ކަނޑުމަގުން ރާއްޖެއަށް އެތެރެކުރަން އުޅުނު 3.3 ކިލޯގެ މަސްތުވާތަކެތި ކަސްޓަމްސްއިން އަތުލައިފި އެވެ.

މޯލްޑިވްސް ކަސްޓަމްސް ސާވިސްއިން ބުނީ މި މަހުގެ 10 ވަނަ ދުވަހު މާލޭ ވިޔަފާރި ބަނދަރުން އަތުލީ 2282 ގްރާމް (2.28 ކިލޯ)ގެ ކެނެބިސް އަދި 1038 ގްރާމް (1.03 ކިލޯ) ގެ ކެތިނޯން ކަމަށެވެ.

މި އޮޕަރޭޝަން ކުރިއަށް ގެންގޮސްފައިވަނީ ކަސްޓަމްސްއާ ފުލުހުން ގުޅިގެން މާލޭ ކޮމާޝަލް ހާބަރުގައި ކަމަށާއި މިތަކެތި އަތުލާފައިވަނީ ރާއްޖެ އެތެރެކުރަން ގެނެސްފައިވާ މުދާހުރި ކޮންޓެއިނަރެއްގެ ތެރެއިންކަމަށް ކަސްޓަމްސްއިން ބުންޏެވެ.

މި މައްސަލައާއި ގުޅޭ އިތުރު ތަފްސީލު ފުލުހުން ހާމަކޮށްފައިނުވެ އެވެ.

އޮކްޓޫބަރު 31 ވަނަ ދުވަހު ބެންކޮކުން ރާއްޖެ ގެނެސްފައިވާ އެއާފްރައިޓް ޝިޕްމަންޓެއްގައި ފޮރުވައިގެން އެތެރެކުރަން އުޅުނު 5.9 ކިލޯގްރާމްގެ މަސްތުވާތަކެތިވެސް ކަސްޓަމްސްއިން ވަނީ އަތުލައިގެންފަ އެވެ.