މާލެ ފަހި ޕްރޮގްރާމް އިފްތިތާހުކުރުމަށް ބޭއްވި ޖަލްސާގެ އިވެންޓް މެނޭޖްކުރަން ބާރަށު ދާއިރާގެ މަޖިލިސް މެމްބަރު އިބްރާހީމް ޝުޖާއުގެ އޮފިޝަލް އިވެންޓްސް ކުންފުންޏަށް 81،000 ރުފިޔާ ދިންކަން ހާމަވެއްޖެ އެވެ.

މިކަން ހާމަވީ މައުލޫމާތު ހޯދައި ލިބިގަތުމުގެ ގާނޫނުގެ ދަށުން ޓްރާންސްޕޯޓް މިނިސްޓްރީއަށް "ހުރިހާ" އިން ފޮނުވި އާރްޓީއައި އަށް ދިން ޖަވާބުންނެވެ.

އެ މިނިސްޓްރީން ދިން ޖަވާބުގައި ވަނީ މިދިޔަ ޖުލައި 24 ވަނަ ދުވަހުގެ ރޭ ދަރުބާރުގޭގައި ބޭއްވި އެ ޖަލްސާގެ އިވެންޓް މެނޭޖްކުރަން ޝުޖާއުގެ އޮފިޝަލް އިވެންޓް ކުންފުންޏާ ހަވާލުކުރީ 81،000 ރުފިޔާއަށް ކަމަށެވެ.

މި އަހަރުގެ ސްޕޯޓްސް އެވޯޑްގެ އިވެންޓް މެނޭޖް ކުރަން ހަވާލުކޮށްފައި ވަނީ ވެސް ޝުޖާއުގެ ކުންފުންޏާ އެވެ. އެ ރަސްމިއްޔާތުގެ އިވެންޓް މެނޭޖްކުރަން ޝުޖާއުގެ ކުންފުންޏާ ހަވާލުކުރީ 3.9 މިލިއަން ރުފިޔާ އަށެވެ.

އިކޮނޮމިކް މިނިސްޓްރީގެ ބިޒްނަސް ޕޯޓަލްގައިވާގޮތުން އޮފިޝަލް އިވެންޓްސްގެ މެނޭޖިން ޑިރެކްޓަރަކީ މެމްބަރު ޝުޖާއު އެވެ. އަދި އޭނާގެ އިތުރުން ބޯޑުގައި އިތުރު ޑިރެކްޓަރަކު ހުރެ އެވެ. އެއީ އަހްމަދު އަދުހަމެވެ.

ރައީސް ޑރ. މުހައްމަދު މުއިއްޒު ވެރިކަމަށް ވަޑައިގަތްފަހުން ސަރުކާރުގެ ގިނަ އިވެންޓްތަކެއް މެނޭޖްކުރަން ޝުޖާއުގެ ކުންފުންޏާ ހަވާލުކޮށްފައިވާ ކަމަށް ބުނެ ގިނަ ބަޔަކު އަންނަނީ ފާޑު ކިޔަމުންނެވެ.