ޖާނުން ފިދާވުމުގެ ހަމަލާ ދިވެހީންގެ ތެރެއަށް އަންނާނެ ކަމަށް ރައްޔިތުންގެ މަޖިލީހުގެ ރައީސް އަދި ކުރީގެ ރައީސް މުހައްމަދު ނަޝީދު ވިދާޅުވެއްޖެ އެވެ.

ކްލަބް ހައުސްގެ އެމްޑީޕީ ހަރުގެ އިފްތިތާހު ކުރުމަށް މިރޭ ބޭއްވި ރަސްމިއްޔާތުގައި ވާހަކަ ދައްކަވަމުން ރައީސް ނަޝީދު ވިދާޅުވީ ރާއްޖޭގައި އޮތް ހަރުކަށި ފިކުރުގެ ކަންތައްތައް ކޮންޓްރޯލް ކުރުމަށްޓަކައި އަވަސް ފިޔަވަޅުތަކެއް ނާޅައިފިނަމަ، ޖާނުން ފިދާވުމުގެ ހަމަލާ ރާއްޖެއަށް އަންނާނެ ކަމަށެވެ.

އެމަނިކުފާނު ވިދާޅުވީ ގައުމު ތަކުގެ ހަޔާތަށް ބަލާލާއިރު ސަލާމަތާ ރައްކާތެރިކަން ގެއްލޭ ގޮތާއި އަދި ގެއްލިގެންދާ މިންވަރު ބަޔާންކުރާ ނިޝާންތައް ފެންނަ ކަމަށެވެ.

ރާއްޖެއަށް ބަލާއިރު، އެންމެ ފުރަތަމަ އާންމުވި ކަމަކީ ހުޅުޖެހުން ކަމަށާއި ނަމަވެސް ޓެކްނޮލޮޖީ ކުރިއަރައިގެން ގޮސް ޖާނުން ފިދާވުމުގެ ހަމަލާތައް ދިނުމާ ހަމައަށް ކަންތައްތައް ގޮސްފައިވާ ކަމަށް ރައީސް ނަޝީދު ފާހަގަކުރެއްވި އެވެ.

"އެއީ ޖާނުން ފިދާ ވުމުގެ ހަމަލާ އަޅުގަނޑުމެންގެ ތެރެއަށް އަންނަން ފެށުން. އަޅުގަނޑު ދެކޭ ގޮތުގައި އެކަންވެސް އަޅުގަނޑުމެންގެ ތެރެއަށް އަންނާނެ އަޅުގަނޑުމެން މިކަމަށް ވަރަށް އަވަސް ފިޔަވަޅު ތަކެއް ނާޅާފި ނަމަ،" ނަޝީދު ވިދާޅުވި އެވެ.

ޖާނުން ފިދާވުމުގެ ހަމަލާއެއް ރާއްޖެ އަޔަނުދިނުމަށްޓަކައި ދީނީގޮތުން ހައްދުފަހަނަ އަޅާފައިވާ މީހުން ހިފައި ހައްޔަރުކުރުމަށް ވެސް އެމަނިކުފާނު ވަނީ ގޮވާލައްވާފަ އެވެ.

މިދިޔަ މެއި މަހުގެ ހަ ވަނަ ދުވަހުގެ ރޭ ރައީސް ނަޝީދަށް އަމާޒުކޮށް ދިން ޓެރަރިސްޓް ހަމަލާ ދިނުމުގައި އަމަލީގޮތުން ބައިވެރިވީ ހަރުކަށި ފިކުރަށް ތާއީދުކުރާ ބަޔަކު ކަމަށް ފުލުހުން ވަނީ ބުނެފަ އެވެ. އެ ހަމަލާއަށްފަހު ފުލުހުން އަންނަނީ އެފަދަ މީހުން ހޯދުމަށް ހާއްސަ އޮޕަރޭޝަންތަކެއް ހިންގަމުންނެވެ.

ރައީސް ނަޝީދު މިވަގުތު ހުންނެވީ ލިބިވަޑައިގެންނެވި ހަމަލާގައި ޒަހަމްތަކަށް ފަރުވާ ހޯއްދެވުމަށް ޖަރުމަނުގަ އެވެ.