އީރާނާއެކު ކުރިއަށްދާ މަޝްވަރާތަކުގައި ހަނގުރާމަ ހުއްޓާލުމާ ގުޅޭ އެއްބަސްވުމުގެ ބޮޑުބައި މިހާރު ވަނީ ނިމުމަކަށް އައިސްފައި ކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެ އެވެ.

ޓްރަމްޕް ހޮނިހިރު ދުވަހު ހާމަކުރެއްވި ގޮތުގައި، މި އެއްބަސްވުމުގެ ދަށުން ހޮރްމޫޒް ކަނޑުއޮޅި އަލުން ހުޅުވާލުމަށް ވަނީ ހަމަޖެހިފަ އެވެ. ނަމަވެސް، މި އެއްބަސްވުމުގެ އެންމެ ފަހުގެ ކަންކަން ނިންމުމަށް އެމެރިކާ އާއި އީރާނުގެ މަންދޫބުންގެ އިތުރުން އެހެނިހެން ގައުމުތަކުން މަސައްކަތް ކުރަމުންދާ ކަމަށް އޭނާ ވިދާޅުވި އެވެ.

ޓްރަމްޕް މިކަން އިއުލާނު ކުރެއްވީ ގަތަރު، ސައުދީ އަރަބިއްޔާ، ޔޫއޭއީ، ޕާކިސްތާން، އުރުދުން، މިސްރު، ތުރުކީ އަދި ބަހުރޭންގެ ވެރިންނާ ފޯނުން ގުޅުއްވައި މަޝްވަރާ ކުރެއްވުމަށް ފަހުގަ އެވެ. މީގެ އިތުރުން އިޒްރޭލުގެ ބޮޑުވަޒީރު ބެންޖަމިން ނަތަންޔާހޫއާ ވެސް ވަކިން މަޝްވަރާ ކުރެއްވި ކަމަށް ޓްރަމްޕް ވިދާޅުވި އެވެ.

"މި އެއްބަސްވުމުގެ އެންމެ ފަހުގެ ތަފްސީލުތަކާ މެދު މިހާރު މަޝްވަރާ ކުރެވެމުންދަނީ. ވަރަށް އަވަހަށް މީގެ ތަފްސީލުތައް އިއުލާނު ކުރެވޭނެ،" ޓްރަމްޕްގެ 'ޓްރުތު ސޯޝަލް' ޕްލެޓްފޯމުގައި ލިޔުއްވާފައިވެއެވެ.

ޕާކިސްތާނުގެ ބޮޑުވަޒީރު ޝެހްބާޒް ޝަރީފް ވިދާޅުވީ، ދެ ފަރާތުގެ މެދުގައި ވާހަކަދެއްކުންތައް ކުރިއަށް ގެންދިއުމަށް ޕާކިސްތާނުން އެހީތެރިކަން ފޯރުކޮށްދޭނެ ކަމަށާއި، ކުރިއަށް އޮތް ތަނުގައި އެމެރިކާ އާއި އީރާނުގެ ބައްދަލުވުންތައް ޕާކިސްތާނުގައި ބޭއްވޭނެ ކަމަށް އުއްމީދު ކުރައްވާ ކަމަށެވެ.

ތުރުކީގެ ރައީސް ރަޖަބް ތައްޔިބް އުރުދުޣާން ވިދާޅުވި ގޮތުގައި، މަޝްވަރާތައް ކުރިއަށްދާ ގޮތާ މެދު އޭނާ ހިތްހަމަޖެހިވަޑައިގަންނަވައެވެ. އަދި މި އެއްބަސްވުމުގެ ސަބަބުން ހޮރްމޫޒް ކަނޑުއޮޅިން ދަތުރުފަތުރު ކުރުމަށް މަގުފަހިވެގެންދާނެ ކަމަށް ވެސް ވިދާޅުވި އެވެ. މިސްރުގެ ރިޔާސީ އިދާރާއިން ވެސް ވަނީ ހުރިހާ ފަރާތްތަކުން ޑިޕްލޮމެޓިކް ފުރުސަތުގެ ބޭނުން ހިފައި އެއްބަސްވުމަކަށް އައުމަށް ގޮވާލާފަ އެވެ.

މި ހަފްތާ ފެށުނުއިރު ޓްރަމްޕް ވަނީ އީރާނަށް އިންޒާރު ދެއްވައި، އެއްބަސްވުމަކަށް އައުމަށް އޮތް ވަގުތު ކުޑަވަމުންދާ ކަމަށް ވިދާޅުވެފަ އެވެ. އަދި އީރާނަށް ހަމަލާދިނުމަށް ތައްޔާރުވެފައި އޮތް ނަމަވެސް، ގަލްފުގެ ގައުމުތަކުގެ އެދުމުގެ މަތިން އެކަން މަޑުޖައްސާލީ ކަމަށް ވެސް އޭނާ ވިދާޅުވި އެވެ.

މި އިއުލާނު ނެރުނީ ޕާކިސްތާނުގެ އަސްކަރިއްޔާގެ ވެރިޔާ އާސިމް މުނީރު އީރާނަށް ކުރެއްވި ކުރު ނަމަވެސް ނަތީޖާ ރަނގަޅު ދަތުރުފުޅަކަށް ފަހުގަ އެވެ. ޕާކިސްތާނުގެ އަސްކަރިއްޔާއިން ބުނި ގޮތުގައި އެންމެ ފަހުގެ އެއްބަސްވުމަކަށް އައުމަށް އުންމީދީ ކުރިއެރުންތަކެއް ވަނީ ލިބިފަ އެވެ.

ނަމަވެސް، ތެހެރާނުން ވަނީ އެމެރިކާއާ އެކު މަޝްވަރާ ކުރުމުގައި ފަރުވާތެރިވާން ޖެހޭ ކަމަށް ބުނެފަ އެވެ. އެއީ މީގެ ކުރިން ނިއުކްލިއާ ޕްރޮގްރާމާ ގުޅޭ މަޝްވަރާތައް ކުރިއަށް ދަނިކޮށް ދެ ފަހަރެއްގެ މަތިން އެމެރިކާއިން އީރާނަށް ހަމަލާދީފައިވާތީ އެވެ.

އެމެރިކާ އާއި އިޒްރޭލުން އީރާނާ ދެކޮޅަށް ފެށި މި ހަނގުރާމަ ފެބުރުވަރީ 28 ގައި ފެށުނު ނަމަވެސް، އޭޕްރީލް 8 އާ ހަމައަށް ހަނގުރާމަ ވަނީ ބޮޑުތަނުން މަޑުޖެހިފަ އެވެ. އެމެރިކާއިން އީރާނުގެ ބަނދަރުތައް ބަންދުކޮށްފައިވާއިރު، އީރާނުން ވަނީ ހޮރްމޫޒް ކަނޑުއޮޅި ބަންދުކޮށްފަ އެވެ.

މި އެއްބަސްވުމުގައި އެންމެ ބޮޑަށް ހިޔާލުތަފާތުވުން އުޅެނީ އީރާނުގެ ނިއުކްލިއާ ޕްރޮގްރާމާއި، ހޮރްމޫޒް ކަނޑުއޮޅީގެ ކޮންޓްރޯލާއި، ސަރަހައްދުގައި އެމެރިކާގެ ސިފައިން ތިބުމާ ބެހޭ ގޮތުންނެވެ. މީގެ އިތުރުން ހިފަހައްޓާފައިވާ އީރާނުގެ ފައިސާތައް ދޫކޮށްލުމަކީ ވެސް މަޝްވަރާ ކުރެވެމުންދާ މުހިންމު ކަމެކެވެ.