ޔަމަނުގެ ހޫތީ ހަނގުރާމަވެރިން ރަތްކަނޑުން ދަތުރުކުރި ސައުދީ އަރަބިއްޔާގެ ދެ ތެޔޮ ޓޭންކަރަކަށް ހަމަލާދިނުމާ ގުޅިގެން، އީރާނާއި އެގައުމުގެ ބައިވެރިވާ ހޫތީންނަށް ބޮޑު އަސްކަރީ އަދަބެއް ދޭނެ ކަމަށް އެމެރިކާގެ ރައީސް ޑޮނަލްޑް ޓްރަމްޕް ބުރާސްފަތި ދުވަހު ވިދާޅުވެއްޖެ އެވެ.

މި ހަމަލާތަކާއެކު މެދުއިރުމަތީގެ ހަނގުރާމަ މިވަނީ ކަނޑުގެ ދަތުރުފަތުރުގެ ދެވަނަ މުހިންމު ސަރަހައްދަކަށް ފެތުރިފަ އެވެ.

ކަނޑުގެ މަގުތައް ބަންދުވެދާނެ ކަމުގެ ބިރު ބޮޑުވުމާ ގުޅިގެން، ދުނިޔޭގެ ބާޒާރުގައި ތެލުގެ އަގު ވަނީ ހަނގުރާމައިގެ ތެރޭގައި މިހާތަނަށް އުފުލުނު އެންމެ މަތީ މިންވަރަކަށް އުފުލިފަ އެވެ. އެގޮތުން ބްރެންޓް ކްރޫޑްގެ އަގު 6 އިންސައްތައަށް ވުރެ މައްޗަށް ގޮސް، މިދިޔަ މޭ މަހަށްފަހު ފުރަތަމަ ފަހަރަށް ފީފާއެއްގެ އަގު 100 ޑޮލަރަށް ވުރެ މައްޗަށް އަރާފައިވެ އެވެ.

ހަނގުރާމަ ހުއްޓާލުމަށް އެކުލަވައިލި ވަގުތީ އެއްބަސްވުން އުވުނުތާ ދެ ހަފުތާ ފަހުން، އެމެރިކާގެ އަސްކަރިއްޔާއިން ބުރާސްފަތި ދުވަހުގެ ރޭގަނޑުގެ ވަގުތެއްގައި އީރާނަށް ވައިގެ ހަމަލާތަކެއް ދީފައިވެ އެވެ. މީގެ ރައްދުގައި އީރާނުން ވަނީ އެމެރިކާގެ އަސްކަރީ މަރުކަޒުތައް ހުންނަ އަވަށްޓެރި އަރަބި ގައުމުތަކަށް ހަމަލާދީފަ އެވެ. މީގެ އިތުރުން، ބުރާސްފަތި ދުވަހުގެ ރޭ އަދި ހުކުރު ދުވަހުގެ ފަތިހު ވެސް އެމެރިކާއިން ވަނީ އީރާނަށް މިސައިލް ހަމަލާތަކެއް ދީފަ އެވެ. މިއީ މެދުނުކެނޑި ހަމަލާދިން 13 ވަނަ ރެ އެވެ.

އީރާނުގެ ދައުލަތުގެ މީޑިއާއިން ބުނިގޮތުގައި، ހޮރްމޫޒް ކަނޑުއޮޅީގައި އޮންނަ ގެޝްމް ރަށަށް ދެ ރޭ މަތިން މިސައިލް ހަމަލާތަކެއް ވަނީ އަރާފަ އެވެ. ފަސް މަސް ދުވަހަށް ވުރެ ގިނަ ދުވަސްވެފައިވާ މި ހަނގުރާމައިގައި މިހާތަނަށް އެތައް ހާސް ބަޔަކު މަރުވެފައިވާއިރު، މީގެ ސަބަބުން ދުނިޔޭގެ އިގްތިސާދަށް ބޮޑު ލޮޅުމެއް އަރާފާނެ ކަމުގެ ބިރު ވަނީ ހީވެފަ އެވެ.

ޓްރަމްޕް: އީރާނަށް އަދި އެކަށީގެންވާ ވަރުގެ ހަމަލާއެއް ނުދެވޭ

ހޫތީން ދެ ތެޔޮ ޓޭންކަރަށް ހަމަލާދިން ކަމަށް ބުނުމާ ގުޅިގެން، ޓްރަމްޕް ވިދާޅުވީ ދެން ދޭ ކޮންމެ ހަމަލާއެއްގެ ޒިންމާ އީރާނުން އުފުލަން ޖެހޭނެ ކަމަށެވެ.

ޔަމަނުގެ އުތުރާއި ހުޅަނގު ކޮންޓްރޯލް ކުރާ ހޫތީން މި ހަފުތާގައި ބުނެފައި ވަނީ، އެމީހުން ސައުދީ އަރަބިއްޔާއާ ދެކޮޅަށް ކަނޑުގެ ހިސާރުގެ އަމުރެއް ނެރެފައިވާ ކަމަށެވެ. މިއީ އީރާނުން ހޮރްމޫޒް ކަނޑުއޮޅި ބަންދުކުރުމާ ގުޅިގެން، ސައުދީން އެގައުމުގެ ތެޔޮ ރަތްކަނޑުގެ ހޮޅިތައް މެދުވެރިކޮށް ބޭރުކުރަން ފެށުމުން އެކަމަށް ހުރަސް އެޅުމަށް އެޅި ފިޔަވަޅެކެވެ.

"އެ މީހުން މިކަން ތަކުރާރުކޮށްފިނަމަ، އޭގެ ޒިންމާ އެމެރިކާއިން އަޅުވާނީ އީރާނުގެ ބޮލުގައި. އެއީ ހޫތީންނަކީ އީރާނުގެ ބަދަލުގައި މަސައްކަތްކުރާ ބައެއް ކަމަށްވާތީ. އަދި އީރާނަށާއި ހޫތީންނަށް ވަރުގަދަ އަސްކަރީ އަދަބެއް ދެވޭނެ،" ޓްރަމްޕް ސޯޝަލް މީޑިއާގައި ލިޔުއްވާފައިވެ އެވެ.

ޓްރަމްޕް "އެކްސިއޯސް" ނިއުސް އަށް ވިދާޅުވީ، އީރާނުގައި އަސްކަރީ ބޮޑު އޮޕަރޭޝަނެއް އަލުން ފެށުމާމެދު ގޮތެއް ނިންމުމާ ވަރަށް ގާތްވެފައިވާ ކަމަށެވެ.

"އެމީހުންނަށް އަދި އެކަށީގެންވާ ވަރުގެ ތަދެއް ނުލިބޭ،" ޓްރަމްޕް ވިދާޅުވި ކަމަށް އެ ނޫހުން ރިޕޯޓުކޮށްފައިވެ އެވެ.

މީގެ އިތުރުން، މުދާ އުފުލާ އުޅަނދުފަހަރަށް ލިބޭ ކޮންމެ ގެއްލުމަކަށް ބަދަލު ދައްކާނީ އީރާނުގެ ފައިސާ އިން ކަމަށް ޓްރަމްޕް ވިދާޅުވި އެވެ. މިއީ އެމެރިކާގައި ހިފަހައްޓާފައިވާ އީރާނުގެ މާލީ ރަސްމާލަށް އިޝާރާތް ކުރައްވައި ދެއްވި އިންޒާރެކެވެ.

ރޮއިޓާސްއިން ބުނި ގޮތުގައި، ހޫތީން މި ހިސާރު އިއުލާން ކުރުމުގެ ދުވަސްކޮޅެއް ކުރިން އީރާނުގެ ރިވޮލިއުޝަނަރީ ގާޑުންގެ ކޮމާންޑަރުންނާއި އަސްކަރީ މުޝީރުން ވަނީ ޔަމަނަށް ގޮސްފަ އެވެ. ނަމަވެސް ހޫތީން މި ވާހަކަތައް ދޮގުކުރެ އެވެ.

ހޫތީން ބުނާގޮތުގައި އެމީހުން ހަމަލާދީފައިވަނީ ސައުދީގެ "އެންސީލިއާ" އަދި "ލައިލާ" ނަމަކަށް ކިޔާ ދެ ތެޔޮ ޓޭންކަރަށެވެ. ކަނޑުގެ ސަލާމަތީ ކަންކަން ބަލަހައްޓާ ފަރާތްތަކުން ބުނާގޮތުގައި "އެންސީލިއާ" އަށް މިސައިލް ހަމަލާއެއް އެރުމުގެ ސަބަބުން އެ އުޅަނދުގެ ކުރީކޮޅުގައި އަލިފާން ރޯވެފައިވެ އެވެ. މީގެ ސަބަބުން ރަތްކަނޑުގެ ދެކުނު ސަރަހައްދުން ދަތުރުކުރާ އުޅަނދުފަހަރުގެ އިންޝުއަރެންސް ފީ ވަނީ ދެގުނައަށް ބޮޑުވެފަ އެވެ.

މި ހަމަލާތަކުގެ ސަބަބުން "ބާބުލް މަންދަބު" ކަނޑުއޮޅި ބަންދުވެދާނެ ކަމުގެ ބިރު ވަނީ ބޮޑުވެފަ އެވެ. މިއީ ދުނިޔޭގެ ހަކަތަ ފޯރުކޮށްދިނުމުގައި ހޮރްމޫޒް ކަނޑުއޮޅިއަށްފަހު ދެން އޮތް އެންމެ މުހިންމު މަގެވެ. ގިނަ އުޅަނދުފަހަރުތަކެއް މިހާރު ވަނީ މި ސަރަހައްދު ދޫކޮށް، އެފްރިކާ ވަށާލާފައި ދާ މާ ދުރު އަދި އަގުބޮޑު މަގުތަކަށް ދަތުރު ބަދަލުކޮށްފަ އެވެ.

އުރުދުން އަދި ކުވެއިތަށް ހަމަލާދިން ކަމަށް އީރާނުން ބުނުން

އީރާނުން ބުނެފައި ވަނީ އުރުދުންގައި ހުރި އެމެރިކާގެ މިސައިލް ސިސްޓަމްތަކަށާއި، ހަތިޔާރު ގުދަންތަކަށް އަދި ކުވެއިތުގައި ހުރި އެމެރިކާގެ އަސްކަރީ މަރުކަޒުތަކަށް ހަމަލާދީފައިވާ ކަމަށެވެ. އުރުދުންގެ އަސްކަރިއްޔާއިން ބުނީ އީރާނުގެ ހަތަރު މިސައިލަކާއި ހަ ޑްރޯން ހުއްޓުވާފައިވާ ކަމަށެވެ.

އީރާނުން ބުނާގޮތުގައި ކުވެއިތުގައި ހުންނަ އަލް-އަދީރީ ބޭސްއަށް ދިން ހަމަލާއަކީ އެމެރިކާއިން އީރާނުގެ ބޯޑަރު ސަރަހައްދަށް ދިން ހަމަލާގެ ރައްދެކެވެ.

ކޮންގްރެސް

ތެލުގެ އަގު އުފުލުމުގެ ސަބަބުން ދުނިޔޭގެ ބާޒާރުގައި ތަކެތީގެ އަގު ބޮޑުވަމުންދާތީ، އަންނަ ނޮވެމްބަރު މަހު އޮންނަ އިންތިހާބާ ކުރިމަތިލާއިރު ޓްރަމްޕްގެ ރިޕަބްލިކަން ޕާޓީއަށް ވަނީ ބޮޑު ޕްރެޝަރަކާ ކުރިމަތިލާން ޖެހިފަ އެވެ.

އެމެރިކާގެ ހައުސް އޮފް ރެޕްރެޒެންޓޭޓިވްސް އިން ވަނީ އީރާނާ ދެކޮޅަށް ކުރާ އަސްކަރީ ހަރަކާތްތައް ހުއްޓާލުމަށް ޓްރަމްޕަށް އަމުރުކުރާ ގާނޫނެއް ފާސްކޮށްފަ އެވެ. ނަމަވެސް ސެނެޓުން ވަނީ މިފަދަ އެހެން ހުށަހެޅުމެއް ބޭރުކޮށްލާފަ އެވެ.