ރައީސް އޮފީހުގައި 17 އަހަރަށްވުރެ ގިނަ ދުވަސްވީ ދެ މުވައްޒަފަކު އެއްވެސް ސަބަބެއް ނާންގައި ކުއްލިގޮތަކަށް ވަޒީފާއިން ވަކިކޮށްފި އެވެ.

ވަޒީފާއިން ވަކިކޮށްފައި ވަނީ އެ އޮފީހުގައި މަސައްކަތް ކުރާ 2 އަންހެން މުވައްޒަފެކެވެ. އޭގެތެރެއިން އެކަކު އެ އޮފީހުގައި މަސައްކަތްކުރާތާ 17 އަހަރަށްވުރެ ގިނަ ދުވަސް ވަނީ ވެފަ އެވެ. އަދި އަނެއް މުވައްޒަފު އެ އޮފީހުގައި މަސައްކަތް ކުރާތާ 18 އަހަރަށްވުރެ ގިނަ ދުވަސް ވަނީ ވެފަ އެވެ.

އޭގެތެރެއިން އެއް މުވައްޒަފެއްގެ އާއިލާގެ މީހަކު ވަނީ އެކަމާ ކަންބޮޑުވުންފާޅުކޮށް ސޯޝަލް މިޑިއާގައި އެކަން ހިއްސާކޮށްފަ އެވެ.

އޭނާ ބުނިގޮތުގޮތުގައި ރައީސް އޮފީހުން ފުރަތަމަ އެ ދެ މީހުންނަށް އެންގީ އަމިއްލައަށް ވަޒީފާއިން ވަކިވުމަށް ކަމަށެވެ. ނަމަވެސް ވަޒީފާއިން ވަކިވާންޖެހޭ އެއްވެސް ސަބަބެއް ނާންގާ ކަމަށް އޭނާ ކިޔައިދިނެވެ. އަމިއްލައަށް ވަޒީފާއިން ވަކިވާން އިންކާރުކުރުމުން ރައީސް ޑރ. މުހައްމަދު މުއިއްޒު އެ ދެ މުވައްޒަފުން ވަޒީފާއިން ވަކިކުރިކަމުގެ ލިޔުން ވަނީ ހަވާލުކޮށްފަ އެވެ.

ވަޒީފާއިން ވަކިކުރުމުގެ ކުރިން އެއްވެސް ނަސޭހަތެއް އިންޒާރެއް ވެސް ދީފައެއްނުވެ އެވެ.

މައުލޫމާތު ހޯދަން "ހުރިހާ" އިން ހުށަހެޅި އާރްޓީއައި އަކަށް ރައީސް އޮފީހުން ދިން ޖަވާބުގައި ވަނީ ރައީސް މުއިއްޒަށް ލިބިގެންވާ ބާރުގެ ދަށުން 18 މުވައްޒަފަކު ވަޒީފާއިން ވަކިކޮށްފައިވާ ކަމަށެވެ. އެއީ ރައީސް މުއިއްޒު ވެރިކަމަށް ވަޑައިގަތް ދުވަހުން ފެށިގެން މިދިޔަ ސެޕްޓެމްބަރު މަހުގެ ހަތް ވަނަ ދުވަހާ ހަމައަށް ވަޒީފާއިން ވަކި ކުރި މީހުންގެ އަދަދު ކަމަށް އެ އޮފީހުން ބުންޏެވެ.