ރާއްޖޭގެ ދެކުނުގެ ރަށެއްގައި 18 އަހަރު ނުފުރޭ ކުޑަ އަންހެން ކުއްޖަކަށް ޖިންސީ ގޯނާ ކުރިކަމުގެ މައްސަލައެއް ފުލުހުން ބަލަން ފަށައިފި އެވެ.

ފުލުހުންގެ މީޑިއާ އޮފިޝަލަކު ވިދާޅުވީ އަޕާ ސައުތު ޑިވިޝަންގައިވާ ރަށެއްގައި ކުޑަ އަންހެން ކުއްޖަކަށް ޖިންސީ ގޯނާކުރިކަމުގެ މައްސަލައެއް ފުލުހުންގެ އިދާރާއަށް ހުށަހަޅާފައި ވަނީ މިދިޔަ މަހުގެ 23 ވަނަ ދުވަހު ކަމަށެވެ. އަދި އެ މައްސަލައާ ގުޅިގެން އަނިޔާލިބިފައި ވަނީ އުމުރުން 17 އަހަރުގެ ކުޑަ އަންހެން ކުއްޖަކަށް ކަމަށް އެ އޮފިޝަލް ވިދާޅުވި އެވެ.

އެ ކުއްޖާއަށް ޖިންސީ ގޯނާ ލިބިފައިވަނީ އިންޑިއާގެ ޓީޗަރެއްގެ ފަރާތުން ކަމަށް ސޯޝަލް މީޑިއާގައި ދަނީ އަޑު ފެތުރެމުންނެވެ. އެހެންނަމަވެސް މިހާތަނަށް އޭނާ މި މައްސަލައިގެ ތުހުމަތުގައި ހައްޔަރުކޮށްފައިވާކަން ނުވަތަ ނޫންކަން ފުލުހުން ނުބުނެ އެވެ.

މީގެ އިތުރުން މި މައްސަލައާއި ގުޅިގެން އޭނާ މިހާރު ވަނީ ވަޒީފާއަށް ނުނިކުތުމަށް އަންގައި، ސަސްޕެންޝަންގައި ކަމަށް އެޑިއުކޭޝަން މިނިސްޓްރީން ބުންޏެވެ.

ފުލުހުން ބުނީ އެ އިދާރާއިން މި މައްސަލަ އިތުރަށް ތަހުގީގުކޮށް ކުރިއަށް ގެންދާ ކަމަށެވެ.

ޖިންސީ އަނިޔާގެ މައްސަލަތައް ރާއްޖޭގައި ދުވަހެއް ދުވަހަކަށް އިތުރުވަމުންދާއިރު، އެންމެ ގިނައިން ރިޕޯޓުކުރެވޭ މައްސަލަތަކުގެ ތެރޭގައި 18 އަހަރު ނުފުރޭ ކުޑަ ކުދިންގެ މައްސަލަތައް ގިނަކަން ޖެންޑާ މިނިސްޓްރީގެ ތަފާސްހިސާބުތަކުން ދައްކަ އެވެ. ހަމައެހެންމެ މިފަދަ މައްސަލަތަކާއި މެދުގައި އެކަށީގެންވާ ފިޔަވަޅު ނޭޅޭ ކަމަށާއި، އަނިޔާ ލިބޭ ފަރާތްތަކަށް އިންސާފު ގާއިމުނުކުރެވޭކަމަށް ބުނެ އާންމުން ދަނީ ތަކުރާރުކޮށް އިއުތިޖާޖު ކުރަމުންނެވެ.