ގއ. ކޫއްޑޫ އެއާޕޯޓްގެ ރަންވޭ މަރާމާތައްފަހު ހުޅުވުމުން މޯލްޑިވިއަންގެ ދަތުރުތައް ކޫއްޑޫއަށް އަލުން ފަށައިފި އެވެ.

މޯލްޑިވިއަން އިން ދުވާލަކު ދެ ފްލައިޓް ކޫއްޑޫއަށް އޮންނާނެކަމަށް އެ އެއާލައިނުން ބުނެ އެވެ.

ކޫއްޑޫ އެއާޕޯޓްގެ ރަންވޭގެ ފެންވަރު ދައްވެ މޯލްޑިވިއަންގެ ދެ ބޯޓެއް ގްރައުންޑް ކުރަންޖެހުނުފަހުން އެ އާޕޯޓް މަރާމާތަށް ބަންދުކުރީ މި މަހުގެ 12 ވަނަ ދުވަހު އެވެ.

ކޫއްޑޫ އެއާޕޯޓު ހިންގަނީ ބޭރުގެ ކުންފުންޏަކުންނެވެ.

އެނގިފައިވާ ގޮތުގައި އެއާޕޯޓް އަލުން އޮޕަރޭޝަނަށް ގެނައި ނަމަވެސް އަދި ރަންވޭ މަރާމާތުކޮށް އެއްކޮށް ނުނިމެ އެވެ. އެގޮތުން ރަންވޭ މަރާމާތު ކުރުމުގެ ބައެއް މަސައްކަތްތައް އަދިވެސް ދަނީ ކުރަމުންނެވެ.

ކޫއްޑޫ އެއާޕޯޓު ބަންދު ކުރުމުން ގއ. އަތޮޅުގެ ރައްޔިތުން ދަތުރު ކުރަމުންދިޔައީ މާވަރުލު އެއާޕޯޓާއި، ފަރެސްމާތޮޑާ އެއާޕޯޓުގެ އިތުރުން ކާޑެއްދޫ އެއާޕޯޓުންނެވެ.

ކޫއްޑޫ އެއާޕޯޓު ހުޅުވީ 2012 ވަނަ އަހަރު އެވެ. އޭގެ ފަހުން ބޮޑެތި ބޯޓުފަހަރާއި ޖެޓްތައް ޖެއްސޭ ފެންވަރުގެ ބޮޑު ރަންވޭއަކާ އެކު ތަރައްގީކޮށް އަލުން ކޫއްޑޫ އެއާޕޯޓު ހުޅުވީ 2017 ވަނަ އަހަރު އެވެ.