އެމެރިކާގައި އިއްޔެ އޮތް ވާދަވެރި ރިޔާސީ އިންތިހާބުގައި މިހާރުގެ ނައިބު ރައީސް ކަމާލާ ހެރިސް ބޮޑު ތަފާތަކުން ބަލިކުރައްވައި ކުރީގެ ރައީސް ޑޮނަލްޑް ޓްރަމްޕް ރިޔާސީ ދެވަނަ ދައުރަކަށް އިންތިހާބުވެވަޑައިގެންފި އެވެ.

ހަތަރު އަހަރަށް ފަހު ޓްރަމްޕް މި ފަހަރު އިންތިހާބު ކާމިޔާބުގައި މިހާތަނަށް ވަނީ 266 އިލެކްޓޯރަލް ވޯޓު ހޯއްދަވައިފަ އެވެ. ކަމާލާއަށް ލިބިވަޑައިގެންނެވީ 219 އިލެކްޓޯރަލް ވޯޓެވެ. މި ފަހަރުގެ އިންތިހާބުގައި ޓްރަމްޕް ވަނީ މިހާތަނަށް 68.2 މިލިއަން ވޯޓު ހޯއްދަވައިފަ އެވެ. ކަމާލާ އަށް ލިބިވަޑައިގެންނެވީ 63 މިލިއަން ވޯޓެވެ.

އެ ނަތީޖާއާއެކު އިންތިހާބު ކާމިޔާބުކުރެއްވިކަން އިއުލާން ކުރައްވައި ޓްރަމްޕް މިހާރު ގެންދަވަނީ ސަޕޯޓަރުންނާ ބައްދަލުކުރައްވައި ވާހަކަދައްކަވަމުންނެވެ.

އޭނާ ވިދާޅުވީ މިއީ އެމެރިކާއަށް ރަން ޒަމާނަކަށް ވާނެ ކަމަށާއި އަދި މިއީ "މިހާތަނަށް ހިންގި އެންމެ ބޮޑު ސިޔާސީ ހަރަކާތް" ކަމަށެވެ.

މިއާއެކު ވެސްޓް ވާޖީނިއާ އަދި އޮހައިއޯގައި ޑިމޮކްރެޓިކް ގޮނޑިތައް ރިޕަބްލިކުން ނެގުމާއެކު ޔޫ.އެސް ސެނެޓުގެ މެޖޯރިޓީ ވެސް މިވަނީ ރިޕަބްލިކަން ޕާޓީން ހޯދާފަ އެވެ. ހައުސް އޮފް ރެޕްރެޒެންޓެޓިވްސްގެ ކޮންޓްރޯލް ހޯދުމުގެ މަސައްކަތުގައި އެއްވެސް ޕާޓީއަކަށް ވަކި މޮޅެއް ލިބިފައިނުވާކަން ފާހަގަކުރެވެ އެވެ.

އިންތިޚާބުގައި ޓްރަމްޕް ވާދަކުރެއްވީ ވައިޓް ހައުސް އަނބުރާ ހޯދުމުގެ 50-50 ފުރުސަތަކާއެކުގަ އެވެ. މިދިޔަ ރިޔާސީ އިންތިޚާބަށްފަހު ގިނަ ސިޔާސީ ދާއިރާގެ މާހިރުން ބުނެފައިވަނީ ޓްރަމްޕްގެ ސިޔާސީ ކެރިއަރު ނިމުމަކަށް އައިސްފައިވާ ކަމަށެވެ. އެޑިސަންގެ އެގްޒިޓް ޕޯލްތަކުން ދައްކާގޮތުގައި ޓްރަމްޕަށް އިތުރު ތާއީދު ލިބިފައިވަނީ އާންމުކޮށް ޑިމޮކްރެޓިކް ޕާޓީއަށް ވޯޓުދޭ ހިސްޕެނިކުންގެ ފަރާތުންނާއި، 2020 ގެ ރިޔާސީ އިންތިޚާބަށްފަހު އަގުތައް މައްޗަށް ދިއުމުގެ ސަބަބުން އޭގެ އަސަރު ބޮޑަށް ކުރި މެދުފަންތީގެ އާމްދަނީ ލިބޭ ގޭބިސީތަކުގެ ފަރާތުންނެވެ.