނަމަ މަދު ދުވަސްކޮޅެއްގެ ތެރޭގައި ތެލުގެ އަގު 100 ޑޮލަރަށް އެރުން އެކަށީގެންވާ ކަމަށެވެ.