އީރާނުން ގަލްފު ސަރަހައްދުގެ އާގުބޯޓުފަހަރަށް ހަމަލާދީ ބަނދަރުތައް ހުއްޓުމަކަށް ގެނައުމާ ގުޅިގެން ބްރެންޓް ކްރޫޑް ތެލުގެ އަގު 9.2 އިންސައްތަ މައްޗަށް ގޮސް ފީފާއެއް 100.37 ޑޮލަރަށް އުފުލި، ދުނިޔޭގެ ހިއްސާގެ ބާޒާރުތައް ބޮޑުތަނުން ވެއްޓިއްޖެ އެވެ.

ރޮއިޓާސްއިން ރިޕޯޓުކުރާ ގޮތުގައި އިރާޤުގެ ކަނޑުގެ ސަރަޙައްދުގައި ދެ ތެޔޮ ޓޭންކަރަކަށް އީރާނުގެ ގޮވާތަކެތި ބަރުކޮށްފައިވާ ބޯޓުތަކުން ހަމަލާ ދީފައިވާ ކަމަށް އިރާޤުގެ ސެކިއުރިޓީ އޮފިޝަލުން ބުރާސްފަތި ދުވަހު ހާމަކޮށްފައިވެ އެވެ. އިރާޤުގެ ތެޔޮ ބަނދަރުތަކުގެ އޮޕަރޭޝަންތައް ވަނީ އެއްކޮށް ހުއްޓާލާފަ އެވެ. ރައްކާތެރިކަމުގެ ފިޔަވަޅެއްގެ ގޮތުން އޮމާނުން ވެސް އެ ޤައުމުގެ މައި ތެޔޮ ބަނދަރު މީނާ އަލް ފަހަލް އިން ހުރިހާ އުޅަނދެއް ވަނީ ބާލައިފަ އެވެ. ހޮރްމޫޒް ކަނޑުއޮޅީގައި ހަނގުރާމަ ފެށުނީއްސުރެ ހަމަލާ އެރި ބޯޓުފަހަރުގެ ޢަދަދު މަދުވެގެން 16 އަށް ވަނީ އަރާފަ އެވެ. ތެހެރާނުން ވަނީ ފީފާއެއް 200 ޑޮލަރަށް ތެޔޮ އުފުލިދާނެ ކަމުގެ އިންޒާރު ދީފަ އެވެ.

އެމެރިކާގެ ކްރޫޑް ތެލުގެ އަގު 8.1 އިންސައްތަ މައްޗަށް ގޮސް ފީފާއެއް 94.26 ޑޮލަރަށް އެރި އެވެ. އިންޓަނޭޝަނަލް އެނާޖީ އެޖެންސީން އެ އެޖެންސީގެ ތާރީހުގައި ވެސް ނެރޭ އެންމެ ބޮޑު އަދަދު ކަމަށްވާ 400 މިލިއަން ފީފާ ތެޔޮ ރިޒާވުން ނެރެން ނިންމި ނަމަވެސް އިންވެސްޓަރުންނަށް ހިތްހަމަޖެހުމެއް ނުލިބުނެވެ. އެމެރިކާއިން އަންނަ ހަފުތާގައި 172 މިލިއަން ފީފާ ނެރޭނެ ކަމަށް ބުނެފައިވެ އެވެ.

ހިއްސާގެ ބާޒާރުތަކަށް ބަލާއިރު، ޖަޕާނުގެ ނިކެއި 1.4 އިންސައްތަ ވެއްޓި، ޗައިނާގެ ބްލޫޗިޕް ހިއްސާ 0.6 އިންސައްތަ ދަށަށް ގޮސް، ހޮންކޮންގެ ހޭންގ ސެންގ 1.2 އިންސައްތަ ވެއްޓުނެވެ. އެސް އެންޑް ޕީ 500 ފިއުޗާސް އާއި ނެސްޑެކް ފިއުޗާސް 0.9 އިންސައްތަ ދަށަށް ދިޔަ އެވެ.