ލޭބާ ޕާޓީ އުވާލަން ނިންމައިފި

3،000 މެމްބަރުން ހަމަނުވާތީ މޯލްޑިވްސް ލޭބާ އެންޑް ސޯޝަލް ޑިމޮކްރަޓިކް ޕާޓީ (އެމްއެލްއެސްޑީޕީ) އުވާލަން އިލެކްޝަން ކޮމިޝަނުން ނިންމައިފި އެވެ.

އިލެކްޝަން ކޮމިޝަނުން ނެރުނު ބަޔާނެއްގައި ބުނެފައިވަނީ ސިޔާސީ ޕާޓީއެއް ވުޖޫދުގައި އޮތުމަށް ގާނޫނު ވާޖިބުކުރާ 3،000 މެންބަރުން ހަމަކުރުމަށް ލޭބާ ޕާޓީއަށް ތިން މަސް ދުވަސްދެވި، އެ މުއްދަތު ޖޫން 14 ވަނަ ދުވަހަށް ހަމަވިއިރު، 3،000 މެމްބަރުން އެ ޕާޓީއަށް ހަމަވެފައިނުވާ ކަމަށެވެ.

އިލެކްޝަނުން ވަނީ އެއްވެސް ސިޔާސީ ހަރަކާތެއް މީގެ ފަހުން ނުހިންގުމަށް ވެސް އެ ޕާޓީއަށް އަންގާފަ އެވެ. އަދި މިހާރު ކުރިއަށްދަނީ ސިޔާސީ ޕާޓީތަކުގެ ގާނޫނުގައި ބުނާ ގޮތުގެ މަތީން ޕާޓީ އުވާލުމުގެ އިޖުރާއަތުތައް ފުރިހަމަ ކުރުމުގެ މަސައްކަތް ކަމުގައި އިލެކްޝަނުން ބުނެ އެވެ.

ލޭބާ ޕާޓީ އުފައްދައި، އިސްކޮށް ހަރަކާތްތެރިވެފައިވަނީ އެމްޑީޕީގެ ކުރީގެ މެމްބަރު އަދި ގާނޫނީ ވަކީލު ހަސީން އެވެ.

މިއީ ފަހުގެ ތާރީޚެއްގައި މެމްބަރުން ހަމަނުވެގެން ޕާޓީއެއް އުވާލަން ނިންމި ފުރަތަމަ ފަހަރެވެ.

ތިންހާސް މެންބަރުން ހަމަނުވާ 4 ޕާޓީއަކަށް މެންބަރުން ހަމަކުރުމަށް ދިން މުއްދަތުގައި މެންބަރުން ހަމަކޮށްފައިވަނީ، ޑީއާރުޕީ، އެމްޓީޑީއާއި އެމްއާރުއެމް އިންނެވެ.

ސިޔާސީ ޕާޓީތަކުގައި މެންބަރުން ތިބި އަދަދަށް ބަލާއިރު، ދައުލަތުގެ ބަޖެޓުން ފައިސާ ދޫކުރާވަރަށް މެމްބަރުންގެ އަދަދު ހަމަވަނީ 4 ޕާޓީއެއްގައެވެ. އެއީ ވެރިކަން ކުރާ މައި ޕާޓީ، އެމްޑީޕީއާއި އިދިކޮޅު ޕީޕީއެމްގެ އިތުރުން ސަރުކާރު ކޯލިޝަންގައި ހިމެނޭ ޖުމްހޫރީ ޕާޓީއާއި އަދާލަތު ޕާޓީ އެވެ.