ގެވެށި އަނިޔާގެ ކުރިކަމުގެ ތުހުމަތު ކުރެވިފައިވާ ކެނދިކުޅުދޫ ދާއިރާގެ ރައްޔިތުންގެ މަޖިލީހުގެ މެމްބަރު އަހުމަދު އީސަގެ މައްސަލަ ކާމިޔާބު ކުރެވޭނެކަމުގެ ޔަގީންކަން އެބައޮތްކަމަށް ޕްރޮސެކިއުޓާ ޖެނެރަލް (ޕީޖީ) ހުސެއިން ޝަމީމު ވިދާޅުވެއްޖެ އެވެ.

އީސައާ ދެކޮޅަށް ބަލާ ގެވެށި އަނިޔާގެ މައްސަލައަކީ އޭނާގެ އަނބިކަނބަލުން އަސްރާ ނަސީމް (އަސޫ)ގެ ގައިގައި ތަޅައި މާރާމާރީ ހިންގައި، ދަރިފުޅު އަސްރާގެ އަތުން ގަދަކަމުން އަތުލައި ގޭގެ ބެލްކަނިން ބޭރަށް، މަގު މައްޗަށް އެ ކުއްޖާ ދިއްކޮށް ވައްޓާލައި މަރާލާނެ ކަމުގެ އިންޒާރު ދިން މައްސަލައެކެވެ.

މިއަދު ބޭއްވި ޕީޖީ އޮފީހުން ބޭއްވި ނޫސްވެރިންގެ ބައްދަލުވުމުގައި ޝަމީމު ވިދާޅުވީ، އީސަގެ މައްސަލާގައި އަނިޔާ ލިބުނު ކަމަށް ބުނާ އަސްރާ ދައުވާ އަނބުރާ ގެންދިޔުމަށް އެދިފައިވީ ނަމަވެސް، މައްސަލަ ކާމިޔާބު ކުރެވޭނެ ކަމުގެ ޔަގީންކަން އެބަ އޮތް ކަމަށެވެ. އެ މައްސަލާގައި އީސަގެ މައްޗަށް އަނިޔާއެއް ދިނުމުގެ ދައުވާ އުފުލައި، ޝަރީއަތް ފެށުމަށް ވަނީ ތައްޔާރުވެފަ އެވެ.

ޕީޖީ އޮފީހަށް އީސަގެ މައްސަލަ ފޮނުވުމުން އަސްރާ ވަނީ މައްސަލަ އަނބުރާ ގެންދިޔުމަށް ވަނީ އެދިފަ އެވެ. އަދި، އޭނާ އީސައާ ގުޅޭ ގޮތުން ވާހަކަ ދެއްކީ ޖަޒުބާތުގައި ކަމަށް ވެސް ވަނީ ބުނެފަ އެވެ. ނަމަވެސް ޝަމީމު ވިދާޅުވީީ، އެ މައްސަލާގައި ކޯޓުގައި ދައުލަތަށް ކާމިޔާބު ހޯދޭނެ ކަމަށް ގަބޫލު ކުރައްވާ ކަމަށެވެ.

އަދި ވިދާޅުވީ، ވިކްޓިމް އަލުން ބްލޭމްކޮށް، ރީވިކްޓިމައިޒްވާން ބޭނުން ނުވާ ކަމަށެވެ. އެހެންވެ، މަސައްކަތް ކުރައްވާނީ ވިކްޓިމްއަށް އިތުރަށް ގެއްލުން ނުދީ، ތުރާނުކޮށް މައްސަލަ ކުރިއަށް ގެންދިޔުމަށް ކަމަށެވެ.

ގެވެށި އަނިޔާގެ ތުހުމަތުކޮށް، ފަހުން އީސަގެ ދިފާއުގައި ތެދުވެވަޑައިގެން މައްސަލަ ކުރިއަށް ނުގެންދަން އަސްރާ ބޭނުންވާއިރު، އަނިޔާއާ ގުޅިގެން ފޭސްބުކްގައި ކުރިން ލިއުއްވި ޕޯސްޓެއްގައި ވިދާޅުވީ އެ ހާދިސާ އިން އޭނާ އާއި ދަރިފުޅަށް އުނދަގޫ އިހްސާސްތަކެއް ކުރަން ޖެހުނު ކަމަށެވެ. އަދި އެއީ، ދުވަހަކު ވެސް ކުރިމަތިވެދާނެ ކަަމަށް ހީކުރެއްވި ތަޖުރިބާތަކެއް ނޫން ކަމަށް ވިދާޅުވި އެވެ.

އެ ތުހުމަތުތަކަށް އިންކާރު ކުރައްވައި އީސަ ވިދާޅުވެފައި ވަނީ ގާނޫނުތަކާއި ގަވާއިދުތަކާ ހިލާފު އެއްވެސް އަމަލެއް ކޮށްފައި ނުވާނެ ކަމުގެ ޔަގީންކަން އަރުވާ ކަމަށެވެ. މި މައްސަލައިގައި ފާޑުކިއުން އަމާޒުވެ ޕްރެޝާ ބޮޑުވުމުން އޭނާ ވަނީ އިޖުތިމާއީ ކޮމިޓީގެ މުގައްރިރު ކަމުން ވެސް އިސްތިއުފާ ދެއްވައިފަ އެވެ. އެއީ، އޭނާއަށް ތުހުމަތުކުރާ ގެވެށި އަނިޔާގެ މައްސަލައެއް ބަލާތީ، މުއައްސަސަތަކަށް އެއްބާރުލުން ދެއްވުމުގެ ގޮތުން ކަަމަށެވެ.