އިންޓެލިޖެންސް ފުލުހުން ކަމަށް ބުނެ ފަރިވާ ސްޓޭ ގެސްޓްހައުސްއަށް ވަދެ ފޭރުނު މައްސަލައިގައި މިހާތަނަށް ތިން މީހަކު ހައްޔަރު ކޮށްފިއެވެ.

މިދިޔަ ހަފްތާ ބުދަ ދުވަހުގެ ހެނދުނުގެ ވަގުތެއްގައި މަޖީދީމަގު ފަރިވާ ސްޓޭ 3 ގެސްޓު ހައުސްއަށް މީހަކު ވަދެ ޕޮލިސް އިންޓެލިޖެންސް އިން ކަމަށް ބުނެ އެތަނުގެ ތިން މުވައްޒަފަކު ކްލިޕް އަޅުވައި ވަނީ ބަނދެފަ އެވެ.

އެއަށްފަހު އެތަނުގެ ބައެއް ތަކެތި ފޭރިގެން ގޮސްފައިވާ ކަމަށް ފުލުހުންނަށް ވަނީ ރިޕޯޓުކޮށްފަ އެވެ.

ފުލުހުން ދެންމެ ވިދާޅުވީ މިމައްސަލައިގެ ތުހުމަތުގައި އިތުރު ދެމީހަކު މިހާރު ހައްޔަރުކޮށްފައިވާ ކަމަށެވެ. ފުލުހުންނަށް ހެދިގެން ގެސްޓްހައުސްއަކަށް ވަދެ ފޭރިފައި ވަނީ ނޮވެމްބަރ މަހުގެ 11 ދުވަހުގެ ހެނދުނު އެވެ. އެމައްސަލައިގައި ފުރަތަމަ މީހަކު ހައްޔަރު ކުރީ ނޮވެމްބަރު މަހުގެ 12 ވަނަ ދުވަހު އެވެ. އެއީ 42 އަހަރުގެ ދިވެހި ފިރިހެނެކެވެ.

ފުލުހުން މިއަދު ބުނީ ފޭރުނު މައްސަލައިގައި ފަހުން ހައްޔަރު ކޮށްފައި ވަނީ 43 އަހަރުގެ ފިރިހެނަކާއި 38 އަހަރުގެ ފިރިހެނެއް ކަމަށެވެ. މި ދެ މީހުންނަކީ ވެސް ދިވެހިންނެވެ.

މިމައްސަލަ އާއި ގުޅިގެން ކުރިއަށް ގެންދާ ތަހުގީގުގައި މިހާރު ފުލުހުން ވަނީ ފޭރުނު ބައެއް ތަކެތި ހޯދާފައި ކަމަށް ފުލުހުން ބުންޏެވެ.

"މިމައްސަލައިގައި ފަހުން ހައްޔަރުކުރި ދެމީހުންގެ ބަންދުގެ މުއްދަތާއި މެދު ގޮތެއް ނިންމަން ކޯޓަށް ހާޒިރުކުރުމުން މިނިސްޓްރީ އޮފް ހޯމްއެފެއާޒުން ކަނޑައަޅާ ތަނެއްގައި ބަންދުގައި ބައިތިއްބައިގެން ތަހުގީގު ކުރިއަށް ގެންދަން 15 ދުވަހުގެ މުއްދަތެއް ވަނީ ދީފަ އެވެ." ފުލުހުން ބުންޏެވެ.