ނިއުޔޯކް (16 ޖެނުއަރީ) - ދުނިޔެއަށް ކުރިމަތިވެފައިވާ ކޮރޯނާވައިރަސްއާ ގުޅިގެން ދުނިޔޭގެ އެއްގައުމުން އަނެއް ގައުމުތަކަށް ހިޖުރަކުރާ މީހުންގެ ނިސްބަތް 30 ޕަސެންޓް ދަށަށް ގޮސްފައިވާ ކަމަށް ޔޫއެން އިން ނެރުނު ރިޕޯޓެއްގައި ބުނެފި އެވެ.

ޔޫ އެން އިން ނެރުނު "އިންޓަނޭޝަނަލް މައިގްރޭޝަން 2020" ރިޕޯޓްގައިވާ ގޮތުން 281 މިލިއަން މީހުން އެ މީހުންގެ އަމިއްލަ ގައުމުން ބޭރުގައި ދިރިއުޅެމުންދެ އެވެ.

އެ ރިޕޯޓްގައި ވާގޮތުން ރަޖިސްޓްރީކޮށްފައިވާ ގިނަ މީހުން އުޅެމުން ދަނީ ދުނިޔޭގެ 20 ގައުމެއްގަ އެވެ. މި ލިސްޓްގައި އެންމެ ގިނަ މީހުން ހިޖުރަކުރި ގައުމެއްގެ ގޮތުގައި އޮތީ އެމެރިކާ އެވެ. އެމެރިކާގައި 51 މިލިއަން މީހުން ދިރިއުޅެ އެވެ.

އެ ލިސްޓްގައި ދެން ހުރި ގައުމުތަކަކީ ޖަރުމަން 16 މިލިއަން މީހުން، ސައުދީ އަރަބިއްޔާ 13 މިލިއަން މީހުން، ރަޝިއާ 12 މިލިއަން މީހުން އަދި އިނގިރޭސި ވިލާތް 9 މިލިއަން މީހުންނެވެ.

ދުނިޔޭގެ ގައުމުތަކުގެ ތެރެއިން އެ ގައުމެއްގެ ރައްޔަތުންގެ ތެރެއިން އެންމެ ގިނަ ބަޔަކު ގައުމުން ބޭރުގައި އުޅޭ ގައުމަކީ އިންޑިއާ އެވެ. 2020 ވަނަ އަހަރުގެ ނިޔަލަށް އިންޑިއާގެ 18 މިލިއަން މީހުން ގައުމުން ބޭރުގައި ދިރިއުޅެމުންދާ ކަމަށް ބުނެފައިވެ އެވެ. ދެން އެންމެ ގިނަ ބަޔަކު ގައުމުން ބޭރުގައި އުޅެނީ މެކްސިކޯ އަދި ރަޝިޔާއިންނެވެ. މި ދެ ގައުމުން 11 މިލިއަން މީހުން ގައުމުން ބޭރުގައި އުޅެ އެވެ. ޗައިނާ އިން 10 މިލިއަން މީހުން އަދި ސީރިއާގެ 8 މިލިއަން މީހުން ގައުމުން ބޭރުގައި އުޅޭކަމަށް ރިޕޯޓްގައި ފާހަގަކޮށްފައިވެ އެވެ.

ދުނިޔޭގެ އެންމެ ގިނަ ބަޔަކު ހިޖުރަ ކުރި ރީޖަންއަކީ ޔޫރަޕް އެވެ. ޔޫރަޕްގެ ގައުމުތަކަށް 87 މިލިއަން މީހުން ހިޖުރަކުރި ކަމަށް ބުނެފައިވެ އެވެ.

އިންޓަނޭޝަނަލް މައިގްރެންޓްގެ ދެބައިކުޅަ އެއްބައި މީހުންނަކީ އެމީހަކު އުފަންވި ރީޖަންގައި ހިޖުރަ ކުރާ މީހުންނެވެ. ޔޫރަޕްގެ ގައުމުތަކުގެ ހިޖުރަ ކުރާ މީހުންގެ ތެރެއިން 70 މީހުން ދިރިއުޅެނީ އެމީހުން އުފަންވި ގައުމު ނޫން އެހެން ގައުމެއްގަ އެވެ.