ރައީސް ޑރ. މުހައްމަދު މުއިއްޒުގެ ޓީޗީ ޗެނަލް ކަމަށްވާ، އެމްއެމް ޓީވީ ހިންގާ މޯލްޑިވްސް މީޑިއާ ހައުސް އިން ދެ ފަންގިފިލާ ކުއްޔަށް ހިފަން ވެފައިވާ އެއްބަސްވުން ބާތިލްކުރަން ނޭޝަނަލް ސޯޝަލް ޕްރޮޓެކްޝަން އެޖެންސީ (އެންސްޕާ) އިން ނިންމައިފި އެވެ.

އެންސްޕާއިން އެ އެއްބަސްވުން ބާތިލްކުރަން ނިންމީ އެކަމާ ގުޅިގެން ގިނަ ބައެއްގެ ފާޑުކިޔުންތައް އަމާޒުވާން ފެށުމުންނެވެ. އެއްބަސްވުން ބާތިލްކުރަން ނިންމުމާ ހަމައަށް ސަރުކާރުން ގެންދިޔައީ އެކަން ދޮގުކުރަމުންނެވެ. އެގޮތުން މިއަދު ބޭއްވި ރައްޔިތުންގެ މަޖިލީހުގެ ޖަލްސާއެއްގައި އިދިކޮޅު އެމްޑީޕީގެ މެމްބަރަކު އެ ވާހަކަ ދެއްކެވުމުން ރިޔާސަތުގައި އިންނެވި މަޖިލީހުގެ ރައީސް އަބްދުއްރަހީމް އަބްދުﷲ ވަނީ އެއީ ސަރުކާރުގެ މުއައްސަސާތަކުގެ އަގުވައްޓާލަން ދައްކާ ސާބިތު ނުހިފޭ ވާހަކައެއް ކަމަށް ވިދާޅުވެ، އެ ވާހަކަދެއްކުން ހުއްޓުވާފަ އެވެ.

ގިނަ ބައެއްގެ ފާޑުކިޔުން އަމާޒުވެފައި ވަނިކޮށް އެންސްޕާއިން މިއަދު ނެރުނު ބަޔާނެއްގައި ވަނީ މުހައްމަދު މުއިއްޒު ޓީވީ (އެމްއެމް ޓީވީ) ހިންގާ ކުންފުނީގެ އަގުވައްޓާލަން ދޮގު ވާހަކަތަކެއް ފަތުރަމުން އަންނަ ކަމަށެވެ. އަދި އެކަމުގެ ސަބަބުން އެ ކުންފުންޏަށް މާއްދީގޮތުންނާއި މައުނަވީގޮތުން ފޫނުބެއްދޭވަރުގެ ގެއްލުންތައް ކުރިމަތިވަމުން އަންނަ ކަމަށް އެންސްޕާއިން ބުންޏެވެ. އެ ސަބަބާ ހުރެ އެއްބަސްވުން އުވާލަން އެ ކުންފުނިން ހުށަހަޅާފައިވާ ކަމަށް އެންސްޕާގެ ބަޔާނުގައިވެ އެވެ.

އެހެންކަމުން ފިނޭންސް މިނިސްޓްރީއާ މަޝްވަރާކުރުމަށްފަހު އެ އެއްބަސްވުން ނިމުމަކަށް ގެންނަން ނިންމާފައިވާ ކަމަށް އެންސްޕާއިން ބުންޏެވެ.

އެންސްޕާ އާއި އެމްއެމް ޓީވީ ހިންގާ ކުންފުނި މޯލްޑިވްސް މީޑިއާ ހައުސްއާ ދެމެދު 34.8 މިލިއަން ރުފިޔާގެ އެއްބަސްވުމެއް ހެދި އެވެ. އެއީ އެންސްޕާ ހިންގުމަށް ފަސް އަހަރު ދުވަހު މއ. ސީރާޒީގެ ދެ ފަންގިފިލާ ކުއްޔަށް ހިފުމާ ގުޅޭ އެއްބަސްވުމެކެވެ.

މި އެއްބަސް ވުމުގެ ދަށުން އެ ގެއިން ހަތަރު ފަންގިފިލާ ހިފާފައިވަނީ މަހަކު 580،000ރ އަށެވެ.

މިނިސްޓްރީ އޮފް ފިނޭންސްއިން ހިންގާ ޓެންޑާ ބޯޑް މެދުވެރިކޮށް ހަދާފައިވާ މި އެއްބަސްވުމުގެ ދަށުން، މީޑިއާ ހައުސްއިން ހަމަ އެ އިމާރާތުން 4 ފަންގިފިލާ ކުއްޔަށް ހިފާފައިވެ އެވެ.

އޭގެ ތެރެއިން 2 ފަންގިފިލާ އެންސްޕާ އަށް ދޫކޮށްފައިވާއިރު، އަނެއް 2 ފަންގިފިލާ ބޭނުންކުރަނީ ރައީސް މުއިއްޒުގެ ޓީވީ ސްޓޭޝަންގެ މަސައްކަތްތަކަށެވެ.

އެނގިފައިވާ ގޮތުގައި އެ ހަތަރު ފިލާއަށް ޖުމްލަ ދައްކަން ޖެހެނީ 580،000ރ އެވެ. އެހެންކަމުން އެންސްޕާ މެދުވެރިކޮށް އެމްއެމް ޓީވީ ހިންގާ ދެ ފަންގިފިލާގެ ކުލި ވެސް ހަމަޖައްސާފައިވެ އެވެ.

މި ޓީވީ ޗެނަލް ހެދުމަށް ބޭނުންވާ ސާމާނު ހޯދައިދިނީ އެސްޓީއޯއިން ކަމަށް ނަން ހާމަނުކުރަން އެދި އެސްޓީއޯގެ އިސް އޮފިޝަލަކު ވިދާޅުވި އެވެ. އެ ތަކެތި ދުބާއީން ގަތުމަށް ގާތްގަނޑަކަށް 21 މިލިއަން ރުފިޔާ އެސްޓީއޯ އިން ހަރަދުކުރި ކަމަށް އޭނާ ވިދާޅުވި އެވެ.

"މިތަކެތި ގަތީ ޕީއެސްއެމްއަށް ގެންނަ ތަކެތީގެ ގޮތުގައި. އެކަމަކު ގެނައި ތަކެތީގެ ދެބައިކުޅަ އެއްބައި ގެންދިޔައީ އެމްއެމް ޓީވީއަށް،" އެ އޮފިޝަލް ވިދާޅުވި އެވެ.

ރައީސް މުއިއްޒު ޕްރޮމޯޓްކުރުމަށް ސަރުކާރުގެ ބައެއް އިސްވެރިން ގެންދަވަނީ ދައުލަތުގެ އިދާރާތަކުގެ މުދަލާއި ފައިސާ ނަހަމަ ގޮތުގައި ބޭނުންކުރައްވަމުންނެވެ. އެގޮތުން މިހާރު މީޑިއާ ހައުސްގެ ނަމުގައި ކުންފުންޏެއް އުފައްދަވާ ރައީސްގެ އަމިއްލަ ގެކޮޅުގެ ކަންކަން ބަލަހައްޓަވަން އުޅޭ މީހެއްގެ ނަމުގައި ރަޖިސްޓްރީކޮށް ހިންގަން މިވަނީ ފައްޓަވާފަ އެވެ.