ސްކޭމްތަކާ ގުޅިގެން 500 އަށްވުރެ ގިނަ ބޭންކު އެކައުންޓާއި 782 ޑިވައިސް ނެޓްވޯކުތަކުން ބްލޮކްކޮށްފައިވާ ކަމަށް ފުލުހުން ބުނެފި އެވެ.

ފުލުހުން މިހެން ބުނެފައިވަނީ ސްކޭމްކޮށްގެން ބޭންކް އޮފް މޯލްޑިވްސް (ބީއެމްއެލް)ގެ އެކައުންޓުތަކުން ފައިސާ ނަގާ މައްސަލައާ ގުޅޭގޮތުން ރައްޔިތުންގެ މަޖިލީހުގެ ސްޓޭޓް އޯންޑް އެންޓަޕްރައިޒަސް (އެސްއޯއީ) ކޮމިޓީން ފާސްކޮށްފައިވާ ރިޕޯޓުގެ ނިންމުންތަކަށް އަމަލުކޮށްފައިވާ މިންވަރު ސާފުކުރުމަށްޓަކައި ފުލުހުންގެ އިސް ބޭފުޅުން އެ ކޮމިޓީއަށް މިއަދު ހާޒިރުކުރުމުންނެވެ.

މި ބައްދަލުވުމުގައި މައުލޫމާތުދެއްވަމުން ހެޑް އޮފް އެންޓި ސްކޭމް ސެންޓަރު، އިންސްޕެކްޓާ އޮފް ޕޮލިސް މަރިޔަމް ރަޝީދާ ވިދާޅުވީ، 500 އަށްވުރެ ގިނަ ބޭންކު އެކައުންޓު ބްލޮކް ކުރުމުގެ އިތުރުން 782 ޑިވައިސް ނެޓްވޯކުން ބްލޮކްކޮށް، 297 ސިމްކާޑު ޓާމިނޭޓް ކޮށްފައިވާ ކަމަށެވެ. މީގެ އިތުރުން 70 ވެބް ލިންކް ބްލޮކް ކޮށްފައިވާ ކަމަށްވެސް އޭނާ ވިދާޅުވި އެވެ.

މިހާތަނަށް ފުލުހަށް ހުށަހަޅާފައިވާ ސްކޭމް މައްސަލަތަކުގެ ތެރެއިން 156 މައްސަލައެއް ތަހުގީގު ނިންމާ ދައުވާކުރަން ފޮނުވާފައިވާ ކަމަށް މަރިޔަމް ވިދާޅުވި އެވެ. މިހާރު ގިނަ މައްސަލަތަކުގެ ޝަރީއަތްތައް ކުރިއަށްދާކަންވެސް އޭނާ ފާހަގަ ކުރެއްވި އެވެ.

ސްކޭމް ކޮށްގެން ހޯދާ ފައިސާ ދައުރުކުރާ އެކައުންޓްތައް ކޯޓު އަމުރަކާ ނުލައި ފްރީޒްކުރެވޭނެ ގޮތެއް ހަދައިދިނުމަށް ފުލުހުން ވަނީ ރައްޔިތުންގެ މަޖިލީހުގައި މިއަދު އެދިފަ އެވެ. މަރިޔަމް ވިދާޅުވީ ކޯޓު އަމުރަކާ ނުލައި އެކައުންޓްތައް ފްރީޒްކުރަން ބޭނުންވަނީ އެ ފައިސާ ވީހާވެސް އަވަހަށް އަތުލައިގަތުމަށް ކަމަށްވާތީ އެއީ ވަރަށް އަވަހަށް ބޭނުންވާ ހައްލެއް ކަމަށެވެ.

20 މިލިއަނަށް ވުރެ ގިނަ ރުފިޔާގެ 1661 މައްސަލަ ސްކޭމްތަކާ ގުޅިގެން މިދިޔަ އަހަރު އެކަނިވެސް ފުލުހަށް ހުށަހަޅާފައިވެ އެވެ. އަދި މިއަހަރުގެ މިހާތަނަށް 1،302 މައްސަލަ ރިޕޯޓުކޮށްފައިވާ ކަމަށް ވެސް ފުލުހުން ބުނެ އެވެ.