ކްރިމިނަލް ކޯޓުގެ ބައެއް ސެކްޝަންތަކުގެ ޝަރީއަތްތައް ހިންގުމަށް ސިވިލް ކޯޓުގެ ހުޅުމާލެ ޑިވިޝަން ހިންގި އިމާރާތްދީފި އެވެ.

ކްރިމިނަލް ކޯޓު ހިންގަމުން އައި ދަތުރުވެރިންގެ މާރުކޭޓް ސަރަހައްދުގައި ހުރި އިމާރާތް ވަރަށް ބޮޑަށް ބާވެ ބޭނުންނުކުރެވޭ ވަރަށް ވަނީ ހަލާކުވެފަ އެވެ. އެކަމުގެ ސަބަބުން އެ ކޯޓުގެ ޝަރީއަތްތައް ވަނީ ހުއްޓިފަ އެވެ.

ކްރިމިނަލް ކޯޓުން މިއަދު ބުނީ އެ އިމާރާތުގެ ތިން މާލަމެއް އެ ކޯޓަށް ލިބުމުން، ކްރިމިނަލް ކޯޓުގެ ހަ ސެކްޝަނެއްގެ މަސައްކަތް އެއްފަހަރާ ކުރިއަށް ގެންދެވޭނެ ކަމަށެވެ.

މިދިޔަ އަހަރު އެ އިމާރަތުގެ ބޮޑުގައި ބޭނުން ނުކުރަން ނިންމާފައިވާއިރު، އެ އިމާރާތުގައި ޝަރީއަތްތައް ހިންގަމުން އައީ އެންމެ ސެކްޝަނެއްގަ އެވެ.

"...ވަގުތީ ގޮތުން މިގެނެވުނު ބަދަލާއި ގުޅިގެން ކޯޓުގެ ބައެއް ސެކްޝަންތައް ހުޅުމާލެ ބަދަލުކުރުމުން، މާލޭގައި ހުރި ކޯޓުގެ އިމާރާތުން ޝަރީޢަތްކުރާ 03 މާލަން ހުސްކުރެވިފައިވެއެވެ. އެހެންކަމުން، މިވަގުތު ހުޅުމާލެ މާލަންތަކާއެކު ޖުމްލަ 6 މާލަން ޝަރީއަތްކުރުމަށް ލިބިފައިވެއެވެ،" ކްރިިމިނަލް ކޯޓުން އެކްސްގައި ކުރި ޕޯސްޓެއްގައި ބުންޏެވެ.

ކްރިމިނަލް ކޯޓުގެ އިމާރާތް އަޅާނެ ބިމެއް ނުލިބިގެން އުޅެނީ އެކަމަށްޓަކައި އެޗްޑީސީއަށް ދައްކަންޖެހޭ ފައިސާ ނެތުމުންނެވެ. ފައިސާ ނެތުމުން އެ ކޯޓުގެ އިމާރަތް އެޅޭނެ ގޮތެއް ނެތްއިރު، އެފަދަ އިމާރާތެއް އަޅަން ބިމެއް ހަމަޖެއްސުމަށް ސަރުކާރުން އެއްވެސް މަސައްކަތެއް ނުކުރާ ކަމަށް ބުނެ ގާނޫނީ ވަކީލުން އަންނަނީ ކަންބޮޑުވުންފާޅުކުރަމުންނެވެ.