އާސަންދަ ނިޒާމު އިތުރަށް ހަރުދަނާކުރުމަށް، މުއްސަނދިންގެ އަތުން ވަކި އަދަދަކަށް ފައިސާ ނެގުމަށް މި ސަރުކާރުން ނިންމައިފި އެވެ. މި ބަދަލުތައް ގެންނަން ސަރުކާރުން ހުށަހަޅާފައި ވަނީ އަންނަ އަހަރަށް ލަފާ ކުރާ ތަފްސީލީ ބަޖެޓްގަ އެވެ.

މި ބަދަލާއެކު އާސަންދަ އިން އަހަަރަކު 600 މިލިއަން ރުފިޔާ ސަލާމަތް ކުރެވޭނެ ކަމަށް ސަރުކާރުން ވަނީ ލަފާކޮށްފަ އެވެ.

ސަރުކާރުން ނިންމާފައި ވަނީ އާސަންދައިގެ ޚިދުމަތް ބޭނުންކުރުމުގައި އެންމެ މުއްސަނދި ފަރާތްތަކަށް ބޭހާއި އައުޓްޕޭޝަންޓް ޚިދުމަތްތަކަށް ކޮންމެވެސް މިންވަރަކަށް ފައިސާ ދައްކަން ޖެހޭހެން ނުވަތަ އަމިއްލައަށް ޚަރަދުކުރަން ޖެހޭގޮތަށް އުސޫލު ބަދަލުކުރާށެވެ.

އެގޮތުން އިންކަމް ޓެކްސް ދައްކާ ފަރާތްތަކުގެ އަތުން ޕްރީ ޕޭމަންޓެއް ނަގައި، އާސަންދަ ނިޒާމު ފައިނޭންސްކުރަން އެ ފަރާތްތައް ހިއްސާވާ ގޮތަށް ބަދަލުކުރަން ވަނީ ނިންމައިފަ އެވެ.

މީގެ އިތުރުން އާސަންދަ ސްކީމުން ޕްރައިވެޓް ހޮސްޕިޓަލްތަކާއި ފެސިލިޓީތަކުގައި ދޭ ޚިދުމަތްތަކަށް ޕެކޭޖް އަގުތައް ކަނޑައަޅައި ހާމަނައިޒްކުރަން ވަނީ ހުށަހަޅާފަ އެވެ.

މީގެ ތެރެއިން ބައެއް ބަދަލުތައް މިހާރު ވަނީ ގެނެެސްފަ އެވެ. އެގޮތުން އަމިއްލަ އިންޝުއަރެންސް އޮންނަ ނަމަ އެ އިންޝުއަރެންސް ކަވަރުކުރާ އައުޓްޕޭޝަންޓް ޚިދުމަތްތަކަށް އާސަންދައެއް ނުލިބެ އެވެ. ނަމަވެސް ޕްރައިވެޓް އިންޝުއަރެންސްއިން ކަވަރުނުކުރާ ކޮންމެ ހާލަތެއްގައި ވެސް އާސަންދަ ލިބޭނެ އެވެ.