ސޯސަން މަގުގައި ހުރި ކެފޭއެއްގައި ހިނގި އަލިފާނުގެ ހާދިސާއާ ގުޅިގެން 56 މީހަކު ރައްކާތެރި ތަންތަނަށް ބަދަލުކޮށްފި އެވެ.

ސޯސަންމަގުގައި ހުންނަ ގާމަގު ކެފޭގައި އަލިފާން ރޯވީ މިއަދު މެންދުރުފަހު 14:47 ހާއިރު އެވެ.

ނޭޝަނަލް ޑިޒާސްޓާ މެނޭޖްމެންޓް އޮތޯރިޓީ (އެންޑީއެމްއޭ) އިން ބުނީ މި ހާދިސާއާ ގުޅިގެން 50 ބިދޭސީންނާއި، ހަ ދިވެއްސަކު ރައްކާތެރި ތަންތަނަށް ބަދަލު ކުރެވިފައިވާ ކަމަށެވެ.

"އެ މީހުންގެ ހާލަތު ދެނެގަތުމުގެ މަސައްކަތް މިދަނީ ކުރަމުން. އެމީހުންގެ ތެރެއިން އެއްވެސް މީހަކަށް ސިއްހީ މައްސަލައެއް ދިމާވިކަން މިހާތަނަށް ފާހަގަވެފައެއް ނެތް،" އެންޑީއެމްއޭގެ އޮފިޝަލަކު ވިދާޅުވި އެވެ.

އެމްއެންޑީއެފް އިން ބުނީ އެ ހާދިސާއާ ގުޅިގެން ދެ މީހަކު އޭޑީކޭ ހޮސްޕިޓަލަށް ގެންދިޔަ ކަމަށެވެ. އެއީ މަގުމަތީގައި ތިއްބައި ދުމުގެ އަސަރުކޮށްގެން ފަރުވާދޭން ޖެހުނު ދެ މީހެކެވެ. އެ ދެ މީހުންގެ ތެރެއިން ރާއްޖެއިން ބޭރުގެ އުމުރުން 30 އަހަރުގެ އަންހެން މީހާ މިހާރު ދޫކޮށްލާފައިވާ ކަަމަށް ވެސް އެމްއެންޑީއެފް އިން ބުންޏެވެ.

ނަމަވެސް އެ ހޮސްޕިޓަލަށް ގެންދިޔަ 48 އަހަރުގެ އަންހެން މީހާއަށް އަދިވެސް އަންނަނީ ފަރުވާދެމުންނެވެ. އެމްއެންޑީއެފް އިން ބުނީ އޭނާގެ ހާލު ރަނގަޅު ކަމަށެވެ.

އެ ކެފޭގައި އަލިފާން ރޯވާން މެދުވެރިވި ސަބަބު އަދި ނޭނގެ އެވެ. އެ ހާދިސާގައި އެ ކެފޭ ވަނީ ބޭނުން ނުކުރެވޭ ވަރަށް އަނދައިފަ އެވެ. ރޯވި އަލިފާން ކޮންޓްރޯލް ކުރީ ސިފައިންނާއި ފުލުހުން ކުރި ބުރަ މަސައްކަތުން އެތައް އިރެއް ފަހުންނެވެ.

އެ ހާދިސާގައި އެއްވެސް މީހެއްގެ ފުރާނައަށް ނުރައްކާވާ ވަރުގެ ގެއްލުމެއް ނުލިބޭ ކަމަށް އެމްއެންޑީއެފް އިން ބުންޏެވެ.