އަތޮޅު ތެރޭގެ ހަތް ރަށަކުން އިތުރު 8 މީހަކު މިއަދު ކޮވިޑް-19އަށް ޕޮޒިޓިވްވެއްޖެ އެވެ.

އެޗްއީއޯސީން މިއަދު ހަވީރު ހާމަކުރި ތަފާސްހިސާބުތައް ދައްކާ ގޮތުން ޕޮޒިޓިވް ކޭސްތައް ފެނިފައިވަނީ، ހއ ދިއްދޫ އާއި އެއަތޮޅު ކެލާގެ އިތުރުން، ތ ވޭމަންޑޫ އާއި، ނ މަނަދު އާއި، ޅ ނައިފަރާއި ރ ދުވާފަރުގެ އިތުރުން ގދ ހޯޑެއްދޫއިންނެވެ.

ދިއްދޫން 22 އަހަރުގެ އަންހެނަކު އަދި ކެލާއިން 57 އަހަރުގެ ދިވެހި ފިރިހެނަކު ޕޮޒިޓިވްވިކަން އެނގުނީ ހޯމް ކަރަންޓީން ފުރިހަމަކުރުމަށްފަހު ދޫކޮށްލުމުގެ ކުރިން ނެގި ސާމްޕަލް ޕޮޒިޓިވްވުމުންނެވެ.

މީގެ އިތުރުން ތ ވޭމަންޑު އާއި ނ މަނަދޫން ކޯވިޑަށް ޕޮޒިޓިވްވެފައި ވަނީ ފުރަބަންދު ކަރަންޓީންގައި ތިބި ދެ ފިރިހެނުން ކަމަށް އެޗްޕީއޭ އިން ބުންޏެވެ. އަދި ވޭމަންޑޫއިން ޕޮޒިޓިވްވެފައި ވަނީ 54 އަހަރުގެ އަންހެނެކެވެ.

އެޗްޕީއޭ އިން ބުނީ ރ ދުވާފަރާއި، ޅ ނައިފަރުން ޕޮޒިޓިވްވެފައި ވަނީ އެ ދެ ރަށުން މީގެ ކުރިން ޕޮޒިޓިވްވި މީހުންނާ ބައްދަލުވެފައިވާ ދެ މީހުން ކަމަށެވެ. މިގޮތުން ދުވާފަރުން 23 އަހަރުގެ ދިވެހި އަންހެނަކު ޕޮޒިޓިވްވި އިރު ނައިފަރުން ޕޮޒިޓިވްވެފައި ވަނީ ޕޮޒިޓިވް މީހަކާއި ބައްދަލުވި ބަނގްލަދޭޝްގެ ފިރިހެނެކެވެ.

އެޗްޕީއޭ އިން ބުނީ ގދ ހޯޑެއްދޫއިންވެސް މިއަދު ޕޮޒިޓިވްވީ، އެ ރަށުން ކުރިން ބައްޔަށް ޕޮޒިޓިވްވެފައިވާ މީހަކާ ބައްދަލުވެފައިވާ ދެ މީހުންނެވެ. އެރަށުން މިހާތަނަށް 35 މީހަކަށް މި ބަލި ޖެހިފައިވެ އެވެ.

ރާއްޖެ އިން މިހާތަނަށް 8،900 މީހަކު ކޮވިޑަށް ޕޮޒިޓިވްވެފައި ވެ އެވެ. އޭގެ ތެރެއިން 6،559 މީހުން ރަނގަޅުވެ 31 މީހަކު ވަނީ މަރުވެފަ އެވެ. މިހާރު ފަރުވާދެމުން އަންނަނީ 2،310 މީހަކަށެވެ.