މިދިޔަ މަހު މީރާއަށް 1.73 ބިލިއަން ރުފިޔާ ބަލައިގަނެފި އެވެ.

މި އަދަދަކީ ވޭތުވެދިޔަ އަހަރުގެ މި މުއްދަތުގައި ލިބުނު އާމްދަނީއަށް ވުރެ 14.2 ޕަސެންޓް ދަށް އަދަދެކެވެ. އަދި، އޮކްޓޫބަރު 2024 ގައި ލިބޭނެކަމަށް އަންދާޒާކޮށްފައިވާ އަދަދަށް ވުރެ 30.5 ޕަސެންޓް ގިނަ އަދަދެކެވެ.

މީރާއިން ބުނިގޮތުގައި، އޮކްޓޫބަރު 2023 ގައި ލިބުނު އާމްދަނީ އާ އަޅާބަލާއިރު އޮކްޓޫބަރު 2024 ގައި ބަލައިގަތް އާމްދަނީ މަދުވުމުގެ މައިގަނޑު ސަބަބަކީ، ސެޕްޓެމްބަރު 2023 ގެ ޖީއެސްޓީއާއި އެއާޕޯޓު ޓެކުހާއި ފީ އަދި ގްރީން ޓެކުހުގެ އިތުރުން 2023 ގެ ހަތަރު ވަނަ ކުއާޓަރުގެ ޓޫރިޒަމް ލޭންޑް ރެންޓްގެ ފައިސާ ދެއްކުމުގެ ސުންގަޑި، ސަރުކާރު ބަންދު ދުވަހަކާ ދިމާވުމާ ގުޅިގެން، އޮކްޓޫބަރަށް ފަސްކުރުމެވެ.

މިދިޔަ މަހު ލިބޭނެ ކަމަށް އަންދާޒާކޮށްފައިވާ އަދަދަށް ވުރެ އާމްދަނީ އިތުރުވެފައި ވަނީ، ޖީއެސްޓީގެ ގޮތުގައި ލިބިފައިވާ އާމްދަނީ އިތުރުވުމާއި، އޮކްޓޫބަރު މަހު ބިން ވިއްކުމާއި ބިން ބަދަލުކުރުމުގެ ފީ ގެ އާމްދަނީ މި މުއްދަތުގައި ލިބިފައިވުމާއި، ގްރީން ޓެކްސް، އެކްސްޕެޓް ކޯޓާ ފީ އަދި އެއާޕޯޓް ޓެކްސް އެންޑް ފީގެ ގޮތުގައި ލިބިފައިވާ އާމްދަނީ އިތުރުވުމުގެ ސަބަބުން ކަމަށް މީރާއިން ބުންޏެވެ. މީގެ އިތުރުން، ސެޕްޓެންބަރު 2024 ގައި ރާއްޖެއަށް ޒިޔާރަތްކޮށްފައިވާ ފަތުރުވެރިންގެ އިންސައްތަ 2.1 ޕަސެންޓަށް އިތުރުވެފައިވުމުގެ ސަބަބުން، ފަތުރުވެރިކަމުގެ ދާއިރާއިން ލިބިފައިވާ އާމްދަނީ އިތުރުވެފައިވާކަމަށް މީރާއިން ބުންޏެވެ.

ބިން ވިއްކުމާއި ބިން ބަދަލުކުރުމުގެ ފީ އަކީ ސަރުކާރުން ރަށެއް ކުއްޔަށް ދިނުމުން ދައްކާ ފީއަކަށް ވުމާއެކު މިއީ އަންދާޒާ ކުރެވޭ އާމްދަނީއެއް ނޫނެވެ. އޮކްޓޫބަރު 2024 ގައި ބިން ވިއްކުމާއި ބިން ބަދަލުކުރުމުގެ ފީ ބަލައިގަނެފައިވާތީ މި މުއްދަތުގައި ލިބޭނެކަމަށް އަންދާޒާކޮށްފައިވާ އަދަދަށް ވުރެ ބަލައިގަތް ޖުމުލަ އާމްދަނީ އިތުރުވެފައިވާ ކަމަށް މީރާއިން ބުންޏެވެ.

މީގެ އިތުރުން، މިހާރު އަމަލުކުރަމުންދާ ނުލިބިހުރި ފައިސާ ހޯދުމުގެ މަސައްކަތްތަކުގެ ތެރެއިން، ވޭތުވެދިޔަ ސުންގަޑިތަކަށް ޖީއެސްޓީގެ އާމްދަނީ ލިބިފައިވުމާއެކު، އެއީ އޮކްޓޫބަރު 2024 ގައި މީރާއަށް ލިބިފައިވާ އާމްދަނީ އިތުރުވެފައިވާ ސަބަބެކެވެ.

އޮކްޓޫބަރު 2024 ގައި މީރާއަށް ބަލައިގަތް އާމްދަނީގެ އެންމެ ބޮޑު ބައެއް ހިއްސާކުރަނީ ޖީއެސްޓީއިންނެވެ. އެއީ 63.1 ޕަސެންޓް ނުވަތަ 1.09 ބިލިއަން ރުފިޔާ އެވެ. ދެން އެންމެ ބޮޑު އާމްދަނީއެއް ލިބިފައިވަނީ އިންކަމް ޓެކުހުންނެވެ. އެއީ 6.7 ޕަސެންޓް ނުވަތަ 115.54 މިލިއަން ރުފިޔާ އެވެ. މީގެ އިތުރުން ބިން ވިއްކުމާއި ބިން ބަދަލުކުރުމުގެ ފީ ގެ ގޮތުގައި 94.71 މިލިއަން ރުފިޔާ (5.5 ޕަސެންޓް)، ގްރީން ޓެކުހުގެ ގޮތުގައި 77.06 މިލިއަން ރުފިޔާ (4.4 ޕަސެންޓް)، އެއާޕޯޓު ޑިވަލޮޕްމެންޓް ފީ ގެ ގޮތުގައި 75.82 މިލިއަން ރުފިޔާ (4.4 ޕަސެންޓް)، އަދި އެހެނިހެން ޓެކުހާއި ފީގެ ގޮތުގައި 275.72 މިލިއަން ރުފިޔާ (15.9 ޕަސެންޓް) ލިބިފައިވެ އެވެ.

މިދިޔަ މަހު ލިބުނު އާމްދަނީގެ ތެރޭގައި 66.27 މިލިއަން ޑޮލަރު ހިމެނެ އެވެ.