ރާއްޖެއަށް ބައެއް ބާވަތްތަކުގެ މަސްތުވާތަކެތި ވަކި މިންވަރަކަށް ވުރެ އިތުރަށް އެތެރެކުރާ މީހުންނަށް މަރުގެ އަދަބު ދެވޭ ގޮތަށް މަސްތުވާތަކެއްޗާ ބެހޭ ގާނޫނަށް ގެނައި އިސްލާހަށް އަމަލުކުރަން ފަށައިފި އެވެ.

މި އިސްލާހަކީ ނިމިދިޔަ ޑިސެމްބަރު މަހުގެ ތިންވަނަ ދުވަހު ރައްޔިތުންގެ މަޖިލީހުން ފާސްކޮށް، އެ މަހުގެ ހަވަނަ ދުވަހު ރައީސުލްޖުމްހޫރިއްޔާ މުހައްމަދު މުއިއްޒު ތަސްދީގު ކުރެއްވި ބިލެކެވެ.

މި ގާނޫނުގެ ދަށުން މަރުގެ އަދަބު ކަނޑައެޅޭނީ ދެ ޝަރުތެއް ފުރިހަމަވާ ނަމަ އެވެ. އެއީ އެތެރެކުރާ މަސްތުވާތަކެތީގެ ބާވަތާއި ބަރުދަނުގެ އިތުރުން، އެ މީހަކު އަމިއްލައަށް އެ ތަކެތި އެތެރެކުރުމެވެ. މަރުގެ އަދަބު ކަނޑައެޅޭ މިންގަނޑުތަކަކީ 350 ގްރާމަށް ވުރެ ގިނަ ކެނެބިސް، 250 ގްރާމަށް ވުރެ ގިނަ ޑައިމޯފިން، ނުވަތަ ގާނޫނުގެ ޖަދުވަލު އެކެއްގައިވާ އެހެން ބާވަތެއް ނަމަ 100 ގްރާމަށް ވުރެ އިތުރުވުމެވެ.

ހުކުމް ތަންފީޒުކުރުމާއި އަދަބުތައް ގާނޫނުގައިވާ ގޮތުން މަރުގެ އަދަބު ތަންފީޒު ކުރެވޭނީ ސުޕްރީމް ކޯޓުގެ މައްސަލަ ބަލާ ފަނޑިޔާރުންގެ ބެންޗުގެ އިއްތިފާގުން އެގޮތަށް ހުކުމް ކުރުމުންނެވެ. ފަނޑިޔާރުންގެ މެދުގައި އިއްތިފާގު ނުވާ ހާލަތްތަކުގައި އިއްވޭނީ އުމުރު ދުވަހުގެ ޖަލު ހުކުމަކާއެކު 100,000 ރުފިޔާ އާއި 10 މިލިއަން ރުފިޔާ އާ ދެމެދުގެ ޖޫރިމަނާއެކެވެ.

މި ގާނޫނުގެ ދަށުން އިއްވާ އުމުރު ދުވަހުގެ ހުކުމަކީ ޕެރޯލްގެ ދަށުން ދޫނުކުރެވޭ އަދި މާފުވެސް ނުދެވޭ ގޮތަށް އެ މީހެއްގެ މުޅި އުމުރަށް ދެވޭ އަދަބެކެވެ.

މި އިސްލާހާ ގުޅޭގޮތުން ރައީސް މުއިއްޒު ވިދާޅުވެފައިވަނީ ސަރުކާރުން އެއްވެސް ހާލެއްގައި މަރުގެ އަދަބު ދޭން ބޭނުންނުވާ ކަމަށާއި، އުންމީދަކީ އެއްވެސް މީހަކު އެފަދަ ކުށަކަށް އަރައިނުގަތުން ކަމަށެވެ. މި އިސްލާހަށް ބޭރުގެ ޖަމިއްޔާތަކުގެ ފާޑުކިޔުން އަމާޒުވެފައިވާއިރު، ސުޕްރީމް ކޯޓުގެ ކުރީގެ ފަނޑިޔާރު ހުސްނުއްސުއޫދު ވެސް ވަނީ މިގޮތަށް ގާނޫނު ބަދަލުކުރުމާ މެދު ދެކޮޅު ހައްދަވާފަ އެވެ.

މަސްތުވާތަކެތީގެ މައްސަލަތަކުގައި ސިންގަޕޫރު ފަދަ ގައުމުތަކުގައި ވެސް މަރުގެ އަދަބު ދެމުންދާއިރު، ރާއްޖޭގައި މިފަދަ ހުކުމެއް ކުރުމުގެ ކުރިން މަތީ މަރުހަލާގެ ކޯޓުތަކުން ހުރިހާ ގާނޫނީ ނުކުތާތަކެއް އަލުން ބަލައި ކަށަވަރު ކުރަން ޖެހޭނެ ކަމަށް ގާނޫނުގައި ބަޔާންކޮށްފައިވެ އެވެ.