މަޝްހޫރު ބޭންޑް "ވަން ޑިރެކްޝަން"ގެ ކުރީގެ މެމްބަރު ލިއަމް ޕޭންގެ އޮޓޯޕްސީ ރިޕޯޓުން އޭނާގެ ހަށިގަނޑުގައި މަސްތުވާތަކެތީގެ އަސަރު ހުރިކަން އެނގިއްޖެ އެވެ.

އޮކްޓޯބަރު މަހުގެ 16 ވަނަ ދުވަހު އާޖެންޓީނާގެ ހޮޓަލެއްގެ ބެލްކަންޏަކުން ވެއްޓި ލިއަމް މަރުވިއިރު އޭނާގެ މަރުގައި ޝައްކު ކުރެވޭ ކަންތައްތަކެއް ހުރުމުން އޮޓޯޕްސީ ހަދަން ފޮނުވުނެވެ.

އެގޮތުން އާޖެންޓީނާގެ ފުލުހުންނާ ހަވާލާދީ މީޑިއާތަކުން ބުނާ ގޮތުގައި ލިއަމްގެ ހަށިގަނޑުގައި ޕިންކް ކޮކެއިން ހިމެނޭހެން ކޮކްޓެއިލް ޑްރަގްސްގެ އަސަރު ފެންނަން ހުއްޓެވެ.

ލިއަމް ބެލްކަނިން ވެއްޓުނީ މަސްތުވާތަކެތި ބޭނުން ކޮށްގެން ހުރި ވަގުތެއްގައި ކަމަށް މީގެ ކުރިން ވެސް ބައެއް މީޑިއާތަކުން ރިޕޯޓު ކޮށްފައިވެ އެވެ.

އެއާއެކު އޭނާއަށް މަސްތުވާތަކެތި ފޯރުކޮށްދިނުމުގެ ތުހުމަތު ވެސް އޭނާ ހުރި ބުއެނޮސް އެއިރިސް ހޮޓަލުގެ މުވައްޒަފަކަށް ވަނީ ކުރެވިފަ އެވެ.

ލިއަމްގެ މަރުގެ ތަހުގީގު ފުލުހުން އަދިވެސް ކުރިއަށް ގެންދާއިރު އޭނާގެ އާއިލާއިން ވަނީ މި ދަނޑިވަޅުގައި އާއްމުންގެ ފަރާތުން އެއްބާރުލުމަށް އެދިފަ އެވެ.