ބޮލީވުޑްގެ ރަސްގެފާނު ޝާހްރުކް ހާންގެ އަންހެން ދަރިފުޅު ސުހާނާ ޚާނާއެކު ފެނިގެންދާ ފިލްމަކީ އެކްޝަން ތުރީލާއެއް ކަމަށް ރިޕޯޓްތައް ބުނެފި އެވެ.

ބޮލީވުޑް ހަބަރުތައް ގެނެސްދޭ މީޑިއާތަކުގައި ބުނެފައިވާ ގޮތުގައި ޝާހްރުކް އާއި ސުހާނާ އެކުގައި ފެނިގެންދާ ފުރަތަމަ ފިލްމުގެ ޑައިރެކްޓަރަކީ ސުޖޯއި ގޯޝް އެވެ. މިއީ ނެޓްފްލިކްސްއިން ރިލީޒްކުރ"ދަ އާޗީސް" ބޮލީވުޑަށް ތައާރަފުވާ ސުހާނާ އޭނާގެ ބައްޕަ އާއެކު މަސައްކަތްކުރާ ފުރަތަމަ ފަހަރެވެ.

މީގެ ކުރިން ސުހާނާގެ ބޭބެ އާރްޔަން ހާން ވަނީ އޭނާގެ ބައްޕަ ޝާހްރުކް އާއެކު އިސްތިހާރެއްގައި މަސައްކަތް ކޮށްފަ އެވެ. އެއީ އަލަށް ތައާރަފްކުރި ލަގްޒަރީ ސްޓްރީޓްވެއާ ބްރޭންޑެއް ކަމަށްވާ "ޑްޔަވޮލް އެކްސް" ގެ އިސްތިހާރެކެވެ.

މީޑިއާތަކުން ރިޕޯޓްކޮށްފައިވާ ގޮތުގައި ޝާހްރުކް އާއި ސުހާނާ ފެނިގެންދާ ފިލްމު ޕްރޮޑިއުސްކުރަނީ ޝާހްރުކްގެ ރެޑް ޗިލީޒް އެންޓަޓައިންމަންޓާއި އޭނަގެ އެންމެ ފަހުގެ ފިލްމު "ޕަތާން" ގެ ޑައިރެކްޓަރު ސިދާތު އާނަންދުގެ ކުންފުނި، މާފްލިކްސް ގުޅިގެންނެވެ.

ބެލުންތެރިންގެ ބޮޑު މަގުބޫލު ކަމެއް ހޯދި "ކަހާނީ" ދެ ފިލްމު ވެސް ޑައިރެކްޓްކުރި ސުޖޯއި އޮތީ މިދިޔަ އަހަރު ކަރޫނާ ކަޕޫރާ އެކީ ތުރިލާއެއްގެ މަސައްކަތް ނިންމައިފަ އެވެ. އެކަމަކު އޭގެ ނަމާއި ރިލީޒްކުރާނެ ތާރީހެއް އަދި އިއުލާނެއް ނުކުރެ އެވެ.

ޕިންކްވިލާ އިން ބުނީ ޝާހްރުކާއި ސުހާނާގެ ފިލްމުގެ މަސައްކަތް ފަށާނީ ޑައިރެކްޓަރު ރާޖްކުމާރު ހިރާނީ ހަދާ ޝާހްރުކްގެ "ދުންކީ" ގެ ހުރިހާ މަސައްކަތެއް ނިންމުމަށް ފަހު ކަމަށެވެ، އެ ފިލްމު ރިލީޒްކުރަން ތާވަލުކޮށްފައި އޮތީ ޑިސެމްބަރުގަ އެވެ.