ރިޔާސީ ޓިކެޓު ހަވާލުކުރުމަށް ބާއްވާ ޖަލްސާ ހުއްޓުވައިދެން ކޯޓަށް މައްސަލަ ހުށަހަޅާފައި ވަނިކޮށް ޖަލްސާ ބާއްވައި ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހު އަށް އެމްޑީޕީގެ ރިސާސީ ޓިކެޓު ހަވާލުކޮށްފި އެވެ.

ރައީސް ސޯލިހުއަށް އެމްޑީޕީގެ ރިޔާސީ ޓިކެޓު ހަވާލުކުރީ މިރޭ މިކަމަށްޓަކާ ކާނިވާ ސަރަހައްދުގައި ބޭއްވި ހާއްސަ ރަސްމިއްޔާތުގައި އެވެ.

ރައީސް ސޯލިހުއަށް އެމްޑީޕީގެ ރިޔާސީ ޓިކެޓު ހަވާލުކުރުމަށް މިރޭ ބޭއްވި ޖަލްސާއަށް ރައީސް ނަޝީދު ވަޑައިގެންފައެއް ނުވެއެވެ. އަދި ރައީސް ނަޝީދު ފެކްޝަންގެ އެއްވެސް ބޭފުޅެއްވެސް ވަޑައިގެންފައެއް ނުވެ އެވެ.

ރައީސް އަށް އެމްޑީޕީގެ ރިޔާސީ ޓިކެޓު ހަވާލުކުރި އިރު މިރޭގެ ޖަލްސާ ހުއްޓުވައިދިނުމަށް އެދި އެމްޑީޕީގެ ރައީސް އަދި މަޖިލީހުގެ ރައީސް މުހައްމަދު ނަޝީދުގެ އަރިސް ބޭފުޅެއް ވަނީ މައްސަލަ ސިވިލްކޯޓަށް ހުށަހަޅާފައި އެވެ.

މިމައްސަލަ ސިވިލްކޯޓަށް ހުށަހަޅާފައިވަނީ ރައްޔިތުންގެ މަޖިލީހުގެ ހެންވޭރު ދެކުނު ދާއިރާގެ މެމްބަރު އަދި މިހާރު ޕޮލިސް ބޯޑުގައިވެސް ހިމެނިވަޑައިގަންނަވާ ހާމިދު އަބްދުލް ގަފޫރެވެ. އަދި މިމައްސަލާގައި އޭނާގެ ވަކީލެއްގެ ގޮތުގައި މަސައްކަތް ކުރައްވަނީ ކުރީގެ ބަންޑާރަ ނައިބު ދިޔާނާ ސައީދެވެ.

ސިވިލް ކޯޓަށް ހުށަހަޅާފައިވާ މައްސަލާގައި އެދިފައިވަނީ އެމްޑީޕީން މިދިޔަ މަހުގެ 28 ވަނަ ދުވަހު ބޭއްވި ޕްރައިމަރީ ބާތިލް ކޮށްދިނުމަށާއި މި އަންނަ ހުކުރު ދުވަހުގެ ރޭ ރައީސް އިބްރާހީމް މުހައްމަދު ސޯލިހު އަށް ރިޔާސީ ޓިކެޓު އެރުވުމަށް ބާއްވާ ޖަލްސާ ހުއްޓުވުމަށް ވަގުތީ އަމުރެއް ނެރެ ދިނުމަށެވެ. އަދި ޕްރައިމަރީ އާއި ދިމާކޮށް އެމްޑީޕީން 39،000 މެމްބަރުން ވަކިކުރި މައްސަލަ ބަލައި ދިނުމަށް ވެސް ކޯޓަށް ހުށަހެޅި މައްސަލާގައި އެދިފައިވެ އެވެ.

މިދިޔަ މަހު ބޭއްވި އެމްޑީޕީގެ ރިޔާސީ ޕްރައިމަރީ އިބްރާހީމް މުހައްމަދު ސޯލިހު ކާމިޔާބު ކުރެއްވީ އެމްޑީޕީގެ ރައީސް މުހައްމަދު ނަޝީދާ ވާދަކުރައްވާ ބޮޑު ތަފާތަކުންނެވެ.

މިދިޔަ މަހު 28 ގައި ބޭއްވި އެމްޑީޕީގެ ރިޔާސީ ޕްރައިމަރީގައި ރައީސް ނަޝީދާ ވާދަކުރައްވައި ބޮޑު ތަފާތަކުން އިންތިހާބު ކާމިޔާބު ކުރެއްވީ ރައީސް ސޯލިހެވެ. ޕްރައިމަރީގައި ރައީސަށް 61 ޕަސެންޓް ވޯޓު ލިބިވަޑައިގެންނެވި އިރު، ނަޝީދަށް ލިބިވަޑައިގަތީ 39 ޕަސެންޓެވެ.