އެންސްޕާއިން "އުސޫލުގެ ތެރެއިން" ރައީސް މުއިއްޒުގެ ޓީވީ ޗެނަލް "އެމްއެމް ޓީވީ" ހިންގާ އިމާރާތުގެ ކުލި ހަމަޖެއްސި މައްސަލަ އެންޓި ކޮރަޕްޝަން ކޮމިޝަން (އޭސީސީން) އިން ތަހުގީގުކުރަން ފަށައިފި އެވެ.

ރައީސް މުހައްމަދު މުއިއްޒު ޕްރޮމޯޓްކުރުމަށް ރައީސް އޮފީހުގެ މިނިސްޓަރު އިބްރާހިމް ހަލީލް އިސްވެ ހުންނަވައި، ލޯންޗްކުރި "އެމްއެމް ޓީވީ" ހިންގާ ކުންފުނި މޯލްޑިވްސް މީޑިއާ ހައުސްއާ އެންސްޕާއާއި ދެމެދު 34.8 މިލިއަން ރުފިޔާގެ އެއްބަސްވުމެއް ހަދާފައިވެ އެވެ. އެއީ އެންސްޕާ ހިންގުމަށް ފަސް އަހަރު ދުވަހު މއ. ސީރާޒީގެ ދެ ފަންގިފިލާ ކުއްޔަށް ހިފުމާ ގުޅޭ އެއްބަސްވުމެކެވެ.

މީޑިއާ ހައުސްއިން މއ.ސީރާޒީގެ ހަތަރު ފަންގިފިލާ ކުއްޔަށް ނަގާފައިވަނީ އެންސްޕާއިން އެ ކުންފުންޏަށް މަހެއްގެ މައްޗަށް ދައްކާ އަދަދު 580،000 ރުފިޔާއަށް ކަން ވަނީ އެނގިފަ އެވެ. އެހެންކަމުން މި ޑީލްގެ ދަށުން ހަތަރު ފަންގިފިލާގެ ކުލި ހަމަޖައްސާފައިވަނީ އެންސްޕާގެ ބަޖެޓުންކަން ވަނީ ހާމަވެފަ އެވެ.

އެންސްޕާ އިން މިކަމާއި ގުޅިގެން ނެރުނު ބަޔާނެއްގައި ބުނެފައިވަނީ އެ އެޖެންސީއާ ބެހޭ ގޮތުން ފަތުރަމުންދާ ވާހަކަތަކަކީ ދޮގެއް ކަމަށެވެ. އަދި އޮފީސް އިމާރާތެއް ހޯދާފައި ވަނީ "އޮންނަ އުސޫލުގެ ތެރެއިން" ކަމަށް ބުނެފައިވެ އެވެ.

މިކަމާއި ގުޅިގެން އެންސްޕާއަށް ކުރެވޭ ތުހުމަތުތަކާ ބެހޭ ކަންކަން ތަހުގީގު ކޮށްދިނުމަށް އޭސީސީގައި އެ އޭޖެންސީން ވަނީ އެދިފަ އެވެ.

އޭސީސީން މައްސަލަ ބަލަން ފަށާފައިވާއިރު، ދާދިފަހުން ސަރުކާރުން ވަނީ އޭސީސީއަށް ރައީސް އާއި ނައިބު ރައީސް އައްޔަންކުރުމުގެ ބާރު ރައީސް މުއިއްޒުއަށް ލިބޭގޮތަށް ބިލެއް ފާސްކޮށް ތަސްދީގު ކޮށްފަ އެވެ. އަދި އޭސީސީގެ ނައިބު ރައީސް ވަނީ މަގާމުން ވަކިކޮށްފަ އެވެ.