ބަންގްލަދޭޝްގެ ކުރީގެ ބޮޑުވަޒީރު ޝެއިޚް ހަސީނާ އާއި ހަސީނާގެ ވެރިކަމުގައި އިސްކޮށް ތިއްބެވި ވެރިން ހައްޔަރު ކުރުމަށް އިންޓަޕޯލްގެ "ރެޑް ނޯޓިސް" އެލާޓެއް ނެރުމަށް އެދޭނެ ކަމަށް ބަންގްލަދޭޝްގެ ސަރުކާރުން ބުނެފި އެވެ.

އާދިއްތަ ދުވަހު ނޫސްވެރިންނަށް މައުލޫމާތު ދެމުން އެ ގައުމުގައި އުފައްދާފައިވާ ވަގުތީ ސަރުކާރަށް ގާނޫނީ ލަފާދޭ ފަރާތްކަމަށްވާ އާސިފް ނަޒްރުލް ބުނެފައިވަނީ ޖުލައި އަދި އޮގަސްޓް މަހު ސަރުކާރާ ދެކޮޅަށް ބޭއްވި ރައްޔިތުންގެ ހަރަކާތުގެ ބައެއް ބައިވެރިން މެރި މީހުން އެކަމުގެ ޒިންމާ ނަގަންޖެހޭން ކަމަށާއި އެމީހުން ފިލައިގެން ކޮންމެތާކަށް ދިޔަކަމުގައި ވިޔަސް އަނބުރާ ގެންނާނެ ކަމަށެވެ.

ވަޒީފާގެ ކޯޓާ މައްސަލައިގައި އެ ގައުމުގެ ދަރިވަރުން ސަރުކާރާ ދެކޮޅަށް ފެށި ސިލްސިލާ މުޒާހަރާތަކުގައި ބައިވެރިވި އެތައް ސަތޭކަ ބަޔަކު އޭރުގެ ސަރުކާރުން ވަނީ މަރާފަ އެވެ. މުޒާހަރާތައް ވަރުގަދަވެ އޮގަސްޓް މަހު ހަސީނާ ވަނީ އިސްތިއުފާ ދެއްވުމަށްފަހު ގައުމު ދޫކުރައްވާ ފިއްލަވާފަ އެވެ. އޭގެ ފަހުން، މިހާތަށް އޭނާގެ ގާތް އެތައް ބަޔަކު ވަނީ ހައްޔަރުކޮށްފަ އެވެ. މި މީހުންނަށް ކުރަނީ ހަސީނާގެ ވެރިކަމާއި ދެކޮޅަށް ހިންގުނު ހަރަކާތްތަކުގައި 700 އަށްވުރެ ގިނަ މީހުން މަރާލި ފުލުހުންގެ އަމަލުތަކުގައި ބައިވެރިވި ކަމުގެ ތުހުމަތެވެ.

ހަސީނާ ހައްޔަރުކުރުމަށް ބަންގްލަދޭޝްގެ ކޯޓުން މިހާރު ވަނީ އަމުރެއް ނެރެފަ އެވެ.

ހަސީނާގެ 15 އަހަރުގެ ވެރިކަމުގައި އިންސާނީ ހައްޤުތަކަށް އަރައިގަތުމުގެ އަމަލުތައް ހިންގާފައިވެ އެވެ. މީގެ ތެރޭގައި ސިޔާސީ ވާދަވެރިން ބަންދުކުރުމާއި މެރުން ހިމެނެ އެވެ.