ހިޔާ ފްލެޓްތަކުގެ ކުލިކުޑަކޮށް، ފިނިޝިންގް މަސައްކަތް ނިންމާ މުއްދަތު އިތުރުކޮށް، މި މަސް ނިމުމުގެ ކުރީން ފްލެޓްތަކަށް ވަދެވޭނެ އިންތިޒާމް ހަމަޖެއްސުމަށް ގޮވާލާ ތައްޔާރުކުރި ޕެޓިޝަން ކަމާ ގުޅޭ އިދާރާތަކަށް މިއަދު ހުށަހަޅައިފި އެވެ.

ހިޔާ ފްލެޓް ލިބުނު ފަރާތްތަކުން އިސްނަގާގެން އެފަރާތުގެ ކަންބޮޑުވުންތައް ދައުލަތުގެ ކަމާގުޅޭ އިދާރާތަކަށް ހުށަހެޅުމަށް މިދިޔަ މަހުގެ 21 ވަނަ ދުވަހު ސޮއިކުރަން ފެއްޓި ޕެޓިޝަން ހުށަހެޅީ ފްލެޓް ލިބުނު 2177 މީހުންގެ ސޮޔާއެކު އެވެ.

"ސޮއި ކުރުމުގައި ދިމާވި އެއްމެ ބޮޑު ގޮންޖެހުމަކީ ކޮވިޑާއި ގުޅިގެން މާލެ ފުރަބަންދުކުރުމާއި، ފްލެޓް ލިބިފައިވާ ގިނަ ފަރާތްތަކެއް ކަރަންޓީނުގައި ތިބުމާއި، އިންޓަނެޓް ލިބުމުގައި ހުރި ދަތިކަން،" ޕެޓިޝަނުގައި ސޮއިކުރުމުގައި އިސްކޮށް ހަރަކާތްތެރިވި މީހަކު ބުންޏެވެ.

އެ ޕެޓިޝަން ހުށަހަޅާފައި ވަނީ ރައީސް އޮފީހާއި، ފްލެޓް ކޮމިޓީ އަށާއި ހައުސިން މިނިސްޓްރީ އަށާއި މާލޭ ސިޓީ ކައުންސިލަށެވެ.

ޕެޓިޝަނަކީ ދައުލަތުގެ ކަމާއި ގުޅޭ ވުޒާރާތަކުގައި ފްލެޓް ލިބުނު ފަރާތްތަކުން ދަންނަވާ އާދޭސްތަކެއްގެ މައްޗަށް ބިނާކޮށް ޖުމްލަ 5 ނުކުތާއެއްގެ މައްޗަށް ތައްޔާރުކޮށްފައިވާ ޕެޓިޝަނެއް ކަމަށް އެކަމުގައި އިސްކޮށް ހަރަކާތްތެރިވި މީހަކު ބުންޏެވެ.

ހިޔާ ފުލެޓުތަކަށް ވަދެވޭނެ ކަމުގެ އިންތިޒާރުގައި ތިބޭތާ ތިންއަހަރު ފުރެން ގާތްވަމުން ދާއިރު، އެފަރާތްތަކުގެ މި ހިތްދަތި ދިގު އިންތިޒާރަށް އިތުރު ހިތްދަތިކަމެއް ގެނުވަނީ ކޮވިޑް-19ގެ ބަލިމަޑުކަމުގެ ސަބަބުން ކުރިމަތިލާންޖެހިފައި މިވާ ދަތި އުނދަގޫ ހާލަތެވެ.

ކޯވިޑްގެ ހާސްކަމާއެކު ހިޔާ ފްލެޓް ލިބިފައިވާ އެތަކެއް އާއިލާއެއް މިވަނީ ގޮތް ހުސްވެފައެވެ. މާލީގޮތުން އާއިލާތަކަށް ބޮޑެތި ގޮންޖެހުންތަކާ ކުރިމަތިވެ ވަޒީފާތައް ގެއްލި ކުލިދެއްކޭނޭ ގޮތެއް ނެތި މަގުމަތިވެފައެވެ. ދަރިންގެ ތައުލީމާ މެދު ކުރަމުން އަންނަ ފޮނި އުންމީދުތައް ފުނޑުފުނޑުވެ، ހިތާ ދެކޮޅަށް ދަރިން ގޮވައިގެން ރަށްރަށަށް ބަދަލުވުމަށް ވެސް އެއްބަޔަކަށް މިވަނީ މަޖުބޫރުވެފައެވެ.

"މި ހާލަތުގައި އޮތް ހަމައެކަނި އުންމީދަކީ، ހިޔާ ފުލެޓް،" އޭނާ ބުންޏެވެ.

ހަ ހާހަށް ވުރެ ގިނަ އާއިލާތަކުން ގާތްގަނޑަކަށް 35 ހާހެއްހާ ދިވެހީންގެ އަޑު ސަރުކާރުގެ ކަމާގުޅޭ ވުޒާރާތަކަށް އިއްވާފައިވާއިރު އެފަރާތްތަކުގެ އެދުމަކީ އެފަރާތްތަކުގެ އާދޭސްތައް އައްސަވައި، ޕެޓިޝަންގައިވާ ކަންކަން ރަނގަޅު ނިޒާމެއްގެ ދަށުން އިންތިޒާމްކޮށްދެއްވައި، ދެންއިތުރަށް ލަސްނުވެ، ހިޔާ ފުލެޓުތަކުގައި އެފަރާތްތަކަށް ދިރިއުޅެވޭނެ މަގު ފަހިކޮށްދެއްވައި، އެފަރާތްތަކުގެ މި ދިގުލައިގެންދާ އިންތިޒާރަށް އުފާވެރި ނިމުމެއް ގެނެސް ދިނުމެވެ.