ގައުމީ ބޭންކު، ބީއެމްއެލްއަށް އޮޅިގެން އެކި މީހުންގެ އެކައުންޓަށް 77 ބިލިއަން ޑޮލަރު ޖަމާކޮށްފި އެވެ.

އެނގިފައިވާގޮތުގައި އެ ފައިސާ ޖަމާކޮށްފައި ވަނީ ލިލީ ބީޗް ރިސޯޓްގައި މަސައްކަތްކުރާ މުވައްޒަފުންގެ އެކައުންޓަށެވެ. އޭނާ ބުނީ އެ ރިސޯޓްގައި މަސައްކަތް ކުރާ އެކި މުވައްޒަފުންގެ އެކައުންޓަށް އެތައް ބިލިއަން ޑޮލަރު ޖަމާކޮށްފައިވާ ކަމަށެވެ.

އެމީހާގެ އެކައުންޓަށް ފައިސާ ޖަމާވިތާ 10 ވަރަކަށް މިނެޓް ތެރޭ ބީއެލްއެލް އިން ވަނީ މޮބައިލް އެޕްލިކޭޝަން ވަގުތުން ޑައުންކޮށްފަ އެވެ.

ބީއެމްއެލް އިން އެކްސްގައި ބުނީ ދިމާވި ޓެކްނިކަލް މައްސަލައަކާ ގުޅިގެން މޮބައިލް އެޕްލިކޭޝަނާއި އިންޓަނެޓް ބޭންކިންގެ ހިދުމަތް މެދުކެނޑިފައިވާ ކަމަށެވެ.

އެ މައްސަލައާ ގުޅިގެން ބީއެމްއެލް އިން ނެރުނު ބަޔާނެއްގައި ބުނީ މިއަދު ޕޭމަންޓް ޕްރޮސެސް ކުރުމުގެ ތެރޭގައި މުވައްޒަފަކަށް ބައެއް އެކައުންޓްތަކަށް އޮޅިގެން ގިނަ އަދަދެއްގެ ފައިސާ ކްރެޑިޓް ކުރެވިފައިވާ ކަމަށެވެ. އަދި މި އެކައުންޓްތައް ދެނެގަނެ، އެ ފައިސާ އަނބުރާ ނަގާފައިވާ ކަމަށް ވެސް އެ ބޭންކުން ބުންޏެވެ.

ބީއެމްއެލް އިން ބުނީ މުވައްޒަފުންނަށް މުސާރަ ޖަމާކުރަން ބޭނުންކުރާ ބަލްކް ޕޭމަންޓަށް ދާދިފަހުން ގެނައި ބަދަލާއެކު ހިނގި މި ހާދިސާގެ ސަބަބުން އެއްވެސް މާލީ ގެއްލުމެއް އެ ބޭންކަށް ނުލިބޭ ކަމަށެވެ.

"އަޅުގަނޑުމެންގެ ސިސްޓަމްތަކަކީ ރައްކާތެރި ސިސްޓަމްތަކެއް ކަމުގެ ޔަގީންކަން ކަސްޓަމަރުންނަށް އަރުވަން. މި ވަގުތު އަޅުގަނޑުމެންގެ އިންޓަނެޓާއި މޯބައިލް ބޭންކިން މެދުކެނޑިފައިވާތީ އަޅުގަނޑުމެން މާފަށް އެދެން،" ހެދުނު ގޯހާ ބެހޭ ގޮތުން ނެރުނު ބަޔާނުގައި އެ ބޭންކުން ބުނެފައިވެ އެވެ.

މާލޭގެ އެކި ސަރަހައްދުތަކުގައި ހުރި ބީއެމްއެލްގެ އޭޓީމްތައް ވެސް އިއްޔެ ވަނީ މައްސަލަ ޖެހި ކަސްޓަމަރުންނަށް އެތަކެއް ތަކުލީފުތަކެއް ކުރިމަތިވެފަ އެވެ.

މިފަދަ މައްސަލަތައް ތަކުރާރުވާއިރު، މިފަދަ މައްސަލަތައް ހައްލުކުރަން އެދެވޭ މަސައްކަތެއް ބީއެމްއެލް އިން ނުކުރާތީ ގިނަ ބަޔަކު އަންނަނީ ހިތްހަމަނުޖެހުންފާޅުކުރަމުންނެވެ.

އެޑިޓަރުގެ ނޯޓް: މި ހަބަރުގައި ބީއެމްއެލްގެ ރަސްމީ ކޮމެންޓް މިހާރު އިތުރުކޮށްފައި.