ހއ. މާރަންދޫ ކައުންސިލްގެ ނައިބު ރައީސް އަހުމަދު ރަމީޒު (ޕެލޭ) މިއަދު ނިޔާވެއްޖެ އެވެ.

އެމްޑީޕީގެ މެމްބަރު ރަމީޒު ނިޔާވީ މިއަދު ހަވީރު ހއ. ދިއްދޫގައި ހުންނަ އަތޮޅު ހޮސްޕިޓަލްގައި ފަރުވާ ދެނިކޮށެވެ. އޭނާ ކުއްލި ގޮތަކަށް ހާލު ދެރަވެގެން ފަރުވާ ދިނީ އުފަން ރަށް މާރަންދޫގަ އެވެ.

މާރަންދޫން ވާހަކަ ދެއްކި މީހަކު ކިޔައި ދިން ގޮތުގައި ރަމީޒު ނިޔާވީ ހާޓް އެޓޭކެއް ޖެހިގެން ކަމެއް ބެލެވެ އެވެ. އެގޮތުން ހަވީރު އެރަށުގައި ކުޅުނު ފުޓްބޯޅަ މެޗެއްގައި ރަމީޒު ކުޅުނު އިރު، އެ މެޗުގައި ކުޅެ ނިންމާފައި ހޮޑުލާން ފެށި ކަމަށް އޭނާ ބުންޏެވެ.

ރަމީޒަކީ މާރަންދޫ ކައުންސިލްގެ ނައިބުރައީސްގެ މަގާމުގައި ހުންނެވި، ރަށުގެ ތަރައްގީ އަށް ގިނަގުނަ ހިދުމަތްތަކެއް ކުރައްވާފައިވާ ބޭފުޅެކެވެ. އޭނާގެ ހަޔާތުގައި ރަށުގެ އެކި ދާއިރާތަކުން ކުރިއެރުން ހޯދުމަށް މަސައްކަތް ކުރައްވާފައިވެ އެވެ.

ރަމީޒް 40، ނިޔާވިއިރު ރަމީޒްގެ އަނބިކަނބަލަކާއި ތިން ދަރިން ދުނިޔޭގައި ތިއްބެވި އެވެ.

ރަމީޒު ނިޔާވުމާ ގުޅިގެން އެމްޑީޕީގެ ޗެއާޕާސަން ފައްޔާޒު އިސްމާއިލް ވިދާޅުވީ ރަމީޒު ކުއްލި ގޮތަކަށް ނިޔާވި ހަބަރު އަޑުއެހީ ފުން ހިތާމައާއެކު ކަމަށާއި ރަމީޒުއަކީ އެމްޑީޕީ އަށް އަގުހުރި ހިދުމަތްތަކެއް ކޮށްދެއްވާފައިވާ ބޭފުޅެއް ކަމަށެވެ. ރަމީޒުގެ އާއިލާ އަށް ފައްޔާޒު ވަނީ ތައުޒިޔާ ފޮނުއްވައިފަ އެވެ.