ސަރުކާރުގެ ފަރާތުން ޖުޑީޝަލް ސާވިސް ކޮމިޝަން (ޖޭއެސްސީ)ގެ ރައީސް އަދި ރައްޔިތުން މަޖިލީހުގެ ތުޅާދޫ ދާއިރާގެ މެމްބަރު ހިސާން ހުސެއިން ހުށަހެޅުއްވި ނަފްރަތު މާނަކުރުމުގެ ބިލަށް ސަރުކާރުން ކުރަމުން އައި ތާއިދު ގެއްލުމުން ކުރީގެ ރައީސް، ރައްޔިތުން މަޖިލީހުގެ ރައީސް، މުހައްމަދު ނަޝީދަށް ތާއިދުކުރާ އެމްޑީޕީ މަޖިލިސް މެމްބަރުން ސަރުކާރަށް ވަރަށް ބޮޑަށް ފާޑު ވިދާޅުވެއްޖެ އެވެ.

އެމްޑީޕީ އެތެރޭގައި މިހާރު ވަނީ ދެ ފެކްޝަނެއް އުފެދިފަ އެވެ. އެއީ ރައީސް އިބްރާހީމް މުހައްމަދު ސޯލިހުއަށް ތާއިދު ކުރައްވާ ފެކްޝަނާއި ކުރީގެ ރައީސް ނަޝީދަށް ތާއީދު ކުރައްވާ ފެކްޝަނެވެ. ރައްޔިތުންގެ މަޖިލީހުގެ އެމްޑީޕީގެ މެމްބަރުންގެ ތެރެއިން ގިނަ މެމްބަރުން ރައީސް ސޯލިހަށް ތާއިދު ކުރައްވާއިރު ނަޝީދަށް ތާއީދު ކުރައްވަނީ މަދު މެމްބަރުންތަކެވެ. މީގެ އިތުރުން މިނިސްޓަރުންގެ ތެރެއިން ވެސް ގިނައީ ރައީސް ސޯލިހަށް ތާއީދު ކުރައްވާ ބޭފުޅުންނެވެ.

މިއަދު ކުރިއަށް ދިޔަ ނަފްރަތު މާނަކުރުމުގެ އެ ބިލު ފާސްކުރުމުގެ ގޮތުން މަޖިލީހުގެ ތަޅުމުގައި ބަހުސްތައް ކުރިއަށް ދިޔައިރު އެމްޑީޕީގެ ޕީޖީ ލީޑަރު އަދި މެދު ހެންވޭރު ދާއިރާގެ މެމްބަރު އަލީ އާޒިމް ވެސް ބޭނުންވީ ބިލު އަނބުރާ ކޮމިޓީއަށް ފޮނުވާލައިގެން އިސްލާހު ކުރުމަށެވެ. ނަމަވެސް އެ ބިލު މިއަދު ކޮންމެހެން ފާސްކުރަން އެމްޑީޕީގެ ބައެއް މެމްބަރުން ބޭނުންވި އެވެ.

ބަހުސްގައި ބައިވެރިވި ޖުޑިޝަރީ ކޮމެޓީގެ މުގައްރިރު އަދި މާފަންނު އުތުރު ދާއިރާގެ މެމްބަރު އިމްތިޔާޒް ފަހުމީ ވިދާޅުވީ ސަރުކާރުގެ ފަރާތުން ބިލު ހުށަހެޅުއްވުމަށް ފަހު އެ ބިލުގެ ދިފާއުގައި ސަރުކާރުން ނުނިކުންނަވާތީ ކަންބޮޑުވެވަޑައިގަންނަވާ ކަމަށެވެ. އޭނާ އެގޮތަށް ވިދާޅުވީ ނުރުހުމުގެ ރާގުގަ އެވެ.

ބިލް ހުށަހެޅުއްވި ހިސާނުގެ ފުރާނައަށް ނުރައްކާވާ ވަރަށް ކުރިމަތިވެވަޑައިގެންނެވި ކަމަށާއި އެހެންކަމުން ބިލު ދިރާސާކުރި ޖުޑިޝަރީ ކޮމިޓީގެ މެމްބަރުންނަށް ވެސް ނުރައްކާތައް ކުރިމަތިވާނެ ކަމަށް އިމްތިޔާޒް ވިދާޅުވި އެވެ.

އުނގޫފާރު ދާއިރާގެ މެމްބަރު މުހައްމަދު ވަހީދު (ވައްޑެ) ވެސް ތާއިދުކުރެއްވީ އާޒިމް ހުށަހެޅުއްވި ގޮތަށް ބިލު އަނބުރާ ކޮމިޓީއަށް ފޮނުވުމަށެވެ. ނަމަވެސް ސަރުކާރުން ބިލު ސްޕޮންސާކުރުމަށްފަހު ހިސާންގެ ދިފާއުގައި ނުނުކުންނެވުމުން އެކަމަށް ފާޑު ވިދާޅުވި އެވެ. އަދި ހިތްވަރު ނެތްނަމަ އެފަދަ ބިލުތައް ނުފޮނުވުމަށް އޭނާ ވަނީ ސަރުކާރަށް ގޮވާލައިފަ އެވެ.

މަޖިލީހުގެ ނައިބު ރައީސް އީވާ އަބްދުﷲ ބަހުސްގައި ވާހަކަ ދައްކަވަމުން އެންމެ ބޮޑު ކަންބޮޑުވުމެއްގެ ގޮތުގައި ފާހަގަކުރެއްވީ ބިލާއެކު ހިސާނަށް ކުރިމަތިވި ނުރައްކަލެވެ. އަދި އެ ބިރުވެރިކަމުގެ ތެރޭގައި ވެސް ހިސާންގެ ދިފާއުގައި އެއްޗެއް ވިދާޅުވީ ހަމައެކަނި އެޓާނީ ޖެނެރަލް ކަމަށާއި ސަރުކާރުގެ އެހެން އެއްވެސް ބޭފުޅަކު ހިސާންގެ ދިފާއުގައި ވާހަކަ ނުދައްކަވާ ކަމަށެވެ.