ގާނޫނުއަސާސީއަށް ގެނައި އިސްލާހުގައި، "އެންޓި ޑިފެކްޝަން"އާ ގުޅޭގޮތުން ކަނޑައަޅައިފައިވާ ނައްޞުތަކަކީ ގާނޫނުއަސާސީގެ ހަތަރު ވަނަ މާއްދާގައި ކަށަވަރުކޮށްދީފައިވާ "ރައްޔިތުންގެ ބާރު" ގެއްލޭގޮތަށް ގެނެސްފައިވާ އިސްލާހެއް ކަމަށް ކުރީގެ އުއްތަމަފަނޑިޔާރު ޑރ. އަހްމަދު އަބްދުﷲ ދީދީ ވިދާޅުވެއްޖެ އެވެ.

އެކްސްގައި ކުރެއްވި ޕޯސްޓެއްގައި ޑރ. އަހްމަދު ވިދާޅުވީ އެ އިސްލާހަކީ ގާނޫނުއަސާސީގެ ހަތަރު ވަނަ މާއްދާގައި ކަށަވަރުކޮށްދީފައިވާ "ރައްޔިތުންގެ ބާރު" ނުވަތަ" ނުވަތަ "ރައްޔިތުންގެ ސިޔާދަތު" ގެއްލޭގޮތަށް ފަރުމާކުރެވިފައިވާ ނައްޞުތަކެއް ކަމަށެވެ.

އެމަނިކުފާނު ވިދާޅުވީ ރައްޔިތުންނަށް ގާނޫނުއަސާސީން ލިބިދީފައިވާ ބާރުތަކާ ހިލާފަށް ގާނޫނުއަސާސީއަށް ބަދަލު ނުގެނެވޭނެ ކަމަށެވެ.

ބައެއް މަލްޓި ޕާޓީ ސިސްޓަމްތަކުގައި "ފްލޯރް ކްރޮސިންގ" މަނާކުރުމުގެ ގޮތުން ގަނޫނުތަކެއް ހެދިފައި ވިނަމަވެސް، "އެނޓި ޑިފެކްޝަން" ގާނޫނުތަކަކީ ކުރިއަރާފައިވާ ގިނަ ޑިމޮކްރަސީތައް ބަލައިގަންނަ އެއްޗެއް ނޫން ކަމަށް ވެސް އެމަނިކުފާނު ވިދާޅުވި އެވެ.

ޑރ. އަހްމަދު ވިދާޅުވީ އެންޓި ޑިފެކްޝަންގެ އުސޫލުތައް އޮންނަ ބައެއް ނިޒާމްތަކަކީ "ބަރްލަމާނީ" ނުވަތަ "ސެމީ ބަރްލަމާނީ" ނިޒާމުތައް ކަމަށެވެ. އޭގެ މައިގަނޑު މަގްސަދަކީ، އެފަދަ ނިޒާމުތަކުގައި ޕާމެންޓަރީ މެޖޯރިޓީ ގެއްލުމުގެ ސަބަބުން ސަރުކާރުގެ ދެމިއޮތުމަށް ހުރަސްއެޅިގެންދާތީ އެކަމަށް ހައްލު ހޯދުން ކަމުގައި ކަމަށް އޭނާ ވިދާޅުވި އެވެ. ނަމަވެސް ރާއްޖެ ފަދަ ރިޔާސީ ނިޒާމެއްގައި ސަރުކާރު އުފަންވަނީ ރައްޔިތުންގެ މަޖިލީހުން ކަމުގައި ނުވާއިރު، ރައްޔިތުންގެ މަޖިލީހުގެ މެޖޯރިޓީއާއި ސަރުކާރުގެ ވުޖޫދާއި އަދި ދެމިއޮތުމާ ދެމެދު އޮންނަންޖެހޭ އެއްވެސް ދުސްތޫރީ ގުޅުމެއް ނެތް ކަމަށް އެމަނިކުފާނު ވިދާޅުވި އެވެ.

އެހެންކަމުން ގާނޫނުއަސާސީއަށް ގެނެވުނު އެންޓި ޑިފެކްޝަންގެ އުސޫލުތައް ކަނޑައެޅިގެން ދިޔުމުން ރައްޔިތުންގެ މަޖިލީހަކީ އެމަޖިލީހާ ގާނޫނުއަސާސީން މަތިކޮށްފައިވާ އިހްތިސާސްތައް ފުރިހަމަޔަށް އަދާކުރާ ބާރެއްގެ ގޮތުގައި އޮންނަ އޮތުން ނިމުމަކަށް އަންނާނެ ކަމަށް ވެސް އެމަނިކުފާނު ވިދާޅުވި އެވެ.

އެމަނިކުފާނު ވިދާޅުވީ ގާނޫނުއަސާސީއަށް އިސްލާހު ގެންނަން މިފަހަރު އަމަލުކުރި އިޖްރާއަތުތައް ފަދަ "އެބްނޯމަލް" އިޖްރާއާތު ތަކެއްގެ ދަށުން ގާނޫނުއަސާސީ އަށް އިސްލާހު ގެނައުމަކީ ތަހްޒީބު މުޖުތަމައެއްގައި ކަން ހިނގައިގެންވާނެ ގޮތެއް ނޫން ކަމަށެވެ.

"ދިވެހިރާއްޖޭގެ ޖުމްހޫރިއްޔާގެ ގާނޫނުއަސާސީއަށް އިއްޔެ ގެނެވުނު އިސްލާހު ފާސްކުރުމުގައި ރައްޔިތުންގެ މަޖިލީހުން ބެސްޓް ޕްރެކްޓިސްއަށް ތަބާވުމަކާ ނުލައި، އެއްދުވަސް ތެރޭގައި އިސްލަހު ހުށަހަޅައި، އިސްލާށް ބަހުސްކޮށް، އިސްލާހު ފާސްކޮށްފައިވަނީ ނޭދެވޭ ނުފޫޒުގައި ޖެހުން ފިޔަވައި އެހެން އެއްވެސް ޟަރޫރަތެއް އޮވެގެން ކަމަކަށް ގަބޫލުނުކުރެވެއެވެ،" ޑރ. އަހްމަދު ވިދާޅުވި އެވެ.

ރާއްޖޭގެ ޖުމްހޫރިއްޔާގައި "ޑައިރެކްޓް ޑިމޮކްރަސީ" އިތުރަށް ހަރުދަނާކޮށް ރައްޔިތުންގެ ބާރު ކަށަވަރުކުރުމުގެ ގޮތުން "ރިކޯލް ރެފްރެންޑަމް" ތައާރަފްކޮށް އިންތިޚާބީ މެންބަރުން ވަކިކުރުމުގެ ބާރު އިންތިޚާބީ ދާއިރާގެ ރައްޔިތުންނަށް ލިބިދެވޭގޮތަށް، ގާނޫނުއަސާސީއަށް އިސްލާހު ގެނައުމުގެ މުހިއްމުކަން މިހާރުވަނީ އިތުރުވެފައި ކަމަށް ވެސް އެމަނިކުފާނު ވިދާޅުވި އެވެ.

މިކަމާ ގުޅޭގޮތުން ތަޖުރިބާކާރު ގާނޫނީ ވަކީލު އަދި ރައްޔިތުންގެ މަޖިލީހުގެ ކެންދޫ ދާއިރާގެ ކުރީގެ މެމްބަރު އަލީ ހުސައިން ވިދާޅުވީ ގާނޫނުއަސާސީގައި ބުނާގޮތުން ދައުލަތުގެ ބާރުތައް ފެށިގެން އަންނަނީ ރައްޔިތުންގެ ފަރާތުން ކަމަށެވެ. އަދި އެ ބާރު ދެމި އޮންނަނީވެސް ރައްޔިތުންގެ ކިބައިގައި ކަމަށް ގާނޫނުއަސާސީގައި ބަޔާންކޮށްފައިވާ ކަމަށް އޭނާ ވިދާޅުވި އެވެ.

އޭނާ ވިދާޅުވީ ރައްޔިތުންގެ ބާރު ފެށިގެން އަންނަގޮތް ގާނޫނުއަސާސީގައި ބަޔާންކޮށްފައިވާ މާއްދާގައި ރައްޔިތުންގެ ބާރު ފެށިގެން އައުމުގައި ސިޔާސީ ޕާޓީ ތަކުގެ ވާހަކައެެއް ނެތް ކަމަށެވެ.

އެހެންކަމުން ރައްޔިތުން ވޯޓަކުން ހޮވާ މެންބަރުން ވަކިކޮށް ގޮނޑި ގެއްލުވާލުމުގެ ބާރު ސިޔާސީ ޕާޓީތަކުގެ އެކްޓިވިސްޓުންނަށް ދިނުމަކީ ގޯސް ނިންމުމެއް ކަމަށް އޭނާ ވިދާޅުވި އެވެ.

ގާނޫނުއަސާސީގައި ބަޔާންކޮށްފައި ވަނީ އެ ގާނޫނުއަސާސީއަށް އިސްލާހު ގެނެވޭނީވެސް އެ ގާނޫނުއަސާސީއާ ތައާރަޒްނުވާގޮތެއްގެ މަތިން ކަމަށެވެ.