ބަންގާޅު ކަނޑުގައި އުފެދިފައިވާ ތޫފާން "ފެންގަލް" ގެ އަސަރު މާދަމާއިން ފެށިގެން ހަތް ދުވަހަށް އަވަށްޓެރި ސްރީލަންކާއަށް ކުރާނެކަމަށް އިންޑިއަން މެޓެއޮރޮލޮޖިކަލް ޑިޕާޓްމަންޓް (އައިއެމްޑީ) އިން ލަފާކޮށްފި އެވެ. އައިއެމްޑީ އިން ވަނީ 2024 ވަނަ އަހަރުގެ މޫސުމުގެ ދެވަނަ ބޮޑު ތޫފާނަށް ވާނެކަމަށް ބެލެވޭ "ފެންގަލް" ތޫފާނާއި ގުޅިންގެން މޫސުމީ އިންޒާރު ދީފަ އެވެ.

މިހާރު ތޫފާން "ފެންގަލް" ބަންގާޅު ކަނޑުގެ އުތުރު ހުޅަނގު ސަރަހައްދާ ދިމާއަށް ދަތުރުކުރާއިރު އެ ސަރަހައްދުގައި ވަނީ ލޯޕްރެޝަރު އެފެދިފަ އެވެ.

އާންމު ގޮތެއްގައި މި ތޫފާން ދަތުރުކުރަނީ އުތުރު އާންދްރާ ޕްރަދޭޝް، އޮޑިޝާ އަދި ވެސްޓް ބެންގާލްއާ ދިމާއަށެވެ. އިންޑިއާގެ މޫސުމާ ބެހޭ އިދާރާއިން މިހާރުގެ ލަފާކުރުންތަކުން ދައްކާ ގޮތުގައި ފެންގަލް ތޫފާން ލަފާކުރެވޭ ގޮތަށް ގަދަވެއްޖެނަމަ، އުތުރު ސްރީލަންކާއާ ދިމާއަށް ދަތުރުކޮށް، ނޮވެމްބަރު 26 އާއި 27 އާ ދެމެދު އެ ގައުމުގެ އެއްގަމަށް އަރާފާނެ އެވެ.

މިކަމާއި ގުޅިގެން ލަންކާގެ އިރިގޭޝަން ޑިޕާޓްމަންޓުން ވަނީ ނޮވެމްބަރު 25 އިން 28 އަށް ބޯކޮށް ވާރޭ ވެހި، ފެންބޮޑުވެ ކޯރުތައް ބަނޑުންވުމުގެ ހާދިސާތަކާއި ކުރިމަތި ލާންޖެހިދާނެކަމަށް ލަފާކޮށްފަ އެވެ.

އެގޮތުން ލަންކާގެ އާންމުކޮށް ފެންބޮޑުވާ ސަރަހައްދުތަކުގައި ދިރިއުޅޭ މީހުންނާއި ފަތުރުވެރިން ސަމާލުވެ ރައްކާތެރިކަމުގެ ފިޔަވަޅު އެޅުމަށް އެ އިދާރާއިން ވަނީ އިލްތިމާސްކޮށްފަ އެވެ.

ލަންކާގެ އިތުރުން އިންޑިއާގެ ކެރެލާއާއި ޓަމިލްނާޑޫ ސަރަހައްދުތަކަށްވެސް މި ތޫފާނުގެ އަސަރު ދަނީ ކުރަމުންނެވެ.