އީރާނުގެ ރިޔާސީ ރޭހުން ކުރީގެ ރައީސް އަހުމަދީނިޖާދަށް މިފަހަރު ވެސް ފުރުސަތެއް ނުދިން

ތެހެރާން (ޖޫން 11) - އީރާނުގައި މި މަހު ފަހުކޮޅު ބާއްވާ ރިޔާސީ އިންތިޚާބުން ކުރީގެ ރައީސް މަހްމޫދު އަހުމަދީނިޖާދަށް މިފަހަރު ވެސް ފުރުސަތު ނުދިނެވެ.

ހެލިކޮޕްޓަރު ވެއްޓުމުގެ ހާދިސާއެއްގައި ކުރީގެ ރައީސް އިބްރާހިމް ރައީސީ އަވަހާރަވުމާ ގުޅިގެން އީރާނުގައި މި މަހު 28 ގައި ބާއްވާ ރިޔާސީ އިންތިޚާބުގައި ވާދަކުރުމަށް އަހުމަދީނިޖާދު ވަނީ އާދިއްތަ ދުވަހު ރަޖިސްޓާކޮށްފަ އެވެ. ނަމަވެސް ރިޔާސީ އިންތިޚާބުގައި ވާދަކުރަން އީރާނުގެ ގާޑިއަން ކައުންސިލުން އެޕްރޫވްކުރި ނަންތަކުގެ ތެރޭގައި ނިޖާދީ ނުހިމެނެ އެވެ.

އީރާނުގައި 2005 އިން 2013 އަށް ރައީސްކަން ކުރެއްވި އުމުރުން 67 އަހަރުގެ އަހުމަދީނިޖާދީ އަކީ އީރާނުގެ ރޫހާނީ ލީޑަރު އާޔަތުﷲ އަލީ ޚާމަނާއީއާ ގުޅުން ބޮޑު ބޭފުޅެއް ނޫނެވެ. ވެރިކަން ކުރެއްވި ދުވަސްވަރު ނިޖާދީ ވަނީ އުމުރުފުޅުން މިހާރު 85 އަހަރުގެ ޚާމަނާއީ އަށް ބައެއް ކަންކަމުގައި ގޮންޖައްސަވައިފަ އެވެ.

ހަތަރު އަހަރުގެ ދެ ދައުރަށް ފަހު ނިޖާދީ ވެރިކަމުން ވަކިވެވަޑައިގަތުމަށް ފަހު 2021 ގައި ވެސް ވަނީ އަލުން ވެރިކަމަށް ވަޑައިގަތުމަށް ރިޔާސީ ރޭހަށް ކުރިމަތިލައްވައިފަ އެވެ. ނަމަވެސް 12 މެންބަރުން ހިމެނޭ ގާޑިއަން ކައުންސިލުން އެ ފަހަރު ވެސް ނިޖާދީ އަށް ފުރުސަތެއް ނުދިނެވެ. ކައުންސިލުގައި ތިބެނީ ޚާމަނާއީ އަށް ވަފާތެރި މެންބަރުންނެވެ.

އީރާނުގެ ގާނޫނު އަސާސީގައިވާ ގޮތުން ހަތަރު އަހަރުގެ ދެ ދައުރު ވެރިކަން ކުރުމަށް ފަހު މެދަށް އެއް ދައުރު ދޫކުރުމަށް ފަހު އަނެއްކާވެސް ވެރިކަމަށް ކުރިމަތިލެވެ އެވެ.

މިފަހަރުގެ އިންތިޚާބުގެ ފުރުސަތު ނުދިން މީހުންގެ ތެރޭގައި ޕާލަމެންޓުގެ ރައީސްކަން ތިން ދައުރުކުރައްވާފައިވާ އަލީ ލަރިޖާނީ ވެސް ހިމެނެ އެވެ. އޭނާ އަކީ ކުރީގެ ރައީސް ހަސަން ރޫހާނީއާ ގުޅުން ބޮޑު ބޭފުޅެކެެވެ.

އީރާނުގެ ރިޔާސީ އިންތިޚާބަށް ކުރިމަތިލާން ދިން ފަސް ދުވަހުގެ ތެރޭގައި 80 މީހުން ވަނީ ރަޖިސްޓަކޮށްފަ އެވެ. މީގެ ތެރޭން ގާޑިއަން ކައުންސިލުން ފުރުސަތު ދިނީ ހަ މީހުންނަށެވެ. އެއީ މުޅިން ވެސް ޚާމަނާއީއާ ގުޅުން ބޮޑު ބޭފުޅުންނެވެ.

މީގެ ތެރޭން އެންމެ ކުރީގައި އުޅޭ ކެންޑިޑޭޓެއް ކަމަށް ބުނަނީ ސުޕްރީމް ނެޝަނަލް ސެކިއުރިޓީ ކައުންސިލްގެ ކުރީގެ ސެކްރެޓަރީ ސައީދު ޖަލީލީ އެވެ. ބުނެވޭ ގޮތުގައި އުމުރުން 58 އަހަރުގެ ޖަލީލީ އަކީ ޚާމަނާއީ އެންމެ ގަޔާވާ ބޭފުޅާ އެވެ. ޚާމަނާއީގެ ރުހުން ނެތް ބޭފުޅަކަށް އީރާނުގެ ރައީސް ކަމަށް ވަޑައިގަތުމަކީ ނާދިރު ކަމެކެވެ.

އިންތިޚާބުގައި ވާދަކުރާ ފަރާތްތަކުގެ ތެރޭގައި އީރާނުގެ ޕާލަމެންޓުގެ މިހާރުގެ ރައީސް މުހައްމަދު ބާގިރު ގާލިބާފް ވެސް ހިމެނެ އެވެ.